Agynty / na 29 lipca 2006r
Ojgyn z Pniokow 29.07.2006

No, toz momy tyn gorki miesionc, tyn lipiyn chnet forbaj, chnetki zbyte. Rzecy miesonc logorcanny, miesionc we kierym nos stwora, telki tojfel ze Loch Ness ino strachuje, nale sam u nos to jesce tyn srogi Rosynant lod loswiaty, kiery ciyngiym cosik nowygo wynokwio. I mozno niy bolo by terozki te lato telkie szpasowne, kiejby niy nasze mondroki policajty. Ja, policajty. Bo dejcie sie pozor ! Zalonskigo roka, we 2004, szkryflolech sam mocka lo jednym telkim srogim swiyntym, no juz mozno niy telkim juzas srogim, bo ci Go Watykan wyciep ze tego listka naszych swiyntych jesce we 69 roku naszyj ery – lo swiyntym Krzysztofie. Legyndy, bery i inksze tam powiarki som na isto gryfne, i ludziom sie mocka przidowajom, tela, coby ze tego niy bajstlowac jakisik juzas nowych lobrzyndow. Lonsko niydziela, hica nikiej sto dioskow, filip gorki, ize blank juz cowiekowi sie medikowac lo nicym niy kce, nale jedyn lebo dwa „dziynniki” trza lobejrzec coby sie gynal juz miarkowac, co tyz nom jesce te nasze mondroki, te wszyjski srogie – nikiej Przemko z Gosiewa – angyjbery jesce sam bez te lato wypokopiom. I suchejcie! Kukom, tak kukom, gawca bo kca wiedziec wiela to tyz juzas porachowali u nos zatrzasniyntych szoferokow, a tych co na motorcyklach sztyjc i gibko tyrajom ( jak to ci lo nich godajom – „dawcow narzondow”) sie kajsik do rantu wkarowalo a ... sam loroz ... policajt. Wysztiglowany choby ficywyrt we Boze Cialo, zasztopowol jednego we telkim srogim gryfnym miymieckim altoku i ... niy koze mu duc we tyn „alkomat” ino ... dowo mu lobrozek swiyntego Krzysztofa !!! Gryfnie, tela, ize jo tak sie medikuja, co to niy jes telkie iptowate, niy jes telkie fimlowate. Bo tak na isto lepszij sie yntom robic i lozdowac lobrozki nizli nikiej tyn downiyjszy dugi a szlangowaty wicyprymier Pohl snochwiac, co sie jakiesik tam altobany we Polsce sprawi. A lotwiyrali zeszly tydziyn ze srogim pokropkiym konsek (jakesik tam 102 kilomyjtry) blank nowyj autobany i tyn dupny minister ze Piekor isto snochwiol nom co do 2010 roka bydzie mozno jesce ze dwiesta kilomyjtrow. Miarkujecie ? Colkie dwiesta. Tak idzie do usranyj smiyrci bajstlowac a lostatka zodyn, kiery mo terozki dziepiyro piync lot, niy lobejrzi. Tela, co mozno jejigo tego ministra ci juz pewnikiym niy bydzie a tyn co po niym sie wkludzi do tego ministyrstwa juzas bydzie co inkszego tyz snowiol. Bo terozki idzie wszyjsko ludziom ubzdac, bo przi tyj, juz poranoscietydniowyj hicy zodyn juz na trzyzbo niy miarkuje, skuli tego co mu klara juz do imyntu filipa zgorala i we kujza zwekslowala.
A sam jesce szpas i wicne fale u nos, we Polsce. Bo posuchejcie ino! Nale cyrkus! We zalonski piontek niyftore posly juz sie wykludziyli na wywczasy a sam mocka glosowanio na kierym niy styklo tych poslow ze tyj nojwazniyjszyj partyji i jejich przichlastkow lod bronotnego Endrju i tego nojsrogszego Rosynanta. A te inksze posly chocia na tych swojich zeslach zicowali, udowali co jejich niy ma. Skuli tego tyn co to niy mo dwa miana (Marek lebo Jurek) gawcol, kukol a sam ci niy majom tego colkigo „quorum”. Napoczli glingac bele kaj i na gwolt skludzac tych, co juz sie kajsik na wywczasy wybrali, nazod do syjmu. Jedyn, tyn nojbarzij do terozka loszkliwy, kiery zawdy ino fermynt siyje, po kierym jes ino festelne gurglowanie, a kierymu „Polityka” ze tego tydnia dala gryfno cerwiono szkartka, to bali zarozki ci i fligrym przifurgnol ze Gdanska. No, i nasciubiyli tela swojich, coby szlo, coby nastyklo wszyjsko we tym syjmie prziklepac, i tela.
I coby sam niy godac, spomniec jesce roz musza, ize lonski tydziyn godolech lo tyj srogij mszy ze asistom, kiero sie zawinszowali te ze tego PiS-u. I mozno by i tyn dyszcz yntlich sleciol (u nos na Pniokach we piontek – dziyn niyskorzi tyj mszy – zdziebko pokidalo) kiejby niy to, co te ze tyj Rolwagi Logywatelskij tyz ci sie zawinszowali rzykanie lo tyn dyszcz (a mozno ino na lostuda dlo tych piyrszych i nojwazniyjszych – lo jesce srogszo hica, coby wszyjskich we tym syjmie blank ci na wiorki wysuszylo). A mozno ci tak i bolo, i beztoz ani jednym, ani drugim sie niy udalo !!! Nale, jak tyn nasz Ponboczek miol wysuchac tych kosciylnych, kiej ze drugij zajty jakisik tam Tusk i jejigo utrzidupskie ze (Ponboczku lodpusc mi tyn grzych ! ) tym dzioblym Rokitom na przodku tyz rzykajom lo te same abo lo cosik gynal inkszego. A jo juz blank niy poradza ci sam tego wszyjskigo do porzondku pochytac: bezmac momy (poduk naszyj „Konstytucji” ) kraj, we kieryj niy ma nojwazniyjszyj religii, niy ma ino jednyj religii (artykul 25 konstytucji). Prezidynt to gowa tego naszygo panstwa. Kiejby sie tak jejimu bez cufal zemrzilo, to na isto zarozki po niym jes Marszalek Syjmu. To wszyjsko prowda, pra? I terozki kiej jo tak gawca nikiej we telewizyji tyn „drugi po Bogu” kusikuje po gracach jednego arcybiskupa, to jo niy poradza spokopic: fto sam jes nojwazniyjszy ? Mozno tyn krakowski arcybiskyp a niy nasz marszalek jak to jes we inkszych krajach. Mieli my juz jedna telko Prymiyrka, kiero we szlajerze na gowie i po klynczoncku kusikowala naszygo Papiyza. Jo miarkuja, co to mozno sie wszyjskim sam u nos podobalo, nale widziol ftosik coby Bush (chocia jes jesce barzij religijny nizli nasze cygony i chachmynty ze polnom fresom „wartosci” ze tego rzondu) lebo jakisik Italijok abo Hiszpon – tyz katoliki nikiej sto dioskow – po klynczoncku szol do inkszyj „gowy panstwa” ? Nale, tak by tak dobrygo dyscu do terozki (szkryflom to we piontek) niy momy i cosik mi sie widzi, ize ino sam skuli tych loszkliwcow i gizdoni, kierzy naszym polskim cwilingrom bajstlujom wszyjsko na lostuda. Bo kiejby jesce te nasze „parlamyntarzysty” wziyni sie za tyn „zeks”, to mozno by bolo inakszij. Nale, kiej tak suchom niyftorych, to cosik mi sie zdo, ize loni juz blank przepomnieli co ci to jes, i na co chop i baba majom te, te ... jejich fizymatynta.
Wiycie, i sam spomniol mi sie jedyn telki fal. U nos na plantach kole lazarytu na Karolce ziclo sie dwioch, tak mozno loziymdziesiynciolytnich knakrow. Plascom tak te swoje rzicie na tych gorkich bankach i loroz jedny godo:
– A wiysz, cosik mi sie zdo, ize moja staro juz kipla, juz sie jeji zemrzilo.
– Ja, a po jakiymu tak miarkujesz ? – pyto sie tyn drugi.
– Ano, wiysz rzecy ze tym „zeksym” jes nizli downij, tela co colkie pomiyszkanie niy jes do porzondku posprzontane, poschroniane !!!
A terozki to mozno poberom zdziebko lo tych „agyntach”, lo kierych wszandy sie tela terozki godo i medikuje, bo przeca te nasze syjmowe angyjbery uchwolyli nom nowo ustawa lo tyj colkij „lustracyji” cy jak to tam jesce mianowac. Machlujom ci sztyjc i jednym ciyngiym we tych ustawach na colki karpyntel, a co jedyn angyjber, to mondrzyjszy, to wiy lepszij fto bol, fto jes i ... fto bydzie (!) jesce tym agyntym. Kogo tyz tyn colki Antek-policmajster skaperuje do tych blank nowych „sluzbow” a kierego wyciepnie na zbity pychol. Ludzie! To ci jes gryfny cyrkus. Teluch kasprow, augustow i bizygonow w kupie to jesce zodyn, nale to zodyn bali i nojlepszyjszy ruski cyrkus nikaj niy uwidziol. Przeca te, kiere pokazujom sie we tym Monaco, u tych hrabiow, kierzy jejim tam roztomajte nadgrody dowajom a pora lot, gryfnych pora lot niyskorzij, naszo wildsteinowsko lebo jesce downij ta telewizyjo lod tyj spasnyj, kamelkowatyj Niny Terentiew – pokoze. Tak sie tyz miarkuja, co jo terozki Wom mozno gynal sam to terozki wytuplikuja, bo to sie na isto werci ! Nale, musza napocznonc – nikiej to mondroki godajom – „ab ovo”, znacy lod jajca !
Jes rok 1982. Momy ci juz lod poruch miesiyncy tyn diosecki i pierzinski „stan wojynny”. Wolo mie do sia jedyn moj dyrechtor (Ludwik mu bolo) i koze mi naszkryflac telkie pismo we kierym my, Huta „Kosciuszko” niy bydymy tam nic gracac, pokazowac na tych colkich Miedzynarodowych Targach Poznanskich. Kiejech juz telki papiorek narychtowol i kciolech coby mi go tyn istny dyrechtor podszrajbowol, Lon mi dowo inkszy papior na kierym styrcy corno na biolym, ize to Huta „Kosciuszko” mo narychtowac na tych targach srogi sztand dlo colkigo polskigo hutnictawa ! Przikozol to naszymu werkowi telki istny, kiery sie Kaziu Sada mianowol, dyrechtor Zjednoczynia Zelaza i Stali, i lorozkki tyz do kupy z tym – wicyminister hutnictwa (ja, bolo kiejsik telkie ministyrstwo!).
– Suchej Ojgyn – pado mi tyn dyrechtor – kiejs sie mie juz sam nawinol, to ty to zbajstlujesz i tela !
To bol marzec, wiela czasu do tego czyrwiynia, kiej te targi zawdy byli, za tela czasu niy lostalo a jo blank niy miol anongu za co ci sie sam nojprzodzij chycic. Przeca jo bol inzinier lod mechaniki i walcwerku a niy jakisik szkolony handlyrz lebo „menedzer” – nikiej to sie terozki gryfnie mianuje. Nale, co bolo robic. Dyrechtor to dyrechtor i rod niy rod musiolech sie za to chycic. Dobrolech sie jesce jednego kamrata i – skuli tego co mieli my blogoslawiynstwo aze ze ministyrstwa – napoczli my bajstlowac te targi. Niy byda sam wszyjskigo wyklodol gynal, tela co tak jakosik kole piytnostego moja mieli my to wszyjsko pochytane, narychtowane i ino kuplowali my jesce telko kolona arbajterow, kierzy mieli to wszyjsko juz tam we tym Poznaniu sklodac i jesce telko ci „ekipa informatorow”, kierzy mieli tam na tych targach lo tych wszyjskich zelazlach, walkowanych, sztamfowanych, kutych we naszych werkach klijyntom lozprawiac. Tyn piyrszy rok udalo nom sie do kupy na jednym sztandzie posklodac ino kole dwanoscie werkow (niyskorzij to my mieli chnet i trzidziysci wszyjskich). I sam terozki na lostatek dyrechtor (nale juz inkszy, ekonomiczny, Kristof choby tyn lod szoferokow), kiery sie we to wszyjsko som wetkol, wrajziol sie kozol mi jesce naszkryflac fto tyz tam do tego Poznanio lod nos i ze inkszych werkow sie wykludzi. Po czamu miolech to naszkryflac, toch jesce wtynczos niy miarkowol, nale wszyjsko sie wyeklerowalo juz tam we tym Poznaniu. Przijechali my tak jakosik na lostatek moja i we niydziela lo dziesiontyj przed poledniym styrnostego czyrwiynia sie te colkie 54 Miedzynarodowe Targi Poznanskie sie napoczli. Musza sam jesce dociepnonc co to bolo jesce we stanie wojynnym i wiela, nale to wiela (Miymcow, Amerikonow i niyftorych inkszych) downiyjszych „wystawcow” do Poznanio sie niy przikludziylo, i beztoz to, co zbajstlowali tam i pokazywali Poloki bolo dlo naszych reskiyrantow ze Jaruzelskim na szpicy – „prestizowe”. A my sie ze tym kamratym wszyjskigo dziepiyro lod inkszych musieli naumiec. Tela, co bol ci jedyn telki fal. Zakozali nom ze sia zebrac jednygo fachmana Jorga Bednorza, bo lon bezmac zaklodol ci u nos we werku ta colko „Solidarnosc”. Fto zakozol, to mi jesce tyn dyrechtor niy pedziol, nale my sie ze kamratym zaprzili, ize kiej Jorg niy pojedzie, to my tyz niy. Kuknijcie, piyrszy roz jo zech do kupy ze mojim kamratym zasztrejkowali dyrechtorowi. Nale, to niy bolo nojwazniyjsze. Inkszy dyrechtor „delegacjo” nom wszyjskim podszrajbowol i ...pojechali my. Tam we tym Poznaniu zwiedzieli my sie lod tego dyrechtora Kristofa, kiery sie do nos prziflostrowol, co to bezmac SB zakozalo tymu Jorgowi wyjazdu. Jakosik my to niyskorzij wszyjsko posklodali i targi sie napoczli chocia tyn istny dyrechtor pedziol co mie ze werku wyciepnie. Wszyjsko nale bolo nikiej przinolezi, wicyminister i telko dyrechtorka-pelnomocnik ministra ze PROMEX-u festelnie ci nos chwolyli i tak jakosik by te dwa tydnie samych targow slecieli. Ino, bol jesce jedyn fal. Tak jakosik kole dwadziestego czyrwiynia szlimy ze kamratym na ta swoja kwatyra a jejigo ci natarlo, zakcialo mu sie jscac. Niy za tela ci medikowol lozewrzil rajfeszlus ze bontka lod galot i napocznol razinku gynal na prociw jednygo komisarijatu loc na telki blachowe logrodzyni. Loroz zahaltowala ci kole nos milicyjno „nyska” wyloz jakisik porucznik ; dokumynty i telkie tam ... nic, ino nos zawrzom lebo prziflancujom ci nom szykowno sztrofa. Tyn porucznik wloz do tyj „nyski” ze naszymi dowodami (inkszy milicjoner ci nos wachowol) i tak za jakiesik pora minutek wylazuje, salutuje nom i jesce sie pyto cy by my niy kcieli coby nos zakludzic na ta kwatyra. My pychole lotwarli choby kapery bez wody (a byli my juz deczko chycone, jak to na targach) i smiatali my wiela ino bolo siyly we gicalach.
Dziepiyro we Chorzowie, juz po targach zwiedzieli my sie, ize ta szkartka ze mianami tych, kierzy do Poznania jechali bolo dlo SB-yjokow. I te wszyjskie, kiere na nij byli, byli pod lochronom milicajtow. A tyn dyrechtor, tyn Kristof ekonomiczny a niy tyn, kiery nom ta robota przikozol, bol tam ci we tym SB pieronym srogom perzolnom. Czamu jo sam lo tym godom ? Ano, skuli tego co jo terozki tyz moga godac, izech bol „agynt”, boch przeca som gynal naszkryflol i podszrajbowol papior we kierym zech „donosiol” na kamratow, kierzy mieli sie snami wykludzic do tego Poznanio. Szloby sam jesce mocka lozprawiac, nale to juz mozno inkszym razym (a jes co, jes co berac!) tela co terozki jo mom dlo Wos ino jedne. Bydom terozki przeswiytlac, „lustrowac” – jak sie to gryfnie mianuje – a te tam we tym IPN-ie bydom wszyjsko rugowac, sprowdzac. A kiejby tak terozki te wszyjskie, kierym bydom kozali te colkie loswiadczynia szkryflac, te rechtory, dyrechtory, rajce miyjskie, starosty powiatowe, dochtory i fto tam jesce, naszrajbowali, co prziznowajom sie do tego, ize byli „agyntoma”, to przeca tam we tym IPN-ie te wszyjskie historyki-prokuratory prziszli by lo filip. Na isto by blank gynal logupli i by sie pokozalo co krom tych poruch ze tyj nojwazniyjszyj partyji i maluskich dziecek, wszyjskie we Polsce, znacy jakiesik dwadziescia milijonow chopa byli tymi „agyntoma „komuny”. Przeca zodnymu by sie nic niy stanylo, bo juz downo tymu lo sia naszkryflol, co jes agyntym telki Olechowski i tyz jesce ministrym lostol. A, ize to wszyjsko, te loswiadczynia beli by lo kant rzici loztrzas, bolo by to jedne srogie cyganstwo, kminiynie i fabulynie, to to musieli by te istne ze tego IPN-u lozknoltlowac. Mieli by mozno jakiesik styrdziysci lot gryfnyj roboty. To by dziepiyro bol wic i szpas dlo wszyjskich we tyj Ojropie, kiero sie juz dzisioj festelnie snos, ze tego naszygo tyjatru, cyrkusu chichro. Aaaa. terozki jesce na lostatek. Mozno to niy bydzie lo SB-yjokach nale cosik kole tego. Terozki, jak miarkujecie, i sam we radijoku tyz my juz lo tym godali, bol srogi „nabor” do policji. Przilazuje ci dwioch kamratow na te przesluchanie, na tyn moderny „casting”. Nojprzodzij wlazuje Hajna.
– Rzyknijcie mi co to jes? – pyto sie tyn lod tego prifongu. – Napoczyno sie na „sz” i wszyjskie we tym lajzom.
Hajna medikuje, medikuje i na lostatek godo:
– To som cheba ... szczewiki ???
– Ja, dobrze, styknie na dzisioj. – godo tyn egzaminator.
Hajna wylazuje i po cichusku godo Antkowi:
– Kiej cie sie spytajom lo cosik na „sz” to godej zarozki szczewiki.
Antek wlazuje i tyn egzaminator pyto sie go:
– Co to jes wisi na scianie, lajzi i mianuje sie na „z” ?
– Godocie na „z” ... a mo szplatki, sznorowki ?
– Niy !
– A to wiym, to bydom zandale !!!
I to by mozno bolo na dzisioj a berol, spominol nikiej we kozdo sobota

Ojgyn z Pniokow