Przestrogi taneczne dlo dziouchow
A.K. 14.01.2006

Przeczytalach tekst o balach i mi sie przipomnilo pora rzeczy.
1. W tancu trza dowac pozor na chopa, z ktorym se tancuje i trza se go fest trzimac i z chudszym od siebie nie tancowac, bo idzie wylondowac na dylowce i oglondac od spodku cudze szczewiki. Ta historia ku przestrodze mi pedziala siostra od mojygo szaca. Przed wojskym byli kedys na zabawie z kolegoma, popiyli troszka, a potyn jak juz byli frech, projsiyli dziouchy do tanca. No i tak jedyn z nich poprojsiol se trocha grubszo od siebie dzioucha. Tancowol z niom ostro, obrocol i wroz dziousze se nogi zaszmatlaly od tich obrotow i straciola rownowaga. On jy nie utrzimol i padla. On jyno na nia pozaglondol i se pomyjslol: za ciynzko zejs je dzioucha, cobych cie zbiyrol i poszol, a ona zostala lezec.
Zdjecie-zrodlo: http://www.giszowiec.sewera.pl/grafa/pocztowki/big/woman.jpg

2. W tancu trza dowac pozor na oboczek chopa, z ktorym se tancuje i zani se zgodzi na taniec, trza mu kozac se obrocic wokol wlasny osi ze dwa razy. Byli my roz calom paczkom na festynie w Proszkowie. Bol z nami tyz taki znajomi, co mo odwaga do dziouchow, jak se napije. Toz poleciol se po piwo i straciyli my go z oczu. Ze dwie godziny gizda nie bylo. Naroz jo zaglondom, a on tancuje wolni konsek z fajnom laskom. I sie raduje jak nic. Tak se poleku obrocali, jak to w polekim konsku, az on bol zadkym do mnie. Jo patrza, a on mol cale galoty na zadku mokry. Tako ganba! A ta laska borouka nie wiedziala o tym i tyz zadowolono se do niygo klejyla. Dopiyro jak byla przerwa na jydnygo, se go obejrzala i juz drugi roz nie chciala z niym tancowac.
A te galoty mokry miol skuli tygo, ze siednol se na stolek, kaj  nouprzod chtojs wylol piwo.

Karlubiec, 14.01.2006

Ania