Kolko!!!
Hasok 23.08.2006

Kolko!!!
Kolko?
Kozdy wiy co to je .
To je take cos, jakbyscie tak lod rantu do srodka mierzyli, zawsze bydzie tyla samo.
Kolko je lokrongle, jak by moglo byc inaczy. No nojwazniejsze ze jak sie kolko zrobi z czegos, to jak sie lone  na storc postawi, to colkym ajnfachowo idzie kulac.
Napewno scie juz tyz cos kulali. Kozdymu sie juz zdarzolo jako koza ukulac, abo becka z zaciyrym.
Jak sie kolko kulo tyz wiycie.
Drobne piniondze som tyz lokrongle.
W tedy  jak sie tyn jedyn, lostatni mo, to sie tak na niego dowo pozor zeby yno sie kaj nie straciol.
Tak go trzymiecie uradowani,juz go mocie kaj do telefonu wsadzic, bo chcecie babie pocis ze duzo roboty mocie a tu piwsko z kolegami doicie.
I co?
Niy godejcie ze wos ftos sztuchnol, abo sie wom wydowalo ze wom ftos piwo z kufki upijo i rynka sie zatrzynsla.
Niy, to te cyganstwo i to zescie slimok!
Wy widzicie jak tyn lostatni grosz niy do tego szlica wlatuje, ino kajsik tak z boku sie lod tego aparatu lodbijo.
Kiwie wom tyn orelek krzidlami, ciepnie loczko i furgo.
Terozki wlonczocie wszystke szaltry w gowie i mocie taki  dursblik w loczach.
Klos, abo jaki inny agynt. U nich to bolo ruki zuki i zas go mieli w rynce.
Patrzicie na tego frechownego orla i godocie, juz cie mom.
Jak byscie sie terozki w zdzadelku widzieli, ta wasza wazno mina, i tyn szpanong jaki w nich bol.
Jak ze szlojdra wystrzelono idzie ta rynka do przodku, juz go mocie chycic, a lon .
Cak, lod Hyjdli bioderka sie lodbijo.
Teraz scie zblodli. Rynki niy idzie juz stopnonc i ciach jom tam po zadku.
Ta jak sie niy lodwinie i juz wom jedna przisadziola.
Wy tego niy czujecie, ino widzicie jak tyn orzelek dali tam furgo.
A tu trza przecas zadzwonic, z tom prowdom.
Drugo rynka juz w drodze, juz go prawie za logon trzimie .
Nic, ta kufka lod Francika jednak bola blizy.
Roz trefiono niy idzie jom stopnonc.
Podskoczyla jak bal przy Gogach (tako gra). Zadowolono, ze te niy nojlepsze, chszczone piwo juz sie z ni wylolo. 
Yno Tadzik, locy jakes wielke zrobiol i rycy.
-Co jo teroz slubny powiym!!
Caly biydny, piwym loblony. Tyn blank nowy szaket, co sie na loblywanie swoi nowy szteli loblyk.
Loblywanie je loblywanie, sie mysla.
To mi sie tak yno kajs wszystko jakby w piontym loku lodbiolo.
Jo dali gonia tego orelka. Widza jak go siyly lodchodzom.
Biydok, bo downo juz niy furgol, yno sie kozol w bajtliku abo kabsi nosic.
Dobrze mu tak, se mysla.
Podchodzi do londowanio.
Klupnol roz kantym w deliny, podskoczyl, klup drugi roz, udalo sie.
Wylondowol!
I tu sie zaczyno. Zaczyno sie kulac. Bo bol lokrongly.
Gzuje jak Szumacher pod tyn stol. Mysla w rombnie kaj i stanie. Moje szczynscie w tym colkim juz niyszczynsciu.
Za wcas zech sie radowol.
Locy mi na wiyrch wylazly, jak zech widziol te slalomy miyndzy stolkowymi nogami.
Patrza a tam daleko pod scianom, miyndzy dwoma szrankami, co to nog niy mieli, taki maly szlic widac.
Idom tak te locy przedymnom, a za tym orelkym co sie kulo.
Tak jak tyn orelek robiom te zakrynty .
Choc fajne frelki tam siedzialy to niy mialy sily kaj indzi bliknonc, ino ten orelek bol im wazny.
Terozki niy bolo wy mie juz nic z zodnego agynta, teroz zech miol pietra .
Pryndko jakis niydugi paciyrz.
Nic. Orelek jak po drocie kulo sie do tego szlica.
Juz bol drin.
Jo gupi zamiast locy chamowac to klup nimi w te szranki.
Niy wiym co bolo piyrwsze na wiyrchu.
Tyn spik, co mi wyskocol, abo te swiynte co mi si pokozaly. Tyn z tom dzidom bol na przodku ty procesyje.
Smierc mie powoniala, mokry zech sie coluski zrobiol. Co teroz slubny powiym.
Leza pod tymi stolkami, ganba wylyz. Ta godka jutro w robocie.
Fto mi uwierzy, ze jo yno chciol do dom zadzwonic, ze orel umi tak furgac, ze piniondz sie tak kulo?.
Co sie te ludzie pomyslom lo mie, te cudze.
Niy miolech co za dugo myslec. Juz mie tam jedyn spod tego stola ciongnie.
Rycy chobi gupi.
- Jo ci dom pieronie babom pod kecki zaglondac, lodmiyncu jedyn.
Patrza, bo locy mi nazod prziszly kaj byc majom. Richtig.
Nogi jak lod Marlyny. Chciolech jeszcze cosik innego merknonc. Niezdonzolech.
Chop mie juz wyciongnol z pod tego stola.
Tera juz po mie.
Chop pakowny, jak TIR jakis. Tyn nos. Plaskaty . Wyglondo ze w bitkach mu  go splaszczyli.
Nogle mi strach lodjyno.
Przipomniol lech sie Jyndrusia , „ Hasok, tys niy je mazok“.
Wstol zech. Gowa zech dzwignol, muskle zech napnol .
Juz zech cylowol, juz zech wiedziol kaj go rypna.
Co zrobic, synek bol gibki. Taki gospodny Cholota.
Dzwigom sie, mierza zeby mu jedna wciepnonc. Niy idzie.
Cosik mi rynce i nogi zmotlalo. Szarpia sie niy idzie. Dostol zech jeszcze pora fangow.
Widza ze sie wiynkszo chaja szykuje. Locy makom podsinione. Leza taki colki czyms lomotany, lobamoncony  i tak sie teroz w ty niyswiadomosci mysla.
Niy trza ci bolo lepi stary prowda pedziec.
Trocha by pomrancala i tyla bys jeszcze sciyrpiol.
Cuja ze wtos mie cuci, szarpie . Myslolech ze do bitki pomocy im trza.
Yno ta sztima cosik mi niy pasowala. Na babsko mi wyglondala i niy gospodowo.
Lotwiyrom pomalu loczy patrza.
Zblod zech colki. Z kond lona sie tu wziona.
Pryntko loczy zamykom, a kysz, zas lotwiyrom
To samo.
Tak sie godom, musisz jom piyrwszy zagodac.
Skond wiedzialas ze my do Nyski na piwo idymy, jo chciol do Ciebie zadzwonic, yno....
Stopnol zech. Patrza, patrzy na mie jak na gupka. Cosik tu niy pasuje
-Niy jest zes ty chory. Spoconys taki i zes sie w ta pierzina tak zawinol ze sie ruszac niy umisz.
-Musialo ci sie cosik snic, godo, bos sie ciepol jak al i rycol jak gupi.
Lotwiyrom locy. Patrza, richtig. W pierzina jak zabetonowany.Tera wiym czymuch mu loddac niy umiol.
Te stare fleki na gipsdece. Wiedziolech juz .
Jo je w doma.
Godom, nic takego. Sniolo mi sie jak my za bjtla po placu lotali. Szukac my grali. Chybach sie do pierziny schowol.
Tak sie zaroz pomyslol.
Zebys ty babo wiedziala.
Wiyncy zech niy dol po siebie znac, yno zech loblok moje lachy i poszol do roboty.
Zanim zech wyloz pytom sie slubny.
Co z tym nowym telefonym, kedy nom go w koncu zalozom.
-Mieli wczorej , yno im aparatow braklo. Godali ze za jaki tydziyn.
Wolo mi z pod pierziny.
Loblok zech sie i rwia do roboty.
Po drodze, wsadzom rynka do kapsy i zech sie pod nosym przyklon.
Kurde zas zech bajtlika zapomniol. Lezy na frizjyrce.
W kabsi zawsze zech miol jake 2 zlote do przigody, terozki tyz.
Przichodza do roboty i mi zarozki podpadlo ze cosik je inaczy.
Pytom sie Dorki co je grane.
-Nic. Tadzik stajgnol. Dzisiej idymy na biba do gospody.
Jak by mie prond kopnol.
Moj snik. Ale jo niy mom telefonu.
Niy miol zech czasu wiyncy godac yno zech sie spytol w jaki gospodzie.
Musiolech tak i tak dzisioj  w teryn.
Po poledniu, zadowolony, bo mi dzisioj dobrze poszlo, wlaza do gospody.
Z daleka mi kiwali wszystke, lostatni zech prziszol.
Dwa pryndke zech zrobiol. Colki w skowronkach.
Patrza Tadzik dowo mi jakos kartka i godo.
Jak Cie niy bolo to twoja slubno do roboty dzwoniyla, sam mosz wasz
nowy numer z domu, mosz do ni zadzwonic.
Mieliscie mie w tedy dopiyro widziec.
Bolech pryndzy na nogach jak polsko gospodarka.
Rynka do kapsy, wyciongom. Orelek!
Patrza nad stolik pod sciana.
Marlyna i chop jak szrank z plaskatym nosym.
Lap za tasia i wyrywom.
Kaj idziesz. Rycom za mnom.
Jeszcze sie na prowda niy zaczlo.
Cos zech tam mondrego lodmronknol, ze z tom kartkom to wiyncy jak wazne.
Niy slyszolech co dali godali ,zech stamtond wyrywol, az sie kurzolo.
Przesondny zech niy je, do dzisioj jednak mysla zech dobrze zrobiol.
Nawet zech slubny kwiotek z ty lokazji kupiol.
Co sie w doma dziolo, tego niy powiym.
Dowiedziol zech sie yno, ze Tyjok z gospody do slubny dzwoniol, ze niby nadgodziny robi i......

Niy cyganic chopy.
Jak wom sie cosik przysni to niy wierzcie ze sie to moze zdarzic.
Tak naprowda to chciolech lo kolku.
Calkym innym kolku.
Kedy indzi. Jak sie wom niy zmierzlo.

Hasok