Sikanie!!!
Hasok 16.04.2006

Nojpiyrw, jak mie matka urodziyli, toch tyz zech sikol, do pieluchy..
Tukej musieli by sie moja muter do godki w cis , abo moje lobie starsze siostry.
Wiycie jak jo sie urodzil, a bolech taki wyszkrobek, jak na slonsku godajom, to lone juz stare kamele boly i braciszka tyz musialy przewinonc.

Lo innym sikaniu chca wom napisac. Chca wom napisac jak jo sie lo moim Smiyrgusie przypominom, i jak lon sie zy mnom zmiyniol, przez te przeszlo pol wieku.

Pisza Sikanie!
U nos to niy mieli my Smiyrgusu z Dyngusem. U nos jak jo sie moga przypomniec to chodziyli my sikac.
Dziolchy niy boly tyz lone ino sikane. Co z tego ze z kibla , ale posikane.
Napewno niy wziyno sie to stond, ze moda potym prziszla na parfin.
Wiycie ze we flaszce z parfinym malo dziurka bola , no i toni tyz niy bol, to trzeba go bolo sporobliwie na kozdo niywiescio gowka siknac. Niy loc jak z konewki.
Przypominom sie tyz jak godali“ sik, sik Mariko , dej kruszonka“. Niy wiym czymu i z czego to bolo, ale mi tak po gowie chodzi.

Jak ino moga pamiynciom siyngnonc toch bol w tyn Wielkanocny Poniydzialek mokry.
Nojpiyrw w tych pieluchach, tyz lod lonio ino tego inkszego, potym tyz ale lod becynio.
Cymu lod becynio?
Malutki zech byl i bol sie lo moje siostrzycki i Mutra.
Szwagra zech miol , kuzynow pora a i chopcy z siyni tyz zawsze prziszli i poroma kiblami zawsze sikli.
Szwager, wtedy jeszcze niy, w ty samy siyni miyszkol i sztok tyz bol tyn som.
Te pierony nojpiyrw napusciyli u niego pelno kibli i gorckow wodom, potym przychodzili niby z parfinym i tak sie zaczynalo.
Jak dziolchy drzwi zankli na klucz, to lojciec chopcow i tak wpuszczol, musiol je przeca wydac.
Jedna za drugom przychodziyly w rachuba. Kibel za kiblym, Sodoma i Gomora w doma.
Jo biydny malutki trzymia sie matcyny kecki a te lejom choby gupki.Lotom lod jednego do drugego, kopia, gryza. Powiydzcie fto to tam na mie dowol pozor, chyba ino tyla zeby mi krziwdy jaki niy zrobic.
Ryku, kwiku, uciekajom jedna za drugom z izby do izby ,a ta woda za niymi jakby Aniol Stroz. Uciekac sie im i tak niy loplaciolo bo ich wszyndzie te karlusy dopadli.
Lozko, schrank, komoda , sciany czy zofa. Godom wom, wody jak w potopie.
No jeszcze te moje placzki tyn poziom podniosly.
Jak wody we wszystkich izbach niy bolo rowno z progym, to sie sikanie niy udalo.
Biydne dziolchy musialy woda szipom po colkiym miyszkaniu pryntko zbiyrac, zeby do sasiadki niy przeciyklo.
Niy miala dziolchow ino synki same, co by tam ta woda miala w taki dziyn co do roboty?
Dziwne bolo ze wszystke dziolchy w siyni na naszym sztoku miyszkaly. Jak u tych innych ino pol tego larma bolo co u nos, to sie forsztelujecie co sie zawsze wcas rano w naszy siyni dziolo.
Jak juz wody w kokotkach braklo , sikli fajnie parfinym, kwik sie straciol, chopcy dostali po jajcu- kroszonce, cos na hart i poszli .
Wszyscy byli zadowolyni. Dziolchy, bo loblone, no i chopcy. Po piyrwsze uciechy mieli kupa, po druge zas bolo lo czym godac z innymi. Jak to dziolchy kwicaly, kaj kery kero siknal i wto fajniejszo kruszonka dostol.
Chopcy poszly, to dziolchy braly sie pryntko za sprzontanie, coby do kosciola zdonzyc.
Jak juz woda bola zebrano, deliny wytarte, pranie wisialo na gorze, dziolchy sie fajnie loblokly i szly do tego kosciola.
Przewaznie daleko niy uszly. Za rogym czekali inne chopcy z placu, co to do dom niy prziszli bo lojciec ich tak dobrze niy znali.
Wiycie w doma to ino rodzina , te z siyni no i szac sikol, jak kero go juz miala.
Takim dziolchom to ciynzko bolo do kosciola zajsc. Mieli tyz szczynscie ze tuskow zodnych nie mieli , bo by im sie farba po gymbie lola a i lachy by na tym uciyrpialy.

Co jo sie wtedy lo nie naplakol, moze i niy lo nie ino tego lonio i ryku bolo mi za duzo.
Lojciec mi godali ze to yno sikanie , probowali mi to klarowac, na nic.

Dopiyro jak zech som kedys sprobowol moje siostrzycki poloc, zrozumiol zech jako to uciecha.

Tak naprowda to sie zaczlo jak zech umiol gorczek z wodom w rynce utrzimac. Wtedy zech som rod przy tym sikaniu miyszol.

Hasok