Byzuch / na 27 maja 2006r
Ojgyn z Pniokow 27.05.2006

No, toz momy po wczorejyszym Dniu Mamulki a i chnet bydzie juz na isto szlus ze byzuchym Papiyza Benedykta XVI u nos we Polsce. Jutro kole pol losmyj na lodwieczerz bydymy Go zygnac na flugplacu we krakowskich Balicach. Fto bydzie zygnol, to bydzie, a jo to sie tam zicna gryfnie na szeslongu i wszyjsko sie gynal, direkt lobejrza we telewizyji. Chocia lostatnio to jes tak, co jo co inkszego widza a co inkszego te istne we telewizyji godajom. Miarkujecie ? Styruch chopa bajstluje jakisik protyst a te nasze mondroki godajom, co to byli „niyzliczone tlumy”, a kiej jes srogo hormijo (nikiej skuli tego nowygo ministra lod szkolorzy) to na isto godo sie, co przikwanckalo sie ino pora chopa i byli ci to jesce ... jakiesik (Ponboczku lodpusc mi tyn grzych !) geje lebo inksze pyndale. A mialo byc juz blank inakszij, miala byc ino prowda, samo prowda i – to, co juz jes na isto – gowno prowda !!! Nale, pokiel co godomy jesce lo tym naszym, lo tym gryfnym, lo tym fest zocnym Dniu Mamulki, lo kierym we tyn naszyj „panawildsteinowskij” telewizyji sie bali i niy zajonkli. A juz na som lostatek siedymnostego wiyka, kiej jesce tego swiynta niy fajrowali, Stanislaw Herakliusz Lubomirski naszkryflol ci bol telkie gryfne slowecka:
„Nie masz wdziecznosci zadnej, co by w cnocie
Zaslugom matek rowno wystarczyla.”
I jesce Jejigo pora inkszych slowecek lo tych naszych roztomiylych Maminkach, Mamach, Mamuskach, Muterkach, Mamulkach :

„O, jako bardziej matka upatruje,
W dziecie swe sercem jak okiem wlepiona!
Gdy sobie jego przyscie obiecuje,
Kazdy czas dlugi, bliska kazda strona.
Krotki to oko horyzont znajduje,
Ktore wytrzeszcza milosc rozteskniona.
Choc patrzy z wiezy, zda sie jeszcze nisko,
Bliskosc – daleko i dalekosc – blisko.”

A juzas nasz Juliusz Slowacki tyz gryfnie naszkryflol bol ci kiejsik jesce tak:
„Bo mie matka moja mila
Na slowika urodzila,
A ja wziawszy taki glos,
Ze slowika jestem kos ...”
No, niy biercie sie tego na richtik, co tam poniyftory miol byc nachtigalym a lostol ino amzelym, znacy kosym. Mie sie tyz – jesce we podstawowyj szuli u naszygo szykownego, chocia glacatego rechtora Balcarka – zdowalo, co jo lostana jakimsik Kiepurom lebo inkszym Ladyszym, nale lostol mi sie do dzisioj ino szykowny „sznapsbaryton”, kierym poradza tuplowac, basowac wszandy tam, kaj sie jesce przi gorzole wisko. Ja, kaj sie jesce wisko przi gorzole, bo terozki to jes tak, co kiej ino chopcy za tela wyslepiom, zarozki sie robi haja. Coby mie sam ino zodyn niy przeciepowol tyj ustawy lo „wychowaniu w trzyzwosci” skiz tego, co jo sam jesce cosik byda rzondziol lo gorzolecce. Nale, wrocomy sie nazod do naszych baranow.
Fto mi sam rzyknie wiela to naszych Mamulek niy poradziylo sie doczkac jejich dziecek, kiere przi tym colkim gzuciu za betkoma, przi tym wetlalfie szczurow, przi tym – nikiej to mondroki terozki rzondzom – „wyscigu szczurow”. Zdalo sie, co we tyn lonski piontek mamulki bydom mieli wiynkszyjszo uciecha, bo dziecka majom fraj we szuli nale, co mo zrobic telko mamulka, kiero musi deptac do roboty (niy jes byamtrym we miyjskim urzyndzie) a dziecka rojbrujom w doma lebo na placu kole klopsztangi ? A majglokle napoczli fest kwisc !
Jakech juz pedziol lod szczwortkowego przedpolednia jes ci u nos tyn Papiyz, kiery nastol po naszym Janie Pawle II – Benedykt XVI. Wszyjskie ci na Niygo niy poradziyli sie doczkac bele, wszyjskim idzie ino lo to, cy bydzie godol tak nikiej nasz polski Papiyz, cy bydzie bajstlowol tyz ino to, co sie bydzie zdalo naszym ze bozyj laski politykierom. Dzisioj jes sobota i Benedykt XVI jes juz trzeci dziyn sam u nos. Warszawa sie wczorej ze autoka lobejrzol, tela co ci kole zodnego naszygo dynkmalu niy zahaltowol a wszandy styrceli ludzie, coby jejigo chocia ze bliska pomacac. Lodprawiol wczorej mszo ze srogom asistom, zdziebko sie piechty pokulwitol do ludzi tela, co jo niy widziol jejich telko mocka jak to we naszyj telewizyji godali. Nalech mozno niy dowol telki pozor a te redachtory zolwizol wiedzom lepszij i widzom dalszij i wiyncyj. Bo mogecie sie forsztelowac, co jo gawca bez colki dziyn na ta telewizyjo, suchom dicht wszyjsko co tyn nowy Papiyz sam u nos we Polsce rzyknie a na lostatek telko jedna baba ze piyrszego programu TVP i tyn jedyn istny sniom (loba bezmac sie juz za zycio do niyba dostanom) godajom mi ze tego telewizyjnego lobrozka, ize „papiez KCIOL pedziec to a to. No, toz jo suchom a lone symie ynta robiom, bo rzecy jo blank bezmac niy kapuja co Papiyz godol, ino dziepiyro te dwa mondroki musieli mie wytuplikowac gynal, co tyz to kciol tyn Lojcie Swiynty pedziec. Wiycie, spomino mi sie „komuna” kiej na biole godali corne a nojlepszij to wyeklerowol bol kiejsik Laskowik we telkim wicu kaj szlo lo to, co niy jedne kolo lod cugmasziny pieron szczelol nale TRZI byli dobre. Te same, nale niy telkie same, pra?
Tak sie moge przidarzic kiej kozdy godo po swojimu i niy kce mu sie gynal posuchac drugigo i jejigo jesce ku tymu spokopic. Nikiej we tym wicu:
Syndzino do loskarzonyj:
– Wiek, adres kaj miyszko, zawod i „stan cywilny” !
Baba wszyjsko pedziala i terozki na lostatek godo :
– Wolno !!!
– Znacy panna ? – pyto syndzino.
– Niy ! Skorpion !!!
A jo, to nojbarzij mom rod jesce cosik inkszego. Szpera, wszyjskie majom fraj, wszyjskie bezmac ino na tego Papiyza niy poradziyli sie doczkac, colko telewizyjo nic ino ciyngiym Papiyz i Papiyz (trzeci program to juz blank ci nic inkszego niy pokazywol). Zodnych programow lozrywkowych, zodnyj szarpidrutowyj muzyki, nale loroz – kiejech sie tak zdziebko drzymnol, kimnol – dupno ryklama na colki karpyntel. Bo po prowdzie Papiyz jes nojwazniyjszy nale jesce wazniyjsze som betki za te wszyjskie ryklamy. To musi byc ! Bo to jes geld i tela !
A terozki mozno jesce zdziebko czegosik szpasownego, co tyz jes skuplowane ze terozki tym byzuchym Jego Swiatobliwosci Benedyktem XVI. Grajfna tak ino przodzij do starego piyrwyj. No, mozno niy tak blank do starego piyrwyj nale tak jakiesik trzidziysci pora lot tymu nazod. Przikludzali sie sam do nos ze byzuchym roztomajte sekretorze. Jakiesik Honeckery, Chruszczowy, Brezniewy i inksze loszkliwce. I zawdy wtynczos kaj lone fyrtali bola szpera na gorzola; mozno skiz tego coby ludzie ze fankami w gracach niy ryceli na nich, co tak na isto lo tych sekrytorzach miarkujom. Nale, to bolo downo. Napocznol nos nawiydzac, fest pontowol do Lojczyzny nasz Jan Pawel II. I tyz napoczli juzas te mondroki – byamtry bajstlowac szpera na gorzola, nale ino tam kaj tyn nasz Lojciec Swiynty bol. Wiela ta szpera bola we wercie to jo som uwidziol, kiej Lon bol ci kiejsik we Poznaniu a my tam mieli festelnie srogi sztand (colkie polskie hutnictwo) na tych Miyndzynarodowych Targach Poznanskich. Szpera nikiej sto dioskow nale we mojij izbie we hotylu olbry ze tego hotylowygo szynku, restolrantu przelywali ci gorzolecka do flaszek po telkim zeltrze, kiery sie „Woda Grodzisko” mianowol i niyskorzij, przi lobiedzie slepali my we malych achtlikach ta „woda mineralno” a niyskorzij wartko musieli my sie szluknonc apfelzaftu lebo tyj amerikonskij Coca-Coli coby ta gorzolecka zapic. Szpera bola, szandary i policajty niy mieli sie cego ucapic a i wszyjskie inksze tyz byli zadowolniyni. Tela, co niy szlo ci Miymcom, Austrijokom i komu tam jesce wyeklerowac po jakiymu u nos zawdy musi byc bajzel; niy moge ci sam byc „normalnie”? Nale, kiej ino Papiyz wykludziol sie ze Poznanio do Katowic szlo juz sie tyj gorzolki naslepac.
Latos momy blank inakszij. We szczwortek przifurnol przed poledniym Benedikt XVI do Warszawy. Ezli tam bola szpera, to niy miarkuja. U nos bez colki dziyn niy! We piontek wszyjskie ministerstwa, wszyjskie urzyndy panstwowe mieli fraj we robocie. Bali i tyn nowy srogi minister lod loswiaty ( lo kierym jesce we moju lonskigo roka godali co: jesce niy posel a juz kasper !) – loznojmiol dlo szkolorzy frist, znacy laba coby lone mogli we colkij Polsce kukac na mszo we Warszawie. Dziecka, nikiej to modzioki woleli gawcyc i szpilowac na tych wszyjskich komputrach i ani jejim do palicy niy wlazlo coby moglo byc inakszij. Chocia, kajniykaj katechytki dowali pozor coby dziecka niy filowali na te poseblykane baby we internycie, ino jak Ponboczek ( co jo godom, te lod katyjmusa) przikozol, gryfnie rzykali do tego nowygo Papiyza. Kiej juz ministry, byamtry we wszyjskich urzyndach i szkolorze mieli fraj to ftosik sam u nos we Chorzowie (niy godom lo inkszych miastach, bo niy miarkuja) wypokopiol coby i gospodzkim, szynkorzom, barmanom i jak tam jejich jesce niy mianowac tyz zbajstlowac srogo laba. Tela, co dziepiyro we tyn lonski piontek szucmany miyjskie tyrali lod szynku do szynku, lod knajpy do knajpy coby wszandy zakozac sprzedowanio gorzolecki. Te juzas byamtry miejskie, kiere mieli dac skozac we wszyjskich sklepach, co jes szpera, we szczwortek niy poradziyli sie dac w rzici rady a we piontek ... mieli fraj !
I niech mi sam ftosik gynal wyekleruje po jakiymu u nos na Pniokach jes szpera na gorzola wtynczos, kiej Papiyz lodprawio mszo we Warszawie a kiej juz bydzie blizyj, bo we Krakowie, we Auschwitzu, kiej bydzie sie we niydziela rychtowol do wyfurgniyncio fligrym do Rzymu ze krakowskich Balic, to szpery niy bydzie. Wiycie, jo juz ci tak gupio pomedikowol, ize ta szpera jes skiz „Dnia Mamulki”. Nalech sie cheba sam festelnie, diosecko chachnol. Chocia to mi jakosik sam niy klapowalo, zdowalo mi sie, ize jes sam we tym wszyjskim jes niyrichtik. Bo przeca jesce ku tymu telko jedna istno, pani posel wysztudiyrowala ci we Syjmie, ize tyn juzas Dziyn Dziecka, to tyz mo byc dziyn bez ankoholu, bez machmolu, bez tego slepanio. Bezmac to skuli tego, coby dziecka chocia roz we roku uwidzieli lojca trzyzwygo. To nic, ize dziyn skorzij tatulek zeprol rzic dzieciokowi a dziyn niyskorzij, dziyn po tym „trzyzwym” dniu dziecka tyn bajtel niy bydzie miol sniodania rano do szuli. To wszyjsko nic. Nojwazniyjsze, co telko gryjfini wylazla na ta syjmowo ambona i fandzolola co jeji ino na lynzyk wlazlo. A kiej sie jesce ku tymu sknoltluje tego srogigo ministra lod loswiaty, kiery prziszol na te idy coby modzioki zdowali na bezrok juz „matura” ze katyjmusu, to jak niyskorzij lojce majom wylozyc swojim dzieckom, kierym jesce niy majom co do gymby wrajzic, co to na isto jes ta colko „milosc blizniygo” ? Cosik mi sie zdowo, ize sam u nos som mondroki – nikiej to juz piyrwyj moja Starka godali – barzij papiyskie nizli som papiyz. I tu mi sie spomniol jedyn fal jesce ze czasow, kiej nasz polski Papiyz sie sam do nos przikludzol.
Styrcy telki jedyn lochlapus kole naszyj „Jozefki” i jamruje choby mu sie flaszecka szczaskala na cescie. Idzie jedyn nasz mody kapelonek, zahaltowol i pyto sie go po jakiymu lon tak wajo, tak labiydzi, tak festelnie lamynci?
– Bo jo, wiycie ksiynzulku, mom utropa. Co jo tymu naszymu nowymu Papiyzowi telkigo zlego zrobiol, ize mie tak Ponboczek skorol, co niy moga ci sie dzisioj za zdrowie tego Papiyza szluknonc ?
Mozno jo jes za tela wrazidlaty, nale kciolbych ino wiedziec ezli te sztudynty we Bytoniu, kierym Prezidynt dol kluce, szperhoki do miasta na te jejich „Juwynalia” tyz fajrowali ci wczorej lo suchym pysku?
I cosik mi sie zdo, poradza sie to gynal forsztelowac, co tyn jedyn minister, kiery mo kichol nikiej brymza lod karasola, miyszkol zawdy we telkim blank maluskim pomiyszkaniu, ize musiol wyjnsc na dwor, kiej kciol zmiynic swoji „zdanie”. A weksluje te swoji „przekonania polityczne” co pora miesiyncy, a bali i co pora tydni ... bele ino byc przi grotku, pra?
A coby mi sam zodyn niy przeciepowol, co mie sie ino gupoty trzimiom, co jo ino ze kozdygo sie nabijom, urzinom sie ze ludzi, to rzykna jesce inkszy fal:
Kole naszygo „Hyjdwigsztiftu”, kole lazarytu sam u nos we Chorzowie drugim styrcy jedyn elwer i fechciorz i tak sie do sia mamro, bucy pod fusiskiym:
– Popiyrolech wszyjskich downij we pochodzie, wyrobiolech we solidarnosciowyj „zadymie”, wyrazolech sie gryfnie we kozdyj procesyji i terozki ... wylozech na swoji !!!! Styrca ci przi hasioku i tela!

Ojgyn z Pniokow