Kaprysek u bauera
25.05.2007

Bolo to pora rokow tymu, to naszego Kapryska rozwierala pieronowo sila. Ja, nosz bergmon elektryk spol na nockach na dole, a bez dziyn lezol Trusi w uszach. Wkoncu slubno Kapryska tego niy strzimala i padu mu, coby sie chycil porzondnyj roboty, kaj porzondnie placom, a skoncyl juz tyn maly geltak do dom przinosic a sie do tego lobijac. Jak pech abo szczynscie chcialo, kto to wiy, akurat tej nocki Kaprysek niy przespol yno suchol jak kolegi losprawiali, ze loni jadom do bauera kole Heidelbergu i bydom tam kokosy zarobiac, a roboty je podobno malo a ku tymu bardzo lekko. To Kapryskowi gralo. Zaro to u tego kolegi nagrol, lon na zicher tam do bauera pojedzie i bydzie robil za dwoch, jak niy za trzech. Kaprysek zaro colki roczny urlop naroz wzion a sie zastrzeg ze moze jesce bydzie sie lo urlop darmowy starac. Trusia sie ucieszyla, bo baba miala nadzieja ze sie trocha dychnie. Beztoz zaczola Kapryska pakowac. Dwie pory zokow na zmiana dostol i tela tyz batkow, dyc chyba tam niy bydzie z tom hygieniom przesadzol. A wyprac dyc wszystko idzie. Dostol mycka coby klara resztki mozgu niy spolila, galoty do roboty i dwie pory koszulek. Nojwazniejsze Trusia kupila mu w przeddzien wyjazdu. A to boly biksy. Kupila je tak niyskoro, coby miol swiyze. A biksow ciongnol ze sobom jakie dwiesta. Tam boly paprykarz szczecinski, papryka w loccie, locet ze paprykom, miynso welowane, cyganiono szinka, bratheringi na kaca, sardynki we loleju, tuste na chlyb, mlyko kondynsowane i inksze szpecjaly. Bez przesady to mialo styknonc na dwa miesionce dobrego zarcio, coby niy musiol tych fajnych markow zaro we Heidelbergu na jedzynie wydowac. A dyc Kaprysek Trusie z tych zarobionych pieniedzy taki fajny malucki czyrwony autok lobiecol. No i jeszcze pelcmantyl na zima. Kaprysek spakowol to wszystko do dupnego plecaka, kiery jeszcze miol ze harcerstwa, i ruszyl na cug do Katowic. Jakby ftos sie na niego z zadku spojrzol, to by myslol ze tyn plecak Kapryska ciongnie, a niy Kaprysek tyn ruksak. Mozno bolo tyz pomyslec ze to bol plecak samobierzny! Autobus bol juz prawie co do ostatniego nafolowany, jak Kaprysek nareszcie sie zjawil. Jak tyn kierowca tyn ruksak lobocyl, to zymdlol i musieli go cucic. Niy przesadzom, ze jedna polowa rajzyndrow bez pol godziny kierowcy cucila a drugo polowa kapryskowy plecak miyndzy toboly cisla. Jak sami widzicie to ta rajza sie zaczla pod zlom gwiazdom, bo opoznienie bolo jak nic. Kierowca dostol dwa piwa w puszce na pocieszynie i ruszyl z kopyta na granico. Kajs stowac i kogos dobiyrac niy mialo synsu, bo zodyn bagaz by sie juz tam niy zmiescil, a prziczepy ze sobom niy miol. Tak przijechali za pora godzin na granico go Zgorzelca a Kaprysek ino slepia wyczeszczo, piyrszy roz w zyciu autobana lobocyl! Kierowca musiol czasu nadrobic i gnol po tych Niymcach choby gupi. Ino nosz Kaprysek miol nos lo szyba wcisnienty i pacol i gafcyl jak to w tych Richik Fajnych Niymcach to tak wyglondo. Gafcynie sie wartko skoncylo jak autobus we Heidelbergu stanol a Kaprysek bauera lobocyl a bauer Kapryska i jego toboly. Niy trza bolo wiela a by musieli bauera tyz cucic... Bauer doszol do siebie i zaklol w duchu ze tymu koledze lod Kapryska gicale z dupy powyrywo, ze mu takiego mizernioka do roboty skludzil. No ale co robic, po ptokach, jak juz sam je to sie przido, pomyslol bauer i skludzil chopow do auta rajn. Pojechali na kwatery a Kapryskek piyrszo roz zblod. Lon zasluzony bergmon PRL-u mo w czterech chopa w kontenerze i wysokich lozkach spac? A kaj som komnaty i czerwony tepich na powitanie zacnego goscia? Wtynczos cheba zaczlo Kapryskowi switac, ze lon niy przijechol sam na stale ino do roboty! Pjyrszo noc Kaprysek blank zle spol, snila mu sie slubno, jak po nim rycy, a szaloty, logorki i szpargle go po polu goniom. Lobudzil sie coly spocony po tym horrorze. Wstol, loblyk sie i wolo kaj je kawa? Slubno lod bauera zlitowala sie i w pierwszy dziyn chopy dostali po szolce kawy i sznita z tustym. To naszymu Kapryskowi gralo. Lon myslol ze to tera tak codziynnie bydzie. Kawa sie synek szluknol a tera na pole trza sie zbiyrac. Na pierwsze bauer dol boroczka do szparglow, do wyrywanio. Dosc lopornie mu to szlo. Abo za krotkie tnol abo za dugie abo tyz niy mog tych szpargli wysznupac. Bauer sie tymu styry godziny prziglondol i doszol do wniosku ze to darymny futer i przeciep chopa do sortowni. Tak sie synkowi te sortowanie tych szparglow spodobalo, ze wzion i usnol. Bauera miol pieron szczelic! Lon sie przysingnol ze jutro to Kaprysek juz ani szparglow ani sortowni niy lobocy. Synek prziszol do kontenera tak padnienty, dyc robota lon znol bez colkie zycie ale ino z lobrozkow, ze jak ta biksa lod Trusie lotwar to na siedzonco usnol. Lobudzila go slubno lod bauera, a bola to 6-to godzina rano. Kaprysek myslol ze kawa i sznita juz na niego ceko, ale kaj tam, dobre czasy sie skoncyly, tera trza bolo sie samymu szykowac. To sie naszymu synkowi fest niy widzialo. Dyc w doma tyz Trusia wszystko robi, to czamu lon mo to tera robic? Ani sie synek niy lobejrzol a kompania ruszyla na pole. Jak bauer Kapryska lobejrzol a sie wczorajszy dziyn przipomniol, to zaro boroka wysortowol. O nie ty mi juz szkody we szparagach niy narobisz ty pieronie, do ciebie mom ekstra robota. Synek dostol zadanie specjalne, dzis miol szalot z pola zbiyrac. Przinajmnij niy mog nic spaprac przi tyj robocie. Moze to sie zgadzo, ale robota sama, mu strasznie opornie szla. Jak kolegi mieli dwa botichy szalotu fertik, to nosz synek jedngo do polowy niy nafolowol. Bauera miala krew zaloc. Popoledniu bauer doszol do wniosku, ze Kaprysek i szalot to som dwa swiaty, kiere sie niy zrozumiom i dol naszego synka go erdberow, znacy sie truskawek. Chop niy wiedziol co robi. Lon mog zaro z kozla logrodnika zrobic abo z koziyj dupy rajzytasza. Kaprysek zbiyrol truskawki i to nawet wzorowo, ale co to dalo jak botich bol durs prozny. Co lon zebrol do dol rady zaro samemu zezric. Pod koniec dnia kozdy miol ze dwadziescia botichow nazbierane a Kaprysek ino trzi... Bauer myslol ze sie zesro. Ale chop porzondny i uczciwy, wiync sie pomyslol, jedna szansa jemu jeszcze dom! Kaprysek sie ino prziwlok do baraku, szast prask i spol. Lo biksach lod Trusie ani slyszec niy chciol. Na trzeci dziyn nosz boroczek juz pionto dziesienc jako pierwszy u bauera pod drzwiami stol. Som bauer sie nadziwic niy mog. A Kaprysek mu pado ze lon chce juz wyplata, bo jedzie do dom, bo jest strasznie chory i go niysamowicie krzize bolom. Bauer niy wiedziol, czy mo plakac czy sie smioc, ale dol mu geltak, tak choby na nie zarobil, a na pozegnianie mu pedziol ze mo ino jedno prosba do niego, zeby juz nigdy wiyncyj sam do roboty nie przijezdzol. Akurat ta przisiega Kaprysek dol rady do dzis dotrzimac. Trusia malo co szlag niy trefil jak lobocyla tego cudoka na wieczor w dzwierzach, auta jak niy bolo tak niy bolo, pelcmantel tyz boszol w zapomnienie, ale biksow im styklo do samego marca.

______________________________________________________>>>>>