Holda!!!
Hasok 05.04.2006

Kozdy mo jakos holda.
Roz je to holda dugow, inni majom holda pranio, jeszcze inni inne holdy. Czasym i na gowie.
Slonsk miol i mo jescze pora swoich holdow, kere pomalu abo i pryndko tracom sie ze naszego slonkego lobrozka.



Kozdo huta, kopalnia i inne fitulityngyszefty mialy swoje holdy.
Jedne na roztomajte hamozie, co to sie niy loplaciolo kedys przerobic. Inne na szlaka ze piecow, stary przerobiony piosek z lodlywni abo tymu podobne.
Gruby mialy zas swoje holdy.Na tyn reszt co go spolic niy szlo a na wiyrch bol z wonglym wyciongniynty.
Czyli kamiyn.
Holdy boly roztomajte. Boly szpicate i wysoke, boly i choby beszong ,czyli duge i tyz wysoke.
Czasym bola to staro odkrywka, kero trza bolo zasypac.
Kaj i wiela fto miol placu, tak se sypol te holdy.Coby lo natura dbac, zodyn niy myslol.
Do jednych bola ta holda wazno bo szlo tam wszystko wyciepnonc, do innych zas wazno bo szlo tam wszystko znojsc.
Do mie bola holda wazno bo bola konskym mojego dziecinstwa.
Tak jak tera dzieci przichodzom ze szkoly, siadajom do kompa i czatujom.
Idom na jaki modny tryning abo inne modne, platne czasu pyndzynie.
My ftedy zrobiyli zadanie, ciepli tasie do konta i na dwor.
Dziecka lotaly jeszcze samopas, zodyn jich tak naprowda niy pilnowol i niy dyktowol co majom robic.Ftoby zresztom bajtla na placu upilnowol, lon sie som upilnowac niy umiol.Dzisioj niy ma inaczy.
W gowie mieli my normalnie, yno to co sie samymu myslalo.
Zodno reklama nom niy dyktowala, ze yno we jednych szczewikach idzie chodzic, nojczynsci w tych nojdrozszych.
My jako bajtle nojlepi lotali po bosoku a zandale czekaly na nos schowane we piwnicy.

Jak sie yno bolo na placu, kaj dzieckow jeszcze dosc bolo, zaro sie mialo kumpla do jakis wyprawy.
Kaj idymy?
Wiadomo na holda.
Bolo to dos daleko, kajs 3 km.
Trza bolo przyns bez droga i glajzy , kaj banka jezdziola.Przeleciec colki wopyniok, kaj kedys kamiyn wapiynny do huty kopali.
Mieli my tam fajne gorki we zima na sanki i narty, te z beczki.
Potym sie szlo do Goja, kaj stare juz wypolone choldy boly.
Boly colkym lobrosniynte krzokami , kaj by tam inaczy. Juz lod 1815 roku ponoc ze “Floryntyny” tam sypali.
Jeszcze konsek i bolo sie na stary, colkym przepolony holdzie.
Miala czerwono farba i bola naszom amerykom.
Czamu amerykom?
Jak sie zolo we czasach, kaj kowbojki i ksionzki Karola Maya mialo sie we gowie, kaj kozdy miol swoj luk ze strzalami na plecach i hukol jak indianer. To bola Ameryka.
Na ty czerwony, amerykanski holdzie juz lod downa wybierali ludzie tyn przepolony czerwony zuzel.Brali go do logrodkow, coby sie alejka nim wysypac i na inne rzeczy.
Tak tyz wykopali nom pelno jam i inkszych kryjowek , coby my indianery mieli sie kaj chowac, abo robic napady z za winkla.
Jak sie tera pomysla ,jak te szczaly furgaly we lufcie, jak ze szlojdrow guzole gwizdaly, to mi mi sie zdo, co my wiyncy szczynscio jak rozumu ftedy mieli.
Dzielyli my sie na bandy i tukli, na niby tak , jak my byli z jednego placu.
Prziszli cudze to na niby sie konczolo i tukli my sie aze keros banda sie poddala abo uciykla do dom. Niyroz ze placym i jakim podbitym lokym.
No i zakladnika sie tyz czasym wziyno I kaj we chlywiku zanklo.
Czasym zawolalo sie drugi plac na pomoc, ze sonsiedniego familoka.
Colke ferie lotali my tak samopas, lod rana do lobiadu a potym do cimoka.
Zygarkow my niy mieli , cza bolo dowac pozor jak syryny na grubie abo we hucie buczaly.
Wiedzieli my ftedy ze je polednie i trza leciec do dom, abo na brama, kajs sie na lojca czekalo, coby na loda abo jaki bombon czy tyz lizok dol.
Colkimi dniami byli my na swiyzym lufcie , dziynnie trefiolo nom sie co nowego, dziynnie mieli my jakos nowo bajtlowo przigoda.
Colke ferie lotali my po holdach i lonkach, wygoniyni my byli jak psy wyscigowe.
Niy godom juz lo fusbalu.

Tym downiejszym ,plac na plac a hasioki tory.

Na holdzie bolo zawsze fajnie. Wiosnom boly piyrwsze moiki. We Lato boly bitki i kryjowki.
Na jesiyn bol gog , dziko roza, kere sie na tyj abo wino zbiyralo.
Zimom bola gorka.
Zajonce i kuropatwy boly zawsze.
A jak fajnie ptoki spiywaly.

Za tom czerwonom wypolonom holdom bola jeszcze ta nowo, czynno holda, kero sie aze pod Szombiyrki ciongla.

Na ta holda chodziolo sie niy yno bawic.
Chodziolo sie tam coby wonglo na zima dozbiyrac.
Czasym i zlomu poszukac , kery sie potym sprzedowalo, tak samo jak flaszki.
Tych lostatnich szukali my jednak po hasiokach.

Ta nowo holda, jak my godali, tyz bola pelno zycio.
Ludzi bolo tam polno.
Laziolo sie po ty holdzie z kiblym i szukalo konskow wonglo.
Pozor trza bolo dowac coby sie na dol niy slecialo po tych kamiyniach.No i za wiela smrodu niy lyklo (CO) ze ty holdy co sie colki czos tlila.

Co jakis czos wyjyzdzala ze gruby “Maszynka” ze kolybami i wysypywala swiyzy kamiyn z dolu.
Wszyscy czekali na nia.Wiedzieli przeca ze swiyzy kamiyn to bol i swiyzy wongel, kery sie tam zawsze znodlo, bo do konca niy bol przebrany.
Czasym sie i jaki zyd trefiol. Niy tyn co myslicie.
Zydkami nazywali my take wielke kawoly wonglo, co to sie i do pieca niy chcialy miescic i trza je bolo na male konski roztrzasc.
Coby ze cetnor wonglo nazbiyrac to trza bolo nikedy i colki dziyn we dwoch po t y choldzie skokac.
Choby jako kozica po gorach.
A pozor trza bolo dowac jak dioscy.
Z kozdym polnym kiblym trza bolo slyz na dol i wysypac go do miecha abo i wozka.
Czasym jak sie przi zbiyraniu bolo i zodyn kupki niy pilnowol ,to tyn wongel ze ty kupki parowol.
Na holdzie rzondziyli holdziorze. Dlo nikerych bol to ich drugi dom, kaj spali i zyli na swiyzym lufcie.
Bola to tako kupka ludzi, nikerzy godali ze to hahary, co ze tego zbiyranio i sprzedowanio wonglo zyli.
Loni piyrwsi byli przi kolybach, kaj czasym czekaly juz na nich schowane przez kolegow ze sortowni zydki.
Ruk cug wyciepli je na dol i niy musieli po holdzie skokac. Zbiyranie szlo ftedy pryndko. U nich , jak ftos niy mog som zbiyrac, szlo tyz wongel kupic.

Jak juz sie polny wozyk nazbiyralo, abo cimok sie robiol i zbiyranie szlo juz ciynzko, trza bolo tyn wozyk do dom zacis. Czasym i miech na plecach zatargac.
Lojciec ciong tyn wozyk a jo ze zadku cis . Coby mu lzy bolo.
Jak my tak do dom juz go zacisli to czowiek bol colki wykamany.
Po tych kocilebach, taki kawol cis.

Jak sie tym wozkym podjechalo pod piwnica, lotwarlo lokynko, scionglo giter i wysypalo do lokynka, jak sie godalo robota bola fertig. Tera szlo we zima do kachloka jaki kibel wiyncy ciepnonc, coby logrzoc te budy.
Czasym tzra bolo pora razy we roku lobrocic coby we zima niy zamarznonc.

Wonglo na kartki niy starczolo, na kupiynie niy zawsze boly piniondze.

Jak robota bola skonczono, znaczy sie wongle w piwnicy, wozek pozamiatany i schowany we chlywiku, mieli my fajrant.
W doma juz czekala na nos cieplo woda na piecu i wieczerzo.
Lopluskali my sie w misce, nojpiyrw do poly, potym zas nogi, wytarli, przeblykli w lachy po domu, zjedli pora sznitow chleba i do prykola.
Jak colki dziyn bol czowiek na swiyzym lufcie. Jak colki dziyn bol na lobrotach, czy to jako indianer abo pomogol lojcu wongel zbiyrac, to niy chcialo mu sie nic innego jak yno spac.
Telewizorow jeszcze niy bolo za wiela a i interese my za wielki do nich niy mieli.
Spac sie tyz wczas chodziolo, co bolo po nocach robic.
Rano zas trza bolo wczesni wstac.
Roz, coby piyrwszy byc na placu, innym razym zas piyrwszy we szkole.

Tak to mi pamulusku te bajtlowe czasy lecialy.
Roz bolo kupa smiychu, roz zas boly placzki.
Jedno bolo zawsze, zawsze sie cosik dziolo.
Zawsze nos kajs nioslo, zawsze my mieli nowe pomysly.
Zawsze jakos to bolo.
Bez komputera, bez telewizora. Jako mode niy suchali my tyz radia.
Myslicie , na pewno bolo nudno, jak nudle w loleju.
To bolo to czego my niy znali.
Nudno.
My mieli zawsze jakis pomysl, nojlepi jak matka lo tym niy wiedzieli bo szmary by boly murowane.
Tak to bolo downi, kaj zawsze sie cos dziolo.
Lo holdach by szlo wiela pisac.
Bola jeszcze jedna na Rozbarku, kero sie ciyngym polola i waglondala jak wulkan. Przinojmni w nocy.
Bola jeszcze i ta przez kero sie szlo na Kanalka kompac.
I tu zas musialy by byc szmary.

Hasok