Moja Wiosna!!!
Hasok 21.03.2006

Byda wom chciol polosprawiac (na papiorze), jak jo  sie to dzisioj  przipominom lo moi slonskiyj, bajtlowyj wiosnie.
W zima to wiycie jak to bolo. Sanki , szlyndzuchy, hokejka, holcoki, kazlowki abo ajski, narty z beckowych desek, no i te galoty kere stoly potym pol godziny kole komina, az niy roztajaly.
Bolo pieronym fajnie, ino zimno, bo to zimy boly wtedy jak sie  patrzi. Placu mieli my tyz wiyncy. Domow do goroli jeszcze tyla niy bolo. Pol,  gorek, beszongow i zamarzniyntych stawow bolo do pierona.
My przeca przed telewizorym niy siedzieli ino zawsze na swiyrzy luft wybzli.
Miolech lo wiosnie pisac a tu zimno lod tego wspominanio az gynsi skory zech dostol.
Pamiyntom jak pomalu topniol sniyg, jak robiolo sie ciepli . Sanki holcoki i narty downo my w piwnicy , na gorze abo w jakims chlywiku schowali.
Na placu, tak my godali jak my szli kolo domu  na dwor sie bawic, bolo juz po sniegu a i ptoki juz dos fajnie cwiyrkaly, zaczynala sie pomalu moja slonsko wiosna.
Pisza moja, cieszolbych sie coby to i innych bola, ta je ale moja.
Jak pamiyntom zowdy bolo to samo. Nojpiyrw sniyg sie straciol a potym!!!
Ciekawi scie som?
Dobra powiym wom.
U nos, wtakim koncie miyndzy Chropocowym, Chorzowym i Bytoniym, a i do Piosnik mieli my niedaleko (terozki juz wiycie kaj jo miyszkol), wiosna przychodziola niy ino z tym zoltym, cieplym na niebie, klara my na to godali.
Wiosna przichodziola z KLIPOM i jak muter nom po zici loli za potrzaskane szyby w loknach.
Co to je „klipa“?
Klipom moga byc jo , inaczy slimok, dupa. Po polsku by bolo niezdara.
Klipy boly wielke, zawalate, stare i gupie tyz. Klipa bol tyn co przegrol. Ale niy  lo tych klipach, slimokach mo byc. Zniymi tysz niy  przichodziola u nos wiosna. Takich to my mieli roki colke pelno.
Ta wiosynno klipa musiala miec nojmni piync rzecy.

Po piyrwsze ta prawdziwo klipa.
Prawdziwo klipa, to bol taki naszpicowany z lobiu koncow  patyk. Bol kole 10 cm dugi i kajs 2 cm ruby, nojlepi lokrongly co sie fajnie kulol. Byly klipy roztomajte, ciynke, rube, duge, krotke, lokrongle i kanciate, spicowane i dryjowane, jak lojciec w robocie umieli tol zrobic.
Jaki fto miol patyk to go spicowol na lobu koncach i juz miol klipa.
Jak wtos bol len to czekol az przijadom kanary pucowac, tam bolo ich zowdy pelno. Poznol wtos ta swoja klipa potym , to trza jom bolo nazod dac. Niyroz to i do bitki prziszlo lo klipa.
Terozki trza by jom bolo kaj w Obiku abo we Praktikerze kupic. Downi mieli my pelno drzewa po pywnicach, chlywikach i szopkach.
Cyms trza bolo te wongle w piecu podpolic.
Teraz juz wiycie co to je klipa, ta moja klipa.
Po drugie trza bolo miec konsek deski. Nikerzy godali tyz mascica , bo my tom deskom ta klipa masciyli. Bola to deska do klipy, kajs  pol metra dugo i kolo 15 cm szyroko. A i ta narta z becki, kery my teroski niy potrzebowali, tysz bola dobro za mascica.
Po trzecie trza bolo namalowac kredom kolko. Szlo tyz kolko patykym wyszkrobac na ziymi, a lokrongle kanary tysz boly dobre. Kolko bolo mniy wiyncy na meter wielke.
Ta czworto i pionto rzec, to bolo dwoch klipow co jom chcieli grac.
Teraz wom powiem jalk sie to gralo, mozescie i sami grali.
Nojpiyrw  trza sie bolo ugodac jak bydymy grac  i do wiela. Potym bolo welowanie, fto mo piyrwszy zaczonc.
Welowali my „etne petne itd“, „ na kogo wypadlo na tego benc“, tyz bolo.
Abo welowali my kamiyniami, w to wyciong kamien przegrywol. Te szprytniejsze to mieli w kozdy rynce jeden. Niy zmiarkowols tos zawsze przegrol welunek.
Tyn co zaczynol, legnal klipa w kolku, w tym wyszkrobanym, namalowanym abo kanarze, brol deska klupnol nim w szpica klipy i....
Jak niy bol slimok, to trefiol deskom w klipa, lona podskoczola, i jak bola w lufcie to wymasciol jom na jake 20 metrow. Miol dobry szwong i sie dobrze fechtnol to nawet dali.
Slimokowi klipa podskoczola, niy trefiol w nia  i sleciala zaroz za , abo wykulala sie z kolka.
Terozki tyn drugi musiol jom ztond kaj sleciala nazod do kolka ciepnac.  Niy bolo to leko.  Wciepnol, mog teroz som jom mascic i zbiyrac punkty.
Czasym bolo tak ze jom i w lufcie sie chyciolo, mysla ta wymaszczono klipa.
Byly to fufki, te w lufcie chycone klipy.
Fufka bola piernikym wazno.
Roz ,po chycyniu klipy bol jo przi grze, dwa miolech ponkty.
Fufki chytalo sie do rynki, do lobiu ronk, do mycki, byli i take co im sie udalo gymbom chycic i do dzisiej som scyrbate.
Niy wciepnol les klipy do kolka to tyn co grol masciol jom dali 3 razy , jak nojdali lod tego kolka.
Potym musiol zgodnonc jak daleko wymasciol ta klipa lod kolka. Mog pedziec myni miol mni punktow i grol dali. Jak powiedziol wiyncy lod tego co klipa do kolka miala, to przepod. Niy miol ponktow a tyn drugi mog zaczonc grac, mascic.
Jak my sie ugodali tak my mierzyli. Abo na kroki. Abo na patyki, tymi co sie masciolo.
Przi mierzyniu patykym to pukla szlo dostac. Widac tyz bolo jak tyn patyk kozdymu do zadku ujyzdzo i lobongiym do kolka idzie, zeby te swoje ponkty pozbiyrac.
Jak sie zas na kroki mierzylo to nikerzy mieli take malutke kroczki jak junkferka, abo sie im jscac scialo, coby przi wiynkszym kroku niy popuscic.
Kozdy dowol tam juz pozor zeby go niy locyganiyli.
W to piyrwszy nabiol te ponkty, na kere my sie pryndzy ugodali, tyn wygrol.
Bola to pierzinym fajno gra. Byli my na swiyrzym lufcie, trocha my lotali, uczyli my sie rachowac a przi schylaniu i gimnastyka bola.
Uciechy tyz my mieli kupa. Sleciala klipa na chlywiki to i na dach trza bolo wlazic.
Z tym dachem to bolo fajnie jak sie z dziolchami gralo.
Boly take co sie boly tam wlyz, to my ponkty wymyslali jak diobli. Niy wierzola niech sama policzy.
Boly i take co na dach wlazioly, diobly wiynksze jak chopcy.
Niy wiym czymu ale zawsze my chcieli za niymi wlazic, nigdy piyrsze.
Pamiyntom jak dzisiej jak nikere frechowne klipy przez zamkniynte lokno do izby wlatowaly.
Som niy wiym czymu loni byli na nos potym tacy zli. Po taki frechowny klipie bolo tak cicho na placu jak by wcale dzieckow na swiecie niy bolo. Mieli spokoj , niy musieli rycec „pierzinskie najduchy, bydziecie tam cicho“.
Mogli sie ino radowac.
Byly i godne klipy.
Pamiyntom jak roz mi jedna sie zabelontala i sonsiadowi  do cieplego zuru, przez lokno wleciala.
Czymu lon sie tak potym alwrygowol do dzisiej niy wiym, popoledniu i klipa moge byc godno.
Tego wom niy musza godac jak mi muter po tym zic zerzli. Za ta klipa toch dos lanio dostol.
Jak zes klipa to dostaniesz i za klipa.
Tak widzicie zaczynala sie moja wiosna za bajtla i to rok w rok.
Jak zech juz karlus bol , to tyz my jeszcze trocha wklipa grywali.
Koniec z klipom  bol kolo maja. Potym my po polach abo za skorom  i za kolkym lotali.
Tak sie czasami mysla czymu ino na wiosna my w ta klipa grali.
Moze na polach i lonkach bolo jeszcze za mokro, moze i luft bol niy swiyzy, chorobliwy, coby jak gupki szlo lotac. Som niy wiym.
Niy wiym czymu sie to klipa nazywalo. Moze, ze te malo sprytne i niewyzgierne , te klipy, przegrywali.
Niy wiym tyz czy zescie sami w klipa grali , moze i sie inaczy nazywala ta moja klipa.
Moze scie tyz mieli tako swoja wiosna, tako jak jo, z klipom.
Jak sie to tak terozki na starosc spominom to mi placzki do loczu wylazom . Czuja tyn „swiezy slonski luft“ (musialo prawie lod Azotow zawioc) i widza jak ta moja wymaszczono klipa furgo jak jaki dziampel (wrobel) przez nasze familoki.
Dobra, klipa my pograli a tera ida.
Strachecle mom juz w kabzi ,  zaroz pudymy trowa polic. Ino zeby sie matka niy dowiedzieli bo zas bydom szmary.

Wasz KLIPA