U dyntisty
A.K. 19.07.2006

Witom wszystkich,

dziynki serdeczny za czytaniy i za porcelanowou plomba:))))), ale ta rajza do Ambergu mie wiynci przidzie niz wizyta u moji dyntystki, do chtorej se na kole jezdza. Jyno ze jo tera mom u niy opinia zszarganou skuli tygo piwska:))))

A jak my juz som przi dyntistach, to musza Wom pedziec, ze niekedy je u nich smiysznie. 
Moj kamrat, co na kolach do kupy wroucomy z bahnhoffa do dom, jak idzie do ti naszi dyntystki, to biere znieczulyniy przed znieczulyniym, bo je na bol uczuloni. Ona jak go widzi, to se juz smieje, bo wiy, ze zani dol mu zastrzyk, to musi mu to miejsce nouprzod popsikac znieczulaczym w spreju.
Rouz tyz bol u inkszy dentystki, a ta nie chciala nic slyszec o znieczulyniach i jeszcze go sprzezywala, ze co on to mou za fanaberiy do plombowaniou brac zastrzyk. Szkoda czasu. To ji wez i uciyk z fotela.

Moja kamratka z kolei chciala se zamba wymiynic i przi okazji, jak byla w gabinecie ze swoja inkszom kamratkom u ti naszi dyntystki, to se spytala tak orientacyjnie, czy ona tyz je protetykym. A ona zarouz ji kouzala na fotel siadac. Oczywiscie wynoudla poura dziurkow do zaklajstrowaniou.
Dyntystka zajyla se plombowaniym, a zomb do wymiany zostawiola na koniec. Potyn poszla na urlop. A kamratce tyn zomb zacznol se ruszac i co wartko robic!? 
Pojechala do inkszego dyntysty. On tam zacznal stynkac, ze to juz je wyrobioni zomb, ze trza nowi zrobic, ze on jyno go moze tymczasowo prziklejic, ale gwarancji nie dou ani na tydziyn. Ta kamratka se znerwowala i pedziala mu: "Chopie, tyn zomb mo trzimac! Jo w sklepie robia i musza miec wszysky zamby!!!" Nie uwierzicie, od tygo czasu minyly juz 3 lata, a tyn prziklejony bez gwarancji zomb dali trzimie. Tak se tyn dyntysta borouk przejol.

Ta kamratka i jo zawsze my se dzieloly informacjoma, co i kaj trzimie ta nasza dynstystka. To je bardzo ciekawy. Zawsze my obserwowaly skad co wyciagou. Takou nasza znajomou jak nous slyszala, to przezywala na nous, ze my som obczajowy, ze to ganba se tak u kogo rozglondac. 
A potyn rouz byla u dyntystki i se zastanawiala potyn przi nous, czy dyntysty kozdymu douwajom nowoo rurka do sliny, czy niy, bo ona by po jakym penerze nie chciala.
A my ji pedzialy, ze jakby trocha poobczajala, to by wiedziala, ze nasza dyntystka kozdymu douwou nowou rurka i pedzialymy ji nawet, w chtori szufloudzie jy trzimie. To byla w szoku.

Pozdrawiom

Ania