Zielone swiatki / na 10 czerwca 2006r
Ojgyn z Pniokow 10.06.2006

No, toz momy chnet tydziyn tym szykownym Zeslaniu Ducha Swiyntego, znacy po downiyjszych Zielonych Swiontkach. Gryfne to swiynto, bo jes ci to trzeci po Wielkijnocy i po Godach – nojwazniyjszy fajer. Tyz sie je zawdy sam u nos na Slonsku i we colkij Polsce zocnie i ze srogom paradom fajrowalo. Nale, pokiel co, trza by sam cosik pedziec lo tyz gryfnym fajerze, lo telkim „Dniu Dziecka”. Bo te Zielone Swiontki, Zielonymi Swiontkami, nale we zalonski szczwortek mieli my na isto gryfny i nojszykowniyjszy dlo naszych dziecek dziyn – „Dzien Dziecka”. Tela, co to tyz bol juz przodzij, pora tydni tymu nazod jedyn telki fal ze srogim larmym, ze srogom lostudom i garusym, a lo czym joch sam niy miol przilezitosci jesce szkryflac, skuli tego dioseckiego lazarytu kaj ci mie wykludziyli.
Wiycie, jedna srogo, syjmowo „Komisja rodziny i praw kobiet” juz we piyrszym czytaniy przijyna telki projykt uchwaly, coby bola szpera na gorzola we tyn gryfny „Dziyn Dziecka”. Wypokopiola to telko istno Ana Sobecko (Lona mocka telkich jesce gupot poradzi wypokopic; to jesce niy jes szlus ze jeji knifami). I dejcie sie terozki pozor, jak ci to Lona inkszym tuplikowala choby kalymbie na szweli: „Sejm (...) ze wzgledu na szczegolna wymowe Miedzynarodowego Dnia Dziecka wzywa rzad oraz jednostki samorzadu terytorialnego (...) do ograniczenia spozycia napojow alkoholowych oraz zmniejszenia dostepnosci alkoholu w dniu 1 czerwca.” Pedziolech to po polskimu, tak jak to bolo naszkryflane we cajtongu. Kiejsik my juz mieli szpery jak przikludziol sie do nos jakisik ruski sekretorz, kiej bol za „komuny” welonek na tych nojzocniyjszych poslow ( tych wtynczos ze tyj jednyj nojbarzij hernyj i slosznyj partyji ), lebo tyz kiej nawiydzol nos nasz polski Papiyz. Nale wteda ino we tych miastach kaj Lon sie pokozol. Drugda tyz byli te szpery we niyftorych miastach, we poniykierych dziylnicach skiz „derbow” lebo skuli szpilow z gorolami ze Warszawy (na cestach, kiere wiydli na sztadion) bola ci tyz szpera, kiej trefiol jakisik fusbalszpil na kierym sie poradziyli kibice na isto festelnie prac, nale ino bez lostanie lata. Terozki bez szpery poradzom kibice jesce srogszo haja zbajstlowac, a ino policajty niy poradzom sie w dupie rady dac, bo ci muszom lobstawiac telkie „parady rownosci” i inksze telkie gupoty. A jejich minister to mo nojwazniyjszy gront: jak tu tym dochtorom we Lodzi drzistnonc – a dyrechtora, wizgyrnego chopa ze roboty wyciepnonc – coby we tym jejigo (ha, ha, ha) lazarycie MSWiA dalszij sztrejkow niy bolo. Te szpery byli i tak lo rzic loztrzas, bo kozdy lo tym wiedziol i juz przodzij sie dobrze sie zaforowol, fest nasciubiol wszyjskigo, nazamlowol za tela. I zawdy wtynczos, przi kozdej telkij szperze, wiyncyj ludzie mieli tyj lopary nizli we kozdydziyn. Przi tym wszyjskim, jesce te posly apeliyrowali do handlyrzy, coby same niy sprzedowali gorzolki ani nicego telkigo (tych co majom sztele to ci na isto psinco loblajzi) i ino ku tymu wszyjskich Polokow kabaciyli, coby tego piyrszygo czyrwiynia niy wziyni ci – nicego co ino ankoholym capi – do gymby. Przeca – podle tych poslow – iber dwa milijony dziecek zyje we familijach kaj sie festelnie gorzola slepie. Mozno to i jes prowda, nale ino tym mondrokom tam na Wiejskij sie zdo, co telko szpera poradzi przekabacic slywusa, coby razinku we tyn jedyn dziyn nicego niy szluknol. Uchwala ta wciepli na te „plynarne lobrady syjmu” i tam niy przeszla.. A przeca Polok tak by tak zawdy wszyjsko zbajstluje na lopak. Ze tego co miarkuja, to latos tyj szpery tak na isto niy bolo podle uchwaly. Chocia, miarkuja, ize we niyftorych miastach byli ci telkie wartkie i chyntliwe birgemajstry, kiere sami lod sia telko szpera loglosiyli (chocia ta uchwala tyj Sobeckij przed tym piyrszym czyrwiynia nikogo do nicego niy przimuszo), a juzas szucmany – nikiej to we tyn Dziyn Mamulki, nale bezma skiz Papiyza – tyrali lod szynku do szynku, lod skladu do skladu, coby przikozac ta ankoholowo szpera i rugowac ezli gospodzkie ci jom uwazajom. Bo przeca nojwazniyjsze jes – jak sie to ino zdo tym klukszajsrom – coby dziecka chocia roz we roku, skuli jejich „Dnia Dziecka”, przi przilezitosci jejich swiynta, lobejrzeli swojich lojcow blank trzyzbych. A widziol fto chopa, kiery colki bozy rocek duldo ta lopara, raptym w te dyrdy bol ganc monter we tyn jedyn dziyn ? Nale, coby ftos niy godol, to u nos na Pniokach piyrszego szpery niy bolo, chocia byli telkie miasta (miarkuja kiere, nale sam niy rzykna) i telkie sam dziydziny kaj zakozali slepania gorzoly... nale to bola ino jejich utropa, pra? A we syjmowym szynku gorzola sprzedowali, i to jesce wiela, tela co to bolo ci jakiesik „whisky”. I coby sam niy pedziec, to ta colko szpera na gorzola to jes jesce psinco. We Poznaniu – co godali we telewizyji – telko jejich jedna spoldziylnia uchwolola we jeji „regulaminie” i zakozala ci kurzic wszyjskim jeji „lokatorom” we loknach i na balkonach. Ludzie! Jo miarkuja co we sztrasynbance, we cugu, we tyjatrze niy idzie kurzic, nale kiej ci chop na dziewiontym sztoku niy moge zakurzic cygarety lebo fajfki bo jakisik loszkliwyj babie na dziesiontym sztoku to zawodzo! To sie juz blank we filipie niy poradzi poskludzac. Wiycie, godajom, co poraset lot tymu nazod przekludziyli naszo stolica do Warszawy tela, co ta colko „inteligyncjo” lostawiyli we Krakowie a do terozki ci jesce tych mondrych ludzi niy idzie we tyj Warszawie, posklodac do kupy, skuplowac coby tym wszyjskim nawiydzonym poradziyli pedziec: szlus, fajrant – dejcie nom juz yntlich ze tymi gupotami pokoj !
Nale, napocznolech lo tych Zielonych Swiontek. I, nikiej to mom we zwyku, musza tu przodzij rzyknonc pora powiadaczek :
„Kiej dyszcz we Zielone Swiontki, bydom ci lipne lata poczontki.”
„Ezli we Swiontki dyszcz kido, srogo biyda zapowiado.”
Nale tyz i telko:
„Mokre Swiontki, tuste Gody.”
I byc sam monter ze tymi powiarkami. A jak richtik we ta niydziela bolo to pewnikiym niyftore jesce boczom i mogom sie to ze tymi mojimi powiarkoma sknoltlowac. Chocia i to idzie wytuplikowac, kiej sie spomni inkszo powiadaczka (jo jom mom festelnie rod i niyroz zech jom sam juz wciepowol):
„Wtynczos ludzie wszyjsko zgodnom, kiej Zielone Swiontki w grudniu trefiom.”
To jes gryfne swiynto i niy ma sie co tropic tym coch przodzij pedziol, bo som rzecy na tym swiycie lo wiela, wiela szykowniyjsze. Zeslanie Ducha Swiyntego to telkie swiynto do kierego prziknoltlowali roztomajte prastare „lechickie” zwyki i wiesiynne lobrzyndy. Byli to: na Kujawach loblajzynie granic, szwelow dziydzin ze „krolewnom”, welowanie, lobiyranie kajs indzij juzas „krola pastyrzy”, lebo jesce „wolowe wiesieli”. U nos na Slonsku byli jesce bajstlowane roztomajte telkie sam przedbiyzki na koniach i tyn modziok, kiery bol piyrszy bol „krolym” a tyn lostani juzas „Rochwistym”. Niy za tela miarkuja i poradza spokopic fto, lebo co to bol tyn Rochwist, nale zdo mi sie i mom tyn zwyk festelnie rod, bo lostatnio juz kajniykaj tyz tyn zwyk jesce flyjgujom. I niy mo sam nic ku tymu ta naszo „ustawa lo wychowaniu we trzyzbosci” (co mi sam jedyn we radijoku przeciepuje) bo ci tyz zawdy, skiz tego fajeru rychtowali mocka roztomajtych napiwkow, miodunek i ... wiela, wiela inkszych telkich bralzow, tela co bez gazu. A zawdy bola ci przeca sam u nos przilezitosc, pogoda do szlukniyncio cosik gryfnego, pra? Choby nikiej we telkim falu, lo kierym zech slyszol sam u nos, kaj chopcy bez lato tyrajom po tych wszyjskich rybniokach, po wszyjskich stowach, kaj ino idzie cosik na angyla ze chrobokiym, na kyjder chycic.
Dwa sznapskamraty mieli telki zwyk, ize wiela razy kcieli sie zdziebko gorzolecki szluknonc, jedyn przilazowol do drugigo i godol, namowiol go, coby podeptali do kupy na ryby. No, toz kiejsik przilazuje jedyn, Antek Pospiych i rzondzi :
– A niy poszolbys dzisioj symnom na ryby Hajnc? Bezmac festelnie we tym naszym rybioku dzisioj bierom !
– Wiysz Antek jo bych bali i poszol, tela co mie dzisioj moja staro dozwolyla sie w doma szluknonc !!!
I tu mie sie spomniol inkszy wic. Godajom, co to jes ruski a mozebnie to niy ino ruski, nale i nasz wic, a monej i ... niy wic, ino prowda?
Bezludno wyspa a na nij lostali do kupy: Rus, Hamerikon i Zabojad. Mierznie sie jejim nikiej sto dioskow a ize wszyjskie byli rybiorze, napoczli chytac ryby. Loroz gawcom a sam chyciyla sie jejim zloto rybka, kiero – nikiej to zawdy we bojkach we zwyku – koze sie wypuscic a zbajstluje jejim trzi winszbildy, trzi zyczynio. Piyrszy godo Zabojad:
– Jo by sie tak zawinszowol cobych w te pyndy wyfuknol ze tyj wyspy, niyskorzij coby mie napoczli flyjgowac trzi abo styry gryfne dziolchy i do tego jesce jedna szykowno kista szampana.
– A jo – rzondzi Hamerykon – kciolbych tyz wartko ze tyj wyspy sie wykludzic, do tego znojsc sie zarozki we gryfnyj „agyncji towarzyskij” i kole mie, coby bola loziymbiono kista „whisky”.
– A ty cobys sie zawinszowol – pyto sie ta goldfisza tego Ruskigo?
– No, jo to bych nojprzodzij kciol colko gryfno szachtla naszyj ruskij gorzolecki...
– A co dalszij ? – niy dowo pokoj zloto rybka.
– No, a dalszij, to mozno jesce jedna kista naszyj ruskij gorzolecki, naszygo ci machmolu.
– To, to som dziepiyro dwa winszbildy – godo rybka. – A cobys sie zawinszowol na trzeci ?
– No, to mozno cobys rybecko tych dwioch, kierzy ze tyj wyspy citli, przikludziyla sam do mie nazod !!!
Zawdych sie sam miarkowol coby za tela niy repecic lo polityce. Nale, to sie niy do; ciyngiym cosik lo polityce wylejzie i niyskorzij moge byc festelno lostuda. Bo tak na isto wyboczcie mi, nale niy poradza wymiarkowac ezli to juz jes na isto ta szczworto RP abo ... bydzie jesce gorzij i mynij wicnie ? Kiejby i inakszij bolo, to tak by tak wylazuje na to, ize zycie ci nos festelnie cygani ! To ino telewizyjo (ta jedna ...ta wiycie, kiero, lod tego faterka ?) godo samo prowda ! Bo to jes na isto, tela co jo, i moje kamraty miarkujymy, ize terozki ci do rzondu wloz jedyn telki istny lo kierym godajom, co mo mo fresa chichrajoncygo sie Gargamela. Erbnol ci srogi stolek, jes ci cheba drugi lebo trzeci po tym, co to lo niym sztyjc godajom „krziwousty”. I kiej ci juz miol piyrszy roz wylazowac na ta nojwazniyjszo banka, na te „prezidium syjmu” napasztnol swoja staro:
– A narychtuj mi yntlich, a gibko, na jutro swiyze, i wybiglowane batki, bo jo ci terozki na richtik wlazuja do „elity wadzy” !!! Tak sie miarkuja coby mozno styklo tyj polityki, bo niyftore sie na mie pogorszyli, ize jo gupoty lo tym colkim Endrju ciyngiym godom. Pedziala mi sam kiejsik we szynku jedna blank szykowno kobiyta, co przeca tyn chop jes terozki jedyn ze nojmondrzyjszych we syjmie, a ino te wszyjskie profesory som ze jejich mondroscioma lo kant rzici loztrzas, bo ino ci te szkolone szklodzom tym wszyjskim, kiere sam ta naszo biydno Polska kcom przikludzic do porzondku. Idzie i tak medikowac, tela co jo ta baba miol zawdy we srogij zocy i tegoch sie po nij blank niy spodziol. Nale, kozdy miarkuje, wiy swoji i jo sam niy byda tego tuplikowol, bo to psu na buda sie zdo, pra?
No, toz terozki zdziebko ze inkszyj faski, nale ino krapka.
Napoczlo sie! Lod wczorej chopy majom bez miesionc swoji swiynto, mistrzostwa swiata we fusbalu. Terozki chopow niy idzie szterowac bo idzie loberwac. Tak sie sam miarkuja, co nojlepszij by bolo kiejby baby i dziecka poszli fort, wykludziyli sie na tyn czos ze chalpy lebo ze tyj izby kaj styrcy telewizyjor; styknie coby ino jodla i dobrygo piwa nastyklo. Nojgorzij to ci bydzie we wszyjskich chalupach na samym napoczniynciu podwiyl jesce nasze do imyntu niy wyfurgnom nazod do dom ze tych Miymiec. Kozdy kibic sam we Polsce tak sie na isto medikuje, ize nasze fusbalorze zajndom dalszij nizli we tyj Korei, kaj ci ta naszo lopakliwo gryfnioczka niy poradziyla bali naszygo „Jeszcze Polska... „ zawiskac jak ci to przinolezi. Nale jo blank w to niy wiyrza i cosik mi sie zdo, co po tych trzech szpilach gynal ci nasze fusbaloki wypyrtnom i bydom sie musieli wykludzic nazod do dom. A kiej tak jesce nasz torman bydzie puszczol telkie nudle nikiej we tym szpilu co to Wy wiycie a jo miarkuja, a nasz atak niy szczeli ani jednego tora, to Dudek do kupy ze Frankowskim bydom ci sie sam chichrac choby dwa czechmony i fajrowac bez colki miesionc. A tak na isto to my wszyjskie sam zmiarkujymy, co te srogie lobiycki i snochwianie tego siwego prezesa i naszygo wywolanego tryjnera Janasa – dziadzi wziyni. I tyz wczorej bol piyrszy szpil. Niy byda sam powtorzol co nom tuplikowali te angyjbery ze szportowych redakcjow telewizyji, bo to sie ani kupy ani dupy niy trzimalo. Jesce tych dwioch, kierzy tam ze tego szportplacu we Miymcach beralo te swoji gupoty, tuplikowali, co tak na isto to my mieli wygrac, tela, ize wiyncyj szczynscio mieli te Ekwadorczyki. Jesce na dwie minuty przed fajrantym fandzolyli, ize nasze fusbaloki poradzom te dwa tory jejim wprasknonc. Japaniec zapiskol, zaciurlikol i bolo dwa zero dlo Ekwadoru a nasze blank niyhersko slazowali ze tego miymieckigo szportplacu.
I to by bolo na dzisioj a berol nikiej zawdy we sobota

Ojgyn z Pniokow