Zwon Osmy Godziny
A.K. 17.02.2006

Som miasta, chtore majom swojy symboly, jak: Krakow mo smoka, Kopynhaga – syrynka, Hammeln – Rattenfängera, Gougolin – Karolinka i Karliczka, tak Gogowek mo Zwon Osmy Godziny. Stol se symbolym, bo je zwonym wandrownikym, zwonym, chtori swojy serce zostawiol w doma i z inkszym przez duge lata wolol ludzi do kojsciola daleko od swojygo hajmatu, to zwon z regulaminym uzywaniou i w koncu zwon, chtori wrociol po blisko szejsdziesiynciu latach do dom. Bez to je mozno i nouslynniejszym zwonym na Slonsku, a jego historia dobrze znajom miyszkancy ziymi gogowiecky.
Zwon tyn zostol ufundowani przez groufa Georga III Oppersdorffa na pamiontka ofiar dzumy, chtorou nawiydziyla Gogowek w czajsie wojny trzidziestoletniy. Ekstra dlo niygo fundator kouzol postawic wieza przi kojsciele ojcow Franciszkonow w Gogowku i ustanowiol regulamin, podug chtorygo zwon miol zwonic, m.in.: kozdi dziyn o osmy rano, przed rzgmotym i na pogrzebach Oppersdorffow.

Piyrszi rouz bol odloni w Ziymbicach i wouzol dwie tony. Potyn bol przetopioni na sztyrotonowi w Nyjsie. W drugi pole XVIII wieku prawie cali Gogowek zgorol i zwon tyz uciyrpiol w tym ogniu. Kolejni rouz go odlouli w Opawie.

II wojna swiatowou byla tragicznym czasym i dlo slonskich zwonow kojscielnich. Z samygo Gogowka poura przetopiono na armaty. Zwon Osmy Godziny tyz miol podzielic jejich los. Sciongniynto go z wiezy w 1943 r. Zani opujsciol swojy miasto, stol jeszcze na placu zomkowym. Siyla ludzi szlo se tam z niym pozegnac, niechtorzi se knipsowali z niym na pamiontka, a bajtly mialy frojda, bo mogly loutac zwon oglondac.

Zwon Osmy Godziny miol szczejsciy, przetrwol zawierucha wojynnou. Poura lout po wojnie zostol znejdzoni na szrocie w Hamburgu. W 1949 r. z nowym sercym zacznal zajs ludzi wolac do kojsciola. Zwoniol z wiezy katedry we Fuldzie. Trza by tu spomniec, ze Fulda od 1955 r. mo Patenschaft nad Gogowkym. To w Fuldzie odbywaly se trefy miyszkancow Gogowka rozsionich po swiecie. A na mszou rozpoczynajoncou kozdi tref zwoniol zawsze on – Zwon Osmy Godziny. Uczestniczyli tyz w tich trefach Oppersdorffowie. Ostatni wlajsciciel zomku w Gogowku Wilhelm Hans Oppersdorff wyrajziol zyczyniy, coby po jego smierci zwon wrociol do Gogowka. W 1994 r. zaczly se starania o powrot zwonu na Slonsk. Syn Wilhelma Hansa - Hans Georg Oppersdorff uzalezniol powrot zwonu od woli bylich miyszkancow Gogowka, chtorzi osiedlyli se w Niymcach po wojnie i tyz chcieli miec konsek swojygo hajmatu u siebie. Kromie tygo trza bylo uregulowac rzecz nouwazniejszou tj. sprawy prawno-celny. To nie je tak ajnfach wojzic bez granica zwony tam a nazout.
Wszysko se jednak szczejsliwie ulozylo i Zwon Osmy Godziny w czyrwcu 2001 r. przijechol do dom. Stanal na gogowieckym rynku i jak piyrwi na plac zomkowi ludzie szli go zegnac, tak terazki ludzie przylajziyli pod ratusz go witac. 23 czyrwca bylo uroczysty prziwitaniy zwonu, wtedy tyz biskup opolski Jan Baginski go poswiynciol. Miejsionc nieskorzi Zwon Osmy Godziny wrociol na swoja wieza do kojsciola ojcow Franciszkonow, kaj bez ty wszysky lata czekalo na niygo jego sercy.

Slyszalach, ze Franciszkony pozwolajom chyntnym wlyjzc na wieza i obejrzec tyn slynni zwon.

Karlubiec, 17.02.2006

Ania

Zdjecia-zrodlo: http://www.glogowek.pl/foto