Lipiec z gorki / na 15 lipca 2006r
Ojgyn z Pniokow 15.07.2006

No, toz momy lod jutra lipiyn ze gorki. A nasz gryfny rocek tyz juz poszol kajsik na drugo pola, przekludziol sie na tajta, kaj juz po malusku bydzie fyrtac na fajrant lata. To jesce zetrwo nale, terozki mi to tak wszyjsko drabko tyro, coch ani sie spodziol a juz mi prasklo iber szejscdziesiont lot. Nale, jo niy lo tym kciolech sam dzisioj berac.
Mieli my gryfny czyrwiyn (lostatek) i colkiym gorki lipiyn i to niy ino skuli hicy, nale i tyz beztoz, co byli mistrzostwa swiata we fusbalu. Roztomajcie ci to kibice godali, nale zodyn niy trefiol, ize to Italijoki bydom tymi „majstroma”. Ja, malo fto tak przepedziol, chocia terozki, jak godom we szynku ze kamratoma, kozdy sie zarzyko, co lon ino lo Italijokach medikowol. A psinco prowda, bo jo sie gynal to wszyjsko, co inksi godali naszkryflol we kalyndorzu i terozki na isto miarkuja fto miol prawie, a fto sie chachnol nikiej sto dioskow.
Jakech we radijoku rzondziol lonsko sobota – kiej te pierony praskali u nos na colki karpyntel, bolo festelne pieronobicie a ulicha ci bola telko, izech na isto niy poradziol nazod sie na te moje Pnioki przikludzic – niy poradziyli my sie doczkac jak ci tyz te nasze Poloki zagrajom. Ja, ja nasze Poloki ! Jo sie sam niy chachnol, bo przeca kiejby niy Poloki to by Miymce tak daleko we tych mistrzostwach niy dofyrtali, pra? A tak by tak my niy momy sie terozki cym asic. Bo kiejby Miymce byli Mistrzym Swiata, to zarozki nasze Listkiewicze – jezderkusie, to ci jes frechowny chop, kierego tyz lod zesla niy idzie lodchlastnonc ! – Janasy i inksze Grzegorze Lato (do kupy ze Piechniczkoma) godali coby tym naszym szpotlawym i zgniylym fusbalokom, i jejich ciyngiym nawalonymu tryjnerowi zarozki srogie dynkmale zrychtowac, ize przegrali ze nojlepszyjszymi. A tak co ? Ano nic! My tyz juz kiejsik erbli trzeci plac na mistrzostwach, nale wtynczos chopcy lotali a tryjner do dzisioj gawcy z wiyrchu i ino sie tropi, co wszyjskie majom polno fresa, polno gymba spominkow lo tym srogim Gorskim, tala co jeji m sie niy kce nic robic tak, jak Lon to kiejsik miarkowol. I mieli my: Miymce wklupali Portugalcykom trzi do jednygo, tela co jednego tora to sie wkulol Portugalcyk som sia. A niyskorzij bola niydziela, i jedyn jedyn (aze do lostatka dogrywki) we szpilu lo majstra tych mistrzostw miyndzy Francucoma a Italijokami. Dziepiyro na lostatek, kiej napoczli walic te elwry Italijoki wklupali Zabojadom piync torow a te lod „parle franse” ino trzi. Byli po prowdzie telkie angyjbery, mondroki – i to u naszych zurnalistow), kierzy godali kiejby tyn colki Zidan niy prasknol jednego Italijoka z „byka” we klota z piersioma, to pewnikiym by Zabojady tyn szpil wygrali. A psinco prowda ! I dejcie sie pozor ! Kiejby jo tak piznol, nikiej tyn nojlepszyjszy latosny fusbalok, kogosik na sztrece bez pyski lebo z „byka” to bych zarozki wylandowol we hereszcie. Fusbaloka wszyjskie – a nojbarzij te wszyjskie mondroki ze telewizyji – poradzom jakosik „usprawiydliwic” i wylozyc, bo bezmac ci jejimu ftosik siestra lebo mamuska lobraziol. A kiejby tak posuchac co te nasze terozki dziecka lo inkszych mamulkach i colkij familiji kamratow poradzom na szulplacu godac, to by pola naszych Chorzowiokow musialo kiblowac juz downo tymu we heresztach. Cosik lo tym miarkuja, bo bez colkie dziesiync miesiyncy suchom co tyz te dziecka we tyj mojij siedymnostce na palzie godajom... co jo fandzola – godajom ? Jak lone – a nojbarzij terozki to ci te gryfne majdle, dziolchy – poradzom sie wydziyrac i to na isto niy jes po „lacinie” cheba, co to jes ta kuchnianno „lacina”. I co sam za tela wynokwiac. Somech slyszol jak jedyn wywolany tryjner ze telkim mondrokiym zurnalistom blank slosznie typlikowali co jedyn fusbalok switnol drugigo we giyry i to bol „taktyczny faul”, znacy sie dobry, bo kajsik na polowinie szpilplacu i beztoz syndzia niy mog lodpiskac karnego, znacy elwra. Dobre, pra ? Telkie „taktyczne” switniyncie po szlapach, kiere sie niyftorym zdo a ino gupieloki tyrpiom inkszych kole tora i niy dowajom pozor, ize skuli tego moge byc tor ze elwra.
Zalonski tydziyn te srogie angyjbery i mondroki ze PSL-u zglosiyli, meldowali telki projykt ustawy lo nadgodzinach we robocie. Ludzie ! A lod kany sie lone wziyni ? Ezli lone z miesionczka slecieli? Przeca wszyjskie, kiere na grubach lebo we werku bakali miarkujom co to som „bajki” znacy nadgodziny. To dziepiyro terozki ftosik prziszol na te idy i szprynguje juz downo lozewrzite dzwiyrze ? Kaj te ludzie sie chowali bez te colkie lata ? Zodyn snich nikaj niy robiol ? Wszyjskie snich luftym zyli ? Przeca lone to majom filipy (mozgi) mo nikiej klekotki przi dzwiyrzach ze ajnfartu ! A niyskorzij sie godo co nami reskiyruje bezmac Syjm, Synat, rzond i ... inksze cyrkusowe ferajny. Mozno zdziebko za tela lo tyj polityce, nale inakszij sie niy do sam u nos nad to co terozki jes srogie lato i tyn ci terozki colki logorkowy „sezon”. I sam mom jesce jedyn telki zalonskotydniowy fal. dejcie pozor ! Jako jes roznica miyndzy ministrami Miymiec, Francji lebo Anglii ? Ano telko, co lone przilazujom na te jejich „konferyncje prasowe” co do minuty. A nasz tyn nojsrogszy minister, kiery wszyjskich kce zebrac we „kamasze”, dlo kierego zulnalisty to som „bure suki”, prziszol dziesiync minut niyskorzij chocia do tego placu, kaj mu narychtowali zurnalistow miol ino ze jejigo izby dwadziescia sekund. Toz to ci jes dziepiyro „klasa”, to ci jes na isto dupno persolna. I godol lo internycie, choby sie na tym festelnie znol. A kiej mu braklo slowecek w gymbie to miol telkigo utrzidupskigo, telkigo papagaja, co za niygo godol. Tak na isto to tyn nojsrogszy minister (niy metlac ze mi sam ze tym Rosynantym ze konskom lebom) niy poradziol ci tak na isto lodpedziec na zodne pytani. A bydzie ci Lon insztalowol tyn diosecki „internet” po wszyjskich wsiach, po roztomajtych dziydzinach tela, ize podwiyl co, ino ze autobusa. I tu nojbarzij to mi sie zdol jedyn istny, kierego sie spytala jedna gryfno zurnalistka na cescie we jednyj wsi, cy mo lon rod tyn colki „internet”.
– Ja, jo mom festelnie rod tela co ... rziknijcie mi paniczko ... a co to tak po prowdzie jes tyn colki internyt ???
A na lostatek jedna gryfno dziolcha, tyz zurnalistka spytala ci sie tego srogigo ministra, ezli te wszyjskie programy internytowe, kiere tam po wsiach zbajstlujom bydom „cynzurowane” bez Ministerstwo Edukacji ? Bo przeca we tyj naszyj szczwortyj RP niy moge byc tak co bele fto, bele kaj i bele jak pokazowol ludziom niy to co zaklepali nasze cwilingry i jejich ministry, pra? I zarozki tyz niyskorzij tyn „kamaszowy” minister pitnol do sia ze tego placu przed Ministerswtym Spraw Wewnyntrznych i Administracji, kaj mu ta „konferyncjo prasowo” przi tym blank nowym i gryfnym autobusie zbajstlowali. Szloby sam jesce mocka rzondzic, tela co zodyn tak by tak niy kce tego suchac ani cytac a te inksze, to mogom tyn cyrkus lobejrzec we kozdym dziynniku we telewizyji. Bo jesce lostatni konsek, kiery bol dlo ludzi co to majom filip, co to jesce poradzom myslec i niy majom palicy ino po to, coby jejim dyszcz niy siompioldo driny, do flakow – tyz juz ze tyj colkij wilsteinowski telewizyji wyciepli. Godom sam lo „Wielkij grze” kierom aze bez trzidziysci jedyn lot reskiyrowala Stanislawa Ryster. Tam bola srogo „klasa”. Zodno dziolcha ze ringiym we pympku by niy przeszla, tam trza bolo sie jakosik gryfnie loblyc, bo przeca to co sie mialo we filipie musialo miec jakosik roma. A i samo Rysterka, to bola jesce ze tyj zorty co naszo Krystyna Loska, lebo (fto jom jesce boczy?) Irena Dziedzic. A jo miarkuja po jakiymu. Przeca terozki klasa to jes lopolanie sie we solariom, to za srogie ancugi nikiej u tego nowygo, lod wczorej ministra, tela co lod markowygo sznajdera, cheba co staro koze deptac we ancugu zdziebko za knap jak my to uwidzieli we te nojwazniyjsze wojokowe swiynto we Warszawie. Przeca to jes niy do strowiynio dlo naszych reskiyrantow, i tych rzondowych, i tych telewizyjnych, coby bele baniorz, hajer, normalny cowiek, kiery sie poradzi cegos na zicher naumiec, miarkowol, miol wiydza winkszo nizli te, kiere sam nami reskiyrujom i kierym sie zdo co wszyjskie filipy juz pozjodali choby tyn nowy minister ze Gosiewa.
A lod wczorej momy nowy rzond. Pokiel lon ci bydzie tom naszom chudobnom Polskom reskiyrowol, to jesce loboczymy, nale podwiyl co, modzioki jesce barzij bydo pitac do Miymiec, Belgii lebo Irlandii, bo sam sie juz niy do lobstoc. Cwilingry do kupy ze Macierewiczym (ja, ja, juzas ci go kcom napytac do tego blank nowego – starego rzondu), bronotnym kowbojym lod amerikonskich bizonow „Endrju” i koniym Rosynantym (kiej juz tego jednygo mondrzyjszygo wyciepli na „komisarza” we Warszawie, niech sie tyn chop tropi ezli lostanie prezidyntym stolicy, ezli go Warszawioki wywelujom na tego nojwazniyjszego chopa we warszawskim samorzondzie lebo niy), to te ludzie pokozom ci nom chnet kaj ta kiszka rosnie. I tu mi sie spomniala bojka ... no, nozno niy tak blank bojka.
Kole naszyj „Jozefki” styrcy fechciorz, dziod, kiery i we Piekarach kole bazyliki niy roz juz fechtowol. I cosik sie tam pod fusiskiym mroncy:
– Mialo ci to byc downo, downo tymu; mialo ci to byc we telkij dalekij, dalekij dziydzinie; mialo ci to byc za siedmioma gorami i za siedmioma lasami ... nale, do pierona, po jakiymu ta biyda trefiyla razinku sam u nos ????
Wicne to mozno przodzij za tela niy bolo nale iste, richticzne. Nikiej tyn fal sam ze naszygo placu, sam kajsik ze jakisik naszyj wsiowyj dziydziny.
Przijechol ci roz do jednyj dziydziny starosta powiatowy. No i tyn fojt medikuje sie tak: tam we tym miyscie powiatowym (mozno to byli i tarnowskie Gory) to majom wszyjsko inakszij i lepszij zrychtowane. Majom juz mozno gryfne hazliki na miescie, telkie ze szajspapiorym, ze wodom i co tam jesce. Trza by sam i u nos cosik gryfnego wypokopic, coby tymu landratowi powiatowymu blank wygodzic. Napytol fojt jednego telkigo wsiowygo ipty, kozol mu styrcec kole tego hazlika ze zadku i kiej ino tyn powiatowy landrat przijndzie do tego aptrytu, to kozol mu telkim pucerym, telkim smiatkiym przejechac tam a nazod po ... no juz wiycie po cym, pra?
No, nie zetrwalo wiela kiej tyn starosta, tyn landrat – po szykownym i fetownym lobiedzie u fojta, nikiej to zawdy na delegacyji – musiol wartko deptac na strona bo go festelnie zamorzilo. Sciep galoty, zicnol sie paradnie i wali choby ze harmaty. A tu loroz cosik mu po rzici majto. Wyprosciol sie, zadziwol festelnie co tyz to za fizymatynta, za dinkse majom we tyj wsi. Zgibol sie i kuknol ci tak do zadku a sam loroz majt, majt mu lapom lebo smiatkiym bez gymba.
I niy bolo by to mozno telkie szpasowne kiejby niy to, ize wiela naszych angyjberow niy za tela miarkuje co i do cego jes, kiere wichajstry som do rzici, kiere do cego inkszego, kierom gracom trza sie prziwitac i fto ta graca mo piyrszy wyciongnonc. Cy angiylskij krolowyj sie graca dowo lebo cy nasz chop jes wazniyjszy nizli Angela Merkel ze Miymiec (wiycie, lo co idzie, pra?).
Lonski tydziyn spomniolech lo Majorce, a tak na isto nojprzodzij kciolech zdziebko polozprawiac lo Hiszpanii. Gryfnych pora lot tymu nazod byli my ze mojom Elzom we Hiszpanii, we telkij dziydzinie, kiero sie Calella mianowala.
A do kupy ze tom Hiszpaniom to jes Majorka, jedna ze jeji wysp, kiere sie Baleary mianujom. Mom ci jedna somsiodka, kieryj gawca do lokna, kiero tyz niy pedziala, co bola na Majorce ino sie kwolyla, ize feryje miala na Balearach. Pra, jak to sie sucho; choby bola na Karaibach, Kanarach lebo jesce barzij egzotycznie (egzotisz – nikiej Miymce godajom). A hica tyz tam bola telko, ize cowiek chnet by sie blank loztopiol i lostala by sniego ino goma z batkow. I to i we Hiszpanii i na tyj Majorce, chocia niy we tym samym roku. Gorko, hica, nale we monastyrze na Montserrat bolo tak gryfnie nikiej u nos na podzim we Zakopanym lebo kajs we Bieszczadach. Nale, to mozno dziepiyro juzas za tydziyn byda rzondziol a terozki jesce ino jedyn fal, kiery mi sie przi tyj hicy (niy latos, niy; zdziebko lot tymu nazod) przidarzol. Gyburstak mojigo kamrata, mocka przocieli, kamratow i kamratki. Jo ze mojom Elzom do kupy, zdziebko sie tam szlukomy (mozno jo niy ino deczko?) i loroz babeczka tego mojigo kamrata, kiery fajrowol tyn jejigo gyburstak chyciyla ci mie za yrmel, za rynkow i smycy ci mie do lostatnij izby we tym pomiyszkaniu. Tam ci sie ciepla na mie, napoczla mie kusikowac, loblopiac i chnet by my na prykolu wylandowali. Jo sie spamiymtol i rzondza, co lona przeca mo swojigo chopa, jo tyz jes zyniaty i ... jak to tak idzie? A lona na to:
– Przeca niy ma telkigo wagona we cugu, kierego by niy szlo lodkuplowac i tak na isto wyprzongnonc !!!
Jesce na lostatek. Jest telko gryfno naszo slonsko spiywka lo tyj gryfnyj wyspie, lo Mallorce. I chocia niy idzie tam we tyj spiywce uslyszec zodnyj muzyki naszygo Fryca Chopina to kiej my byli we telkij dziydzinie Valldemosa, jeigo klawiyr som grol ... abo nom sie tak zdalo. Tela ino, co zodyn tam niy slepol telkigo sznapsa, kiery sie „malibu” mianowol. nale, to juz jes „licentia poetica” tego, fto ta spiywka naszkryfol. Ale, jakech juz pedziol, lo tym mozno kiej indzij a terozki to bych tak pedziol co to je na dzisioj a berol, wynokwiol lo polityce, nikiej we kozdo sobota

Ojgyn z Pniokow