Logorcanny czos? / na 22 lipca 2006r
Ojgyn z Pniokow 22.07.2006

No, toz momy tyn „sezon” logorkowy fol... a tak na isto, co jo godom ? Przeca u nos sam we Polsce telkigo sezona niy ma, bo te nasze prowajdery tela nom sam bez te lato bajstlujom roztomajtych fali, ize cowiek niy mo bali i czasu na to, coby mu sie cniylo i coby sznupol we telewizyji za jakimsik stworami, utopkami lebo cym tam jesce. Choby ino te nowe rzondy, te nowe-stare chopy lod reskiyrowania we Polsce wszyjskim i nicym, choby tyz te ino „matury”, kiere ci wypokopiol tyn rzondowy Rosynant, tyn minister lod sciepowania lobrozkow. A jesce ku tymu momy przeca dzisioj tyn dziyn, kiery sie mianowol „E.Wedel”, piyrwyj „22 Lipca” ... lebo tak jakosik na lopach. Tak poranoscie lot tymu nazod to by bol na isto gryfny fajer we naszym panaziyntkowym Parku Kultury. Tym barzij, co latos te swiynto trefiolo nom we sobota. Modzioki, i niy ino, mieli by uciechy aze ze dwa miechy bez colko noc i jesce poprawiny we niydziela. Nale – jak to te nasze Pepiki godajom – „ to se ne wrati” i tela. A jesce, coby bolo szpasownij to te ci niyftore angyjbery, mondroki we tym naszym Syjmie wypokopiyli, coby tyn dziyn jesce mianowac nikiej: „Narodowy Dzien Pamieci Ofiar Komunizmu”. Ludzie, ludzie, przeca to juz na isto do filipa niy idzie nafolowac. I juzas bydzie ci to przilezitosc coby rychtowac dynkmale, sztalowac wojokow na koniach i we tych paradnych mundurach, i wiskac to, co niyftore blank niy poradzom spiywac, znacy hymn polski (no, no, godom sam ino lo tyj gryfnioczce Edycie Gorniak. Ja, jo miarkuja, co skuli tyj nowyj giertychowskij Historii Polski tego dnia blank we kalyndorzu niy bolo a ino te gizdy „komuchy” robiyli ludziom kyjza ze filipa, co to bezmac wtynczos, we tym styrdziestym szczwortym roku my do kupy ze Ruskimi wyciepli Miymcow ze Polski i loglosiyli, co my som juz sam nazod na swojim. I tu mi sie jesce spomnialo nikiej to dwa stare knakry styrceli na winklu naszyj Krojcki i jedyn snich godo:
– Wiysz Ernst, lod kiej jo terozki ciyngiym deptom, lajza na te „jedynie sluszne” manifystacje, to jo juz blank niy jes zech we sztichu, niy mom juz turbacyji z rana ze sraniym i ze jscaniym !
I sam juzas sztimuje mi jedyn telki fal. Prziszol chop do planeciorki, do wrozki. Bol tak kole piyncdziesiont lot stary i pyto sie jom, co tyz mu jesce sie terozki we zywobyciu rychtuje?
Ta planeciora poklodo karty i tak po lekusku, lopaternie godo:
– Ano, bydziesz ty wolany do tego srogigo IPN-nu.
– Jezderkusie, jo ? A po jakiymu ? Przeca jo tam robia i ciyngiym sznupia za tymi agyntoma, kierych bezmac jes sam u nos we Polsce iber dwadziescia milijonow, a terozki mie jesce tam napytajom ? Skuli cego?
Ja, jo miarkuja coby sam Wom terozki bez lato barzij wice klapowali, nale to co sie sam u nos latos dzieje to sie niy do lopedziec; telkich wicow zodyn Kristof Piasecki lebo kabaret „Ani mru mru” by niy wypokopiol (coby niy godac sam lo Pietrzaku, kiery juz nic krom pociorkow do naszych przenojswiyntszych Jurkow lebo Markow tyz niy wymedikuje). Toz to jes jedyn srogi cyrkus tela, co niy jes to szykowny, gryfny Cyrk Zalewskich, pra ? Jo to sie sam juz downo tymu slubiol, snochwiol co byda jak nojmynij godol lo polityce. Nale, to sie niy do. Dejcie sie pozor! We strzoda wszyjskie my niy poradziyli sie doczkac (no, dobra, pewnikiym niy wszyjskie, bo ludzie juz majom polno rzic tych wszyjskich rzondow bez te sam lostatnie szesnoscie lot) co nom tyz to rzyknie tyn nasz nowy Prymier we tym jejigo „expose” ? No, i doczkali my sie. Godol bez szkartki colkie poltora godziny i co ? Ano, tela cochmy uslyszeli, ize bydymy mieli juzas „sukses”, momy rzond nadziyi, bydymy mieli blank nowe napoczniyncie... bydzie jesce LEPSZIJ ! A niyftore loszkliwce godajom co ... my juz mieli lepszij ! Tela, co niyskorzij wyloz na ta ambona tyn colki Rosynant. I jak to mo we zwyku, fandzolol nom co to jedyn ze tych cwilingrow blank niy pedziol – co to niy jes „kontynuacjo”, bo lon wiy lepszij: bo to ci jes „program przelomu”. Lon zawdy nom sam tuplikowol, co ino Lon wiy blank gynal fto co godo; kiej nasz Lojciec Swiynty cosik sam we Polsce abo we kozaniu niydziylnym we Watikanie pedziol, to lon nom to eklerowol na nasze, bo przeca wiy zawdy lepszij. Toz momy „rzond „kontynuacji” lebo rzond „przelomu” ? Jo niy miarkuja. Nale, niy byda sam switol tego, kiery juz slegnol, tego co ino terozki jesce dziyrzy sie tego rzondu do kierego sie bez cufal prziflostrowol, bo kiej by bol terozki juz welonek, to by ci go ludzie wyciepli na hasiok, lebo jesce kaj indzij – do belowy.
Godol nasz nowy Prymier: lobiecujymy „sukces”, my som skozane na „sukces”! A wiela to juz razy bez colkie moje szejscdziesiynciolytnie zywobycie to mi inksze snochwiali? Snochwiol mi to downij Gomolka, niyskorzij Giereki i jejigo gryfne kamraty-angyjbery, choby tyn Szczepanski i wszyjskie inksze jesce utrzidubskie. Snochwiol mi to i Buzek, i – aze do lonskigo roka – Miller, i latos nojprzodzij tyn ci blank szykowny Marcinkiewicz a tera ta jedna pola tego nowygo rzondzynio, tyn isty cwilinger bez tyj kurzowki, bez tego lyjberfleka na fresie. Kcymy byc sam przeca rzondym „nadziei” (tak godol, ja, tak godol !). Nale wiela to trza miec lot coby ciyngiym miec ta nadzieja ? Bo jo, i te moje kamraty pynzjonisty ze winkla naszyj Krojcki, juz jeji blank niy momy. Nale, co majom pedziec modzioki, kiere juz som ucone, po sztudjach i co tam jesce (mozno i bali i te latosne modzioki po tych colkich ci giertychowskich „maturach”). I juzas mi, i niy ino mi, sie godo, co to jes blank nowe napoczniyncie. A wiela to jesce razy bydymy jesce lod samego przodku napoczynac ?
I mozno bych tego sam wszyjskigo przodzij niy szkryflol i niy godol, nale chnet by mi gybis wyfuknol ze gymby a mojij Elzie goma we batkach niy praskla, kiej my uslyszeli (i we internycie przeczytali), ize na szczwortek wymiarkowali te ze tyj nojwazniyjszyj partyji, te ze tego PiS-u (godom gynal, coby mi sam juzas ftosik niy przeciepowol, co jo to inkszym prziszkryflol) narychtowali, zbajstlowali we syjmie mszo ze srogom asistom skuli tego coby nom sam we Polsce yntlich sleciol ci tyn dyszcz, zrobiyla sie ulicha. Ludzie, przeca to jes urzinanie sie, nabijanie sie ze naszyj szykownyj i zocnyj wiary ! Kiej to moja Swiekra uslyszala, a jes ci Lona festelno katolicka, to malo jom pieron niy prasknol. A co niyskorzij godala lo tym, to sam niy moga pedziec, bo by mie zarozki ze tego radijoka wyciepli na zbity pychol. I fto to robi ? Nojbarzij kosciylne partyje. Moja Swiekra zawdy festelnie rzyko, kiej jes srogie pieronobicie, kiej jes ci na isto srogo sumeryjo. Porozzygo wszyjskie we chalupie swiycki, gromnicki i .... rzyko. I gryfnie, tela co to niy jes na slypiach colkij Ojropy, bo przeca inksze sie ze tego chichrajom. Mozno niy majom prawie, nale terozki we dwadziestym piyrszym wiyku, to niy po rzykaniu slatuje na ziymia dysc. A mozno by tak sam jakigosik planetnika napytac, kiery by tyn dysc, ta colko ulicha przikludziol ? Kiejby tak medikowac to idzie jesce we tym Syjmie zrychtowac mszo, coby nom ftosik sprawiol te lobiycki, te colkie trzi milijony pomiyszkanio dlo naszych, tych modych, Polokow, kiere pitajom terozki do Irlandii, Londynu lebo do Miymiec, a kierym sie durch snochwio, ize styknie miec piyncset zlociokow kozdy miesionc i juz styry izby ze kuchyniom bydom ci jejich. Styknie tyz jesce jedna srogo mszo ze asistom i juz bydymy mieli nikiej we Miymcach gryfne, szykowne altobany ze kierych piyrsze sto kilomyjtrow bydom chnet (mozno chnet) lotwiyrac latos ze srogim pokropkiym a kiere napoczli ci rychtowac han kiejs tam downo, co zodyn juz niy boczy kiej.
I wiycie, trza by sam jesce (bo to tyz bola lo tym godka we strzoda we tym naszym Syjmie) corozki barzij skuplowac sie ze Afrikom, kiej niy poradzymy sie dogodac ani ze Miymcami, ani ze Ruskimi, bo lone wszyjskie majom nos we rzici. I kiej ci nom sie niy zdo, ize som na tym swiycie inksze ludzie, kiere nojprzodzij gawcom ino na swoji interesy a niyskorzij dziepiyro miarkujom na jejich „historyczne” boloki; te boloki, kierych my momy mocka, kiere nom ciyngiym lodbiyrajom, i ci sztyjc nom sie zdo, co wszyjskie muszom tak wajac nikiej my, wszyjskie muszom miarkowac po jednakich pijondzach nikiej my. Tak, choby zodyn we tyj Ojropie niy miol jejigo utropy i ... kiery niy piere sie do Iraku lebo wkludzi sie jesce mozno kaj indzij (do Iranu) nikiej MY, srogie „mocarstwo swiatowe” !
Bo ze tyj Afriki – nale tyz lod Rusa, lod jejigo Sybirokow” – szloby sam do nos przikludzic pora, poranoscie szamanow, kierzy by to wszyjsko, co nos boli, kierzy by wszyjsko to, co same niy poradzymy zbajstlowac i zrychtowac, ze tymi jejimi fajfkoma, ze jejimi blanderoma i ziylskowym swondym – nom by narychtowali. I te nowe trzi milijony pomiyszkanio, i te nowe altobany, i te nowe arbajtplace dlo tych naszych modziokow, coby lone niy musieli citac kajsik do tyj Ojropy, i wszyjsko inksze, krom nowyj szuli, nowyj historyji Polski, nowyj, giertychowskij matury dlo tych, kierym sie niy kcialo wszyjsko gynal bez rok szkolny naumiec. A to jes myjglich. Bo mi sie sam terozki spomniol jedyn telki wic (mozno to juz niy szpas ino na isto prowda ?).
Kajsik we Africe zakcialo sie jednymu „kacykowi”, co boloby ci bolo gryfnie, kiej by jejigo Nyjgry poradziyli cosik wygrac we fusbalu, na „mundialu”. Medikowol, fest miarkowol, aze wypokopiol, co zafurgnie fligrym do Anglikow i tam wyhledo, wycichtuje jak tyz to te Angole robiom, ize tela razy bele kaj i ze wszyjskimi ci wygrywajom. Jak pedziol, tak zrobiol. Zafurgnol do tego Londynu, lajstnol sie gryfny listek na szpil i zicnol sie na swojim placu juz jakiesik pol godziny skorzij. Lobejrzol tak pora tych szpilow i pokwanckol sie nazod do tyj jejigo gorkij Afriki. Zwolol tych swojich wszyjskich nojwazniyjszych we tyj jejigo dziydzinie i tak ci tam napocznol rzondzic:
– Wiycie, bolech we tyj dziydzinie kaj nojlepszij grajom (no, krom Italijokow) tyn fusbal. Przikludziyli ci mie na tyn jejich szpilplac (miana niy bocza), zicnolech sie gryfnie – a klara blynduje nikiej sam u nos we Africe – i niy poradza sie doczkac, coby lobejrzec tych nojwizgyrniyjszych anglickich fusbalokow.
– No i, no i – niy poradzom sie doczkac te jejigo wszyjskie przociele i familijanty afrikanskie.
– Ano, nic. Loroz wypyrtajom na tyn szulplac jedne telkie ci we tych bronotnych hymdach i drugie we – modrych. Jes jejich do kupy dwadziescia dwioch. A na som lostatek wylazuje jedyn we corno-biolyj hymdzie, telki ichni „szaman”, depto na pojstrzodek, gawcy tak na lewo i prawo zajta, biere sie gryfno piscolka do gymby, kuko na weker, na telki jejigo szwajcarski buksiok i ....
– I co, i co ? – wszyjskie juz Nyjgry niy poradzom przi tyj gorkij klarze szczimac.
– No, toz lon jesce roz kuknol na lewo zajta, pogawcol sie na prawo zajta, jesce roz tyz na pojstrzodek. Nasztalowol tego bala na telkim biolym fleku i ... zapiskol !!!
– Ja, i co, co niyskorzij? – pytajom sie go te Afrikanery.
– I sam ... loroz napocznol gichac z niyba dyszcz !!! Ulicha nikiej stodioskow, nikiej zawdy to u Anglikow.
Nale, tu mi sam gynal leje telko godka dwioch handlyrzy ze mojij Krojcki. Niy godom kierych, bo mozno by sie jesce na mie pogorszyli. Jedyn snich sztopnol na sztrece drugigo i napoczyno:
– No, kuknij ino, do cego to juz terozki we tyj naszyj Polsce prziszlo, hica nikiej sto dioskow, wszyjskie klijynty sie kajsik do gorkich krajow wyklydziyli, te modzioki citli na robota do Irlandii lebo kajsik indzij, bele daleko lod nos, colki ruch we tym naszym interesie blank umrzitnol, kozdy dziyn trza do kasy doklodac (a ze pynzyji juzas ludziom tyz kcom zebrac). Toz to pieronski czos.
– Ja, tu mosz prawie – godo tyn drugi, kierymu bolo na miano Hanys.
– Rzyknij mi Hans – godo tyn piyrszy (ta piyrszo, bo to bola handlyra) – cy moge byc jesce cosik gorszyjszego ?
– Ja – stynknol Hanys – .... siyrpiyn !!!
I tak na som lostatek, no chnet lostatek, fajrant dzisiyjszygo fandzolynio. Mieli my we lostatnich latach i staro matura, i nowo matura, i „giertychowsko” matura. A jo ino sie tropia i niy poradza spokopic. Mo byc na maturze katyjmus? Mo byc. A co, kiej jakisik modziok tego katyjmusa niy zdo na maturze ? Tyz mu Rosynant do ci ta matura? A matymatyka, znacy rachowanie, to juz kozdymu ze tych angyjberow w dupie lezy. A tyn swiynty Mikoloj lod loswiaty moge ci jesce wypokopic cosik telkigo, ize idzie skuplowac chymio do kupy ze spiywym. Przeca chymii tak na isto zodyn szkolorz niy ciyrpi, moge niy zdac na maturze a spiyw, spiywki – jake to jes gryfne, pra? I tyz matura, a bali kiej sie jeji niy zdo, to zolwizol tyn cajgnist maturalny sie erbnie. I do przodku, i do Ojropy !!!
Nale, coby niy bolo tak szpasownie. lebo – dlo inkszych – markotnie, moga sam rzyknonc za Clausym Christianym Malzahnym ze cajtonga „Der Spiegel”, ize Poloki zawdy som mondrzyjsze nizli jejich rzondy. Bo te co noma reskiyrujom, blank, nale to blank niy miarkujom, co historio zawdy sie tupluje, powtorzo i – jak szkryflol to Karol Marks – za piyrszom razom jes to srogo tragedyjo, nale juz za drugom razom – „farsa”, srogi szpil i wic ! I terozki juz cheba na zicher szlus tego wynokwianio, i ino jedyn jesce wic (a mozno niy ino wic?):
– Suchej ino Antek! A po jakiymu ty terozki nic niy godosz, mrolowato, uwziyncie nic niy godosz ???
– Ano, bo Antek – lodpedziol za niygo jedyn telki „prezes” – godo ci ino to, co medikuje, to co mysli; i pewnikiym tela z tego jes !
I mozno cosik wicnygo jesce przi tych szamanach i inkszych cudokach.
Dwa duchy: glacatego Antka i Hajny wylejzli za kiyrchowny ajnfart przi naszyj „Barborce”. Stol ci tam gryfny motocykel, honda.
– Kuknij Hajna, nale gryfny tyn motocykel. Za naszych czasow telkich wartkich to jesce niy bolo.
– No, toz rzyknij ino Antek, przeca niy wadzi sie nom tym motoradym karnonc zdziebko po Chorzowie? – pedziol na to Hajna.
– Niy jes ci to telkie gupie, nale jo musza przodzij sie jesce wrocic sie nazod do „dom” a ty go mogesz bez tyn czos lozkulac zarozki.
Niy zetrwalo jakiesik piync minutek i Antek (za zycio kopidol i rychtowol dynkmale na kiyrchowach) bol juz nazod tela, co miol pod parzom smyntorzowe dynkmale.
– A po pieronie wziones ze sia te nagrobne platy? – pyto sie go hajna.
– Po jakiymu, po czamu? Przeca jo bez papiorow nikaj ze chalupy niy wylazuja !!!
I to by mozno bolo na dzisioj, wyboczcie coch wynokwiol dzisioj za tela lo polityce, nale – jak to mondroki godajom – niy przijndziesz ty do polityki , to polityka przikludzi sie do cia. No, a berol, fandzolol nikiej we kozdo sobota

Ojgyn z Pniokow