Co je grane?
20.01.2006
Znol zech kiedys tako ferajna, w kieryj sie ludzie fest pszoli. Wy padocie, co tyz takie ferajny znocie? W tyj ferajnie, lo kieryj chca losprawiac, pszoli sie ino fest na lobrozkach. No tera padocie, co Wy juz co takiego tyz zescie przerobiali? Blank nic nowego lo czym losprawiom, pra?
Zaczla sie ta ferajna niywinnie w nojlepszych czasach internetu, wtynczos sie piyniadze na akcjach zarobialo, a niy kans we robocie na szychtach. Wtynczos tyz nastala pjyrszo slonsko strona internetowo, kiero oferowala forum lozprowkowe na bazie emajli. Ja, dzisiok to kozdy szkolorz lobslimtany w pjyrszyj klasie poradzi to zbajstlowac, wtynczos to bylo jesce cos. Dosc gibko spichlo sie tam mocka slonzokow z colkiego swiata, ze USA, Nowyj Zelandi, Niymiec lebo tyz Francyji abo Kanady no i loczywiscie samiusienkiego Slonska. Jak kozdo pozondno ferajna zaczli sie te ferajniorze trefiac roz do roku we Wisle. Bolo pjyknie, az za pjyknie. Poszlo, jak zowdy na tym padolku ziymnym lo piyniadze, bo jak niy wiycie lo co idzie to zowdy lo piyniadze idzie. Ftos przekozol jakos suma na cos, a tyn drugi je chciol na cos inkszego. No choby zycie to pisalo. Dzistlo, prasklo i juz bola nowo strona internetowo. To boly czasy kaj ludzie zas na szychty lazili, bo na akcjach juz zarobiac niy bolo tak ajnfach. Tyn chop, co ta pjyrszo strona zbajstlowol, wzion i ciepnol wszystkim, a ludzie wziynli i rozbili sie na dwie kupy, tych i tamtych.
Te ze tamtymi niy godali, bo te padali co tamte som wszystkiymu winne a tamte padali, co winne som te. Czas leciol, te ino do siebie szkryflali, a tamte tyz ino do siebie, nale na inkszych forach emajlowych.
Te ludzie z tych mieli swoja strona we internecie, kiery jedyn z tych oplacol, tamte juz ino mieli swoje kolko majlowe, bo tyn chop co przejol tyn bajzel sie wkurzyl i zawar tamtyn tyn colki cyrkus. Bez winny przy tym tamte niy byli.
Forum majlowe tych zamienialo sie pomalucku we klub wzajymnyj adoracji ze rzykaniym kolka rozancowego. Jedna wada to wszystko mialo, te kiere sie na forum nojbardzij pszoli i sie cukrowali, za plecami noze szlifowali, a przodowniki rzykanio mieli nojwiynkszego diobla za skorom. Colkie generacje JPII walczyly tam ino dlo dobra sprawy, choby komunisty i swiynto inkwizycja do kupy. Te dwie instytucyje tyz ino dlo dobra sprawy walczyly, do czego to doprowadzilo dzisio wiymy. Dyc loni zowdy padali, co loni zas bydom normalni, ino swoj porzondek zaprowadzom. Stare, doswiadczone dzialacze ZOMO zaro sie chycily za wprowadzanie sondow kolezenskich, w kierych loni by pelnili funkcja syndziego, prokuratora, hausmajstra, piykorza, bankiera i bankorza we jednyj losobie. To mi sie zaro przypomino taki jedyn co padol: noze, nozyczki lostrze, krawaty wionze, usuwom cionze, lebo bol drugi taki na banhofie we katowicach co padol, walizki i kosze to ja wynosze a paryzole to ja pierdole. Zas inksze schorowane przedwczesne emeryty dzialali w podzymiu. Papiyrek sie wysiedzieli we przychodniach i szpitalach, kaj chcieli dochtorow uzdrowiynia ucyc, dopoki ich te istne na zbity pysk niy wyciepli. Nale takie ludzie to som choby tako glizda, co macki w kozdy richtung wyciongo i kieruje sprawami lod zadku. Downij to my takich ludzi zwali porucznik SB. Kozdego zno, wszystko wiy co sie na placu dzieje a zodne pierdoly go niy lominom. Takie ludzie zlego slowa ci w gymba niy pedzom, a ze zadku mosz tylek lobrobiony. Byli tyz tam ludzie, co padali jeich duperele som bezcynne i niy wolno je tam i sam pokozac. Cheba mieli recht, bo ichnych ksionzkow tyz nikt niy chiol kupowac, a zaplata dostowali w papiorze, nale swoim, drukowanym. Mozno jak by przedowali szlojdry, to by na swoje wyszli.
Pytocie sie mie, kaj ta ferajna je?
Niy moga wom pedziec, bo szanuja Wos i Wasze nerwy.
Tera chcecie wiedziec, na co wom te pierdoly zech losprawiol?
Dyc ganc zicher niy daleko lod wos, na placu, we bloku, lebo we robocie podobno ferajna juz na wos moze czekac. A dobre ludzie juz sie lo to postarajom, coby wom tylki lobrobic a ku tymu dobrze lobszmarowac, zas we niedziela bydom choby nigdy nic na suma cis....
A to wszystko wiadomo .....w slusznyj sprawie.
Autor