Juzas faszing / na 13 stycznia 2007r
Ojgyn z Pniokow 13.01.2007

No, toz momy juzas faszing, abo jak to mondroki godajom, karnawal. Tela, co mozno latos niy jes juz tyn faszing telki szpasowny, niy majom ludziska telkij uciychy nikiej downij. Przeca tam na wiyrchu ciyngiym sie mele i motlo, ciyngiym nos te dwa cwilingry za bolek cisnom, co to momy abo mieli my lonskigo roka nojlepszyjszy lod siedymnostu lot rocek. A ino tego niy idzie ujzdrzic we zodnym portmaneju, no mozno krom tych tam na wiyrchu, kiere juz mocka nachabiyli, mocka sie na „panstwowym” kuscie przidubli. Wszyjsko idzie na wiyrch. Kaj ino cowiek wlejzie do skladu, do bele jakigo konzomu abo – niy dej Ponboczku – do japtyki, to zarozki idzie lo filip przijnsc kiej sie kuknie na to wiela to wszyjsko tam jes we wercie. Tela, co we strzoda wykludziol sie (mozno?) na pynzyjo tyn colki Balcerowicz, kierymu sztyjc szlapy podstawiol, na kierego sztyjc tyn colki Lepper nastowol. Chocia juz sie tyn bronotny Yndrju lobrol juzas kogosik inkszego. Uslyszolech we telewizyji, co terozki tyj paniczce, kiero tyz kiejsik „lustrowali”, tyj colkij paniczce Zycie Gilowskij wicyprymier gichnol ci lon bol telko ryjda, telko – ha,ha,ha, – „lepprymynda”. J juzas bydzie szlo wyrcec, rycec i wynokwiac co „Gilowsko musi lodyjnsc”. Bo przeca niy tyn Krzipek na dachu, niy tyj Ojstrach we naszym nojwazniyjszym banku, niy tyn utrzidupski jednego ze tych, co Wy wiycie a jo miarkuja, tyn kiery sie blank we Warszawie zblamiyrowol a terozki bydzie reskiyrowac Narodowym Bankiem Polskim. Chocia niy mog byc prezesym PKO bo niy miol telkich szuli za sia, kiere by mu na to dowali zwol. Metlol sie, bajukol, klyciol tak, ize go zodyn normalny cowiek niy poradziol spokopic. Nale, jes corozki lepszij sam u nos ... ino, zodyn – kogoch sie sam u nos na Pniokach – spytol, niy poradziol zmiarkowac KAJ u nos ??? Bo przeca niy jes lepszij nom pynzjonistom, modziokom, kiere yntlich erbli jakosik robota, kiere jesce niy pitli do Irlandii, Miymiec lebo Anglii. Bo przeca niy dochtorom i flyjgerom. A juz na zicher niy tym wszyjskim naszym stareckom, babulinkom, kiere niy majom na jodlo i na medicina, kiero tyz festnie szpryngla sie na wiyrch a ze cego mo uciycha ino tyn nasz cerwionokicholowy minister lod zdrowio i tyn jejigo macher lod Narodowygo Funduszu Zdrowio. Czamu to wszyjsko nie mianuje sie, ize jes ministerstwo lo niymocnych, „fundusz” dlo niymocnych? Przeca herskim, lepszym, zdrowym niy potrza zodnego ministra ani „funduszu”, prowda godom?
Cheba, co przijndzie telki nowy Kaszpirowski (boczycie go jesce, ja?) i napocznie bajstlowac cuda we tyj naszyj – jak to mondroki godajom – „siyrmiynznyj rzeczywistosci”. Godo sie, co tyn colki Kaszpirowski bol ci na isto srogi magik. Kiejsik ci przilazla do niygo jedna telko mamzela. zicla sie na tym jejigo gryfnym szeslongu. Lon tak na nia wejzdrzol tymi swojimi slypioma „cudotworce”, kuknol i godo:
– Lodciep te twoji kryki, te twoji biyrle i ... ID !!!!
No, i lona sie pokwanckala, pocionglaaaa....
– A co ji tak richtik bolo ?
– A miala ci czorno krzipota (koklusz) !
– No, a te berla, a te kryki co?
– A to byli bierle, kryki lod jeji starzika!!!
Nale, niyftore to juz przepomnieli a te co dzisioj tela wargujom, to kiej jejich ludzie przi nojblizszyjszym welonku lodchlastnom lod grotka, te wszyjskie „konskie fresy”, tych wszyjskich Wierzyjskich, szlyndzuchowatych ze lozewrzitymi bontkami i tych Kuchcinskich lebo Przymkow ze Gosiewa, to mozno ino jesce jedna zorta, jedna partyjo prziflostruje sie do tego reskiyrowanio naszom Polskom i ... niyskorzij to juz mozno bydzie obyczajnie i ganc ajnfach. Bo przeca niy wszyjskie i niy wszyjsko przepomnom, zaboczom. Tak nikiej we tym wicu, kierych poranoscie dni tymu nazod uslyszol.
Tyjater, opera, na binie styrcy wywolany spiywok. Mo byc wystawiono lopera „Rogoletto” Giuseppe Verdiego. Telki spiywok, kiery juz na colkim swiycie wiskol, kierego wszyjskie miarkujom, i kiery za kozdy konsek poradzi mocka pijyndzy przidubnonc. Spiywok tyczy na pojstrzodku tyj biny, dyrigynt majto tym jejigo patlokiym, muzyka napoczyno grac a tyn spiywok nic a nic. Ze tyj kastli pod binom „suflyr” podpowiado:
– „La donna e mobile...”.
Spiywok nic! Muzyka napoczyno juzas grac, „suflyr” juzas tela, co glosnij godo:
– „La donna e mobile... „.
Nic, spiywok jak styrcol tak dalszij styrcy i niy spiywo. Dyrigynt juzas dzwigo i majto tym jejigo patlokiym, tyn ze tyj kisty pod binom juz blank glosno wyrcy:
– „La donna e mobile...”.
– I coz ze tego, ize „la donna e mobile... „ kiej jo blank przepomniol nuty, zaboczol jak idzie ta melodio.
Jakech sam juz pora razy rzondziol, zawdy miolech we srogij zocy i festelnym reszpekcie naszygo nojlepszyjszego Slonzoka Karlika ze Kocyndra – Stanislawa Ligonia. Zawdy tyz, jesce za bajtla, poradziolech sie naumiec mocka Jejigo gyszichtow, kiere mi sie terozki drugdy spominajom, i kiere mom rod do mojich lozprowek wciepowac tela, co ino tak, jakech je na isto spamiyntol. Mozno lone niy som gynal take, jak Lon je kiejsik berol, lebo naszkryflol, nale zawdy ze srogim moresym je sam przikulom. Spominom sie jedna Jejigo gyszichta, kiero bola lo dwioch bracikach. I coby mie sam zodyn niy przeciepowol, co jo metlom lebo bamonca slowecka lod Karlika z Kocyndra, godom zarozki jesce roz, co jo to szkryflom tak, jakech to spamiyntol. A to bolo jakosik tak:
Byli sie kiejsik sam u nos – niy bocza terozki gynal kaj – dwa braciki. Jedyn snich to Gustel, i bol to szwiec, a drugi to bol Zefel i tyn ci poszol do fligrow, bol telkim szykownym „lotnikiym”. Zefel miyszkol lod downa kajsik kole Warszawy i kiejsik przifurgnol fligrym, tym ci colkim europlanym, telkim starym „Kukuruznikiym” na Muchowiec we Katowicach, tak na jakiesik dwa dni skorzij Wielkijnocy (a mozno i Godow?). A, ize jejigo bracik miyszkol chnet kole tego flugplacu to lon niyskorzij z niynazdanio wylandowol na dworze, na cwiklisku kole chalpy Gustlika. Jak landowol tak tyz ci potrajtol, przelorol colki tyn zogon a jesce ku tymu wyborowol zadkiym tego fligra, logonym srogo dziura na pojstrzodku. Kiej to ino ujzdrzol Gustel – jako dobry siodlok, gospodorz – tak ci go to romblo, take ci go mory chyciyli, ize zarozki spieroniol, sprzezywol tego, co tym fligrym tam ci przifurgnol :
– Ty gizdzie diosecki, ty lompie pieronowy niy mosz kaj indzij placu do furganio i landowanio ! Podziwej sie ty bezkurcyjo jedna cosikej’es mi sam nawyrobiol !...
Zefel z niynogla wygramulol sie ze tego ojroplanu, sciepnol bryle i czepica, telko jejich „pilotka” – wtynczos dziepiyro go Gustlik poznol – szykownie tego swojigo bracika przeprosiol, nale Gustel niy dol sie tak gibko uholkac, ciyngiym sie jesce na Zefla gorszol. Swiynta slecieli drab i kiej sie tak loba braciki pojedli, popiyli – nikiej to zawdy przi swiyntach – polozprawiali lo swojim zywobyciu lorozki Zefel godo do bracika, do Gustlika.
– No, Gustel na mie by juz bol czas i musza podwiyl sie sam mi blank niy zecmi pofurgnonc nazod do tyj mojij Warszawy.
Kiej juz doimyntnie narychtowol tyn swoj fliger i zaszaltrowol motor, pado do niygo Gustel:
– A wiysz Zeflicku, jo to ci jesce niy wia, niy miarkuja jak ci tyz to sie na telkim pieronstwie loce, jak to jes tak furgac we lufcie? Mozno bys mie tak konsek we tym lufcie przewioz ?
– No, dobra ! – godo Zeflik. – Tak po prowdzie to mom pilno, nale dlo cia moga to zrobic. Wlazuj wartko do tego fligra na zadni zic.
Gustlik wgramulol sie rajn, Zefel go sztram przipnol, przikrymplowol poskami coby bez cufal mu ze tego fligra niy wypyrtnol i pofurgli....
Kiej juz tak wyfurgli na jakiesik piyncset myjtrow Zefel zwyrtnol sie tak zdziebko do zadku i pyto sie bracika:
– No, i jak ci tam, filujesz cosik, cujesz co?
– Niy, nic, abo co ? – godo Gustel.
Zeflik pofurgnol wyzij, na jakiesik tysionc myjtrow i juzas sie pyto bracika cy co cuje ?
– Niy, Zefel, blank nic niy filuja, blank nic niy cuja!
Zefel smignol jesce wyzij i juzas sie go pyto lo te same.
– A terozki wyfilowoles juz co, wycules co?
Na to, znerwowany juz Gustlik, lodpedziol bol:
– Pieronie, niy berej tela, ino kukej kaj furgosz. Mogesz jesce wyzij bo mie sie to pieronym zdo, bo te colkie furganie to ci jes srogo frojnda i uciycha dlo mie !!!
Nale, telko godka Zefla zdziebko dopolola. Nerwlo go to, co jejigo bracik jes telki norymny i niy wozy, i bimbo sie te colkie furganie. Wiela niy medikowol majtnol ze trzi kopyrtki, yntki bez plecyska tym ojroplanym i kiej juz blank wyglajchowol tyn fliger pyto sie juzas Gustlika:
– A terozki, to juz cosik cujesz, juzes cosik wyfilowol?
– Ja, terozki dziepiyro cosik cuja – lodpedziol Gustlik. – Bo to, coch miol colki czos we galotach, mom terozki za kraglym. I landuj wartko, bo ci mie to pieronsko szmyro i kilo po gyniku!!!
Nale, faszing to faszing i tela. Poberom zdziebko lo tych czasach kiejech rod pyndalowol na roztomajte muzyki, na roztomajte tancowaczki i ... to niy zawdy ino ze mojom Elzom. No, toz jadymy podle raje:
Tak ze kielanoscie lot tymu nazod trefiolech na drodze jednego kamrata, starego fernioka, znacy samotnygo.
– Ojgyn, dobrze co cie widza! A jezes to juz zyniaty?
– Ja – padom mu na to – juz lod gryfnych porunostuch lot!!!
– A jezes zowistny, zazdrosny fest?
– A dyc, jak sto pieronow ... jo milijonsko zowiszcza tym, kierzy jesce babow niy majom, kiere sie jesce niy lobabiyli.
Bo ze mojom babom zawdy boly komedyje. Kiej ino lobsztalowolech bilety na jakosik zabawa to sie napoczynalo: A to niy mom co loblyc, a to szczewiki niy som we modzie, a to juzas bubikopf trza lod nowa u golaca bajstlowac, a to tam jesce inksze telkie mecyje. A kiej juz prziszlo co do cego, to juzas trza bolo dowac pozor na kamratow, na to coby gorzoly za tela niy slepac, a juz kiejech na zabawie napoczynol ryjda :
– No, toz szluknymy za nasze babeczki i „kochanki” ... coby sie nigdy ze sia do kupy niy trefiyly!!!
to juz staro poradziyla mi colki tyjater zbajstlowac. A przeca zodno balanga niy lobyjndzie sie bez sznapsa. Przeca same znocie telkie alsdruki:
„Klara swiyci, ptoszek kwili, mozno by my co szluknyli.”
lebo:
„Zeks to niy wszyjsko, lostowo nom jesce piwsko!
No, tego toch niy miol sam terozki godac. Styknie, rychtujymy sie ....
– A wiysz, ize ta twoja kamratka Frida sie na mie lod lonskigo roku gorszy?
– Po jakiymy, po jakiymu? – pyto sie mie moja Elza.
– Ano, skuli tego coch sie jom cosik wtynczos spytol.
– Ja, a co zes sie jom spytol?
– Po pierona sie ciyngiym tym lipynsztiftym sztrajchuje?
– No, i ...no i co ci lodpedziala?
– Pedziala mi coby lepszij wyglondac ... toch sie jom spytol jesce : a po jakiymu tak ci niy w y g l o n d o ???
– Wiysz Ojgyn, a Erna to juzas na ta zabawa przijndzie ze nowym szacym! Lod kiej logdowiala to co trzi tydnie mo nowygo karlusa, co loni we tyj staryj kalymbie widzom? – faflo ze bralzy moja staro.
– Niy poradza tego tyz gynal spokopic, nale lona jes lod cia cheba ze dwadziyscia pora lot modszo...
– Ojgyn! A ty wiysz, ize snami do kupy bydzie Jorg ze swojom starom?
– Wiym, wiym i to bydzie dlo mie nojwiynkszo utropa. Bo kiej lon napocznie lozprawiac lo tych jeji chorobskach, to jo tyz zarozki musza jakiesik „relanium” lyknonc cobych zarozki niy glingol po pogotowie.
– Ojgyn, nale tyn twoj kamrat Zefel to latos cheba niy idzie snami, pra?
– A czamu miolby niy pojnsc? Zawodzo ci to?
– A zawodzo! Bo lon blank niy poradzi tancowac i lonskigo roku tak mie podeptol, izech trzi razy musiala holzynsztrymfy zwekslowac, bo mi ciyngiym lalki, maszki lecialy. A ku tymu lon sie Bog wiy co ajnbilduje, telki je zawdy we sia zadufany a do dzisioj niy pochytol tego konsztiku jak gynal wetkac hymda do galot coby spod westy ta jejigo wampa niy wylywala sie na galoty, kiere zawdy mo za sztram, za knap, choby po modszym braciku.
– Niy jamruj, niy wajej, bo kiej jo juz musza deptac tancowac ze tom twojom kamratkom Hildom to niyskorzij mom colki ancug poflekowany kiej jeji tyn colki puc ze gymby, dychanio i pelcyskow slatuje.
– To jom tak gizdzie przi tym tancowaniy niy sciskej, niy loblopiej chobys ze jakomsik Grace Kelly lebo tom cornom Naomi Cambell tanciyrowol!
Niy, byda ze Ernom ciyngiym walcowol, lo kieryj godali kiejsik telki szpas, ize poszla lo weta ze jeji starym, co wylejzie na plac przi familoku blank sago, tak jak jom Ponboczek stworzol.
– Jezderkusie, Gmyrcyno! Ezli by to bola naszo Erna ze drugigo sztoka – pado jedna deczko slepawo somsiodka do drugij.
– A toc, ize to lona – pado drugo.
– Jeronie, nale tyn klajd, kiery miala na sia to mogla by sie chocia zdziebko wybiglowac, pra?
– Elza, a briftryger ze pynzyjom lod Swiekry bol dzisioj?
– Niy, niy bol!
– No, to wyszaltruj telewizyjor i idymy nynac ... to mozno na jakosik gryfno balanga chocia we sniku pojndziesz ???
Tak jesce blank na lostatek telki wic, niy wic a mozno prowda? Jedyn lozyrok zahaltowol taksa na cescie. Taksiorz kuko tak na niygo, filuje i godo:
– A kaj tyz to ???
– A na postoj gizdzie bo tam mocka ludzi na wos niy poradzi sie doczkac.
Moznoscie to juz kajsik suchali skorzij lebo czytali, ja? Ezli ja, to niy godejcie zodnymu, niy wyfaflejcie tego; mozno sie inksze niy kapnom. Bo ta gyszichta mi sam dzisioj gynal klapowala po tych wszyjskich Zilwestrach i inkszych tam jakisik balangach, kiere bajstlujom bez tyn faszing. Terozki jo juz mozno mynij fyrtom bele kaj boch juz tyz zdziebko zwiekowol, nale szkrabka na dobro muzyka to jo mom zawdy i wszandy.

I to by mozno bolo na dzisioj a berol i spominol nikiej we kozdo sobota juz lod iber styruch lot

Ojgyn z Pniokow