Po babskim fajerze! / na 10 marca 2007r
Ojgyn z Pniokow 10.03.2007

No, toz momy juz po tym colkim babskim fajerze. Pola ludzi markiyruje, co blank niy wiy lo co idzie, modzioki godajom, ize to je blank komunistycny fajer a juzas niyftore, te blank „normalne” chopy tak by tak swojim babeckom jakiesik tulpy (co jo godom?) jakiesik gryfne blumy do chalpy przismycyli. I chocia same byli niy blank herskie, no ale zawdy ukazowali sie nikiej nojlepszyjsze chopy we miyscie lebo we wsi. Bali i tyn jedyn ze cwilingrow powinszowol naszym babeckom wszyjskigo nojlepszyjszego we lonski szczwortek, chocia pometlalo mu sie, ize to niy jes swiynto „komunistyczne” ino Miedzynarodowy Dzien Kobiet. Chocia, cy jo wiym ? Ale, lostawiywiy to na kiej indzij, bo dziyn przodzij bol srogi romraj coby uchwolic we Syjmie tako ustawa loswiatowo. Fest za tym deptol tyn srogi Rosynant loswiatowy (ze kierym skuli cyntimetrow niy kce sie pokazowac do kupy sniym tyn nasz ... wiycie kiery prymier?). Niy szlo tego uchwolic, bo niy bolo tego ichniygo „qworum” i musieli wartko tyrac po wszyjskich poslach coby loni ino miast slepac gorzola we syjmowym szynku gibko potyrali na glosowanie. I uchwolyli: „zero tolerancji”. A wszyjskie mondroki ciyngiym godajom, co niy ustawa ino wycwika lod lojcow (nojprzodzij lod nich !) i lod rechtorow pokoze modziokom „wo ist der hund begraben” (kaj jes tyn pies pogrzebany) i kaj jes te colkie nasze „chowanie’ modziokow, coby na ludzi wylejzli. I sam kciolbych jesce roz poberac lo tym ezli trza modziokom wycwiki, „dobrygo wychowanio” coby byli moresne abo i niy? No, toz posuchejcie jesce roz:
Pora dobrych lot gymza juz po tym swiycie i durch sie dziwuja. Bo kiejsik to bolo tak, ize synek, a jesce barzij dziolcha, kindersztuba mieli w doma a rechtory ino wachowali ze prontkiym, kierym prali po rzici abo po gracach, coby ta lojcow wycwika niy bola darymny futer. I chocia zawdy sie godalo, co downij bolo wszyjsko lepszejsze, to dziepiyro razinku wszandy widac, ize mlyczoki wycwiki lod jejich lojcow niy dostowajom. Skuli tego tyz polno lochyntoli i chacharow fyrto po miescie. A juz za downygo piyrwyj Karlik z „Kocyndra” naszkryflol bol „Lo dobrym wychowanio – slowek pora”. Mocka ze tego niyftorym do dzisioj by sie przidalo a i pora nowych pociorkow idzie ku tymu dokludzic. No, toz dowejcie pozor karlusy, chopy i inksze ciarachy, zetrwejcie sam deczko, bo tako eksecyrka kozdymu sie przido, coby we dobryj asiscie niy bol soroniym i niy wyloz blank na kaspra. A to co byda Wom sam szkryflol i eklerowol, to ci bydzie nikiej nociostek dlo pecynka chlyba.
– Kiej sie ino z ranca locucisz, to zarozki tyrej pod alsgus abo pod bralza, umyj fresa (nojlepij zajfom, a niy ino wodom). Som po prowdzie i telkie, kiere colki smrod parfinym ofultajom, nale to je zle, bo inksze zarozki wywoniajom, ize przikwanckol sie sornik abo jakisik loszkliwy kormik. Dejcie tyz pozor na dakle i gnyp.
– Pazury niy som lod tego coby za niymi zaloba tachac, ino trza je richtik gynal wypucowac i loberznonc (a niy logryzac choby kostyry ze kokota).
– Terozicki je tako moda, ize chopy majom na pycholu dwatydniowe szkociny, ale fto chce byc szykowny musowo mo sie lajstnonc razjyraparat coby sie zmachlowac pieslawo gymba.
– Loblecynie tyz by sie zdalo co pora tydni lopucowac i lodbiglowac, coby niy loblyc sflekowanygo ancuga abo galot z klabustroma po lostatnim gyburstaku. Oberhymda tyz (choby ino na przodku) mo byc biolo a szkrawitel moge byc wilgly nale niy corny.
– Galantny karlus niy smiy zaboczyc lo sznuptychli, bo przeca niy bydzie przi rymie smarkac do sztulpy a kichola lociyrac pazurami.
– Wylazujymy ze chalpy, a kiej sie przidarzi tompac ze jakomsik frelom, to na slodach ryjesz sie chopie zawdy piyrszy. To na cufal, kiejby lona miala sleciec ze slodow na sznupa (kiej wlazyjesz na slody, to tyz lyjziesz przodzij, a to coby jeji ni gawcyc pod kiecki).
– Do banki, autobusa eli cuga niy ryjesz sie piyrszy coby ci placu styklo i cobys mog sie zarozki zicnonc. Przijdzie jakosik olma, to wol niy wol musisz jeji zrobic plac, bo cie moze prasknonc krykom. A kiejbys ujzdrzol, ize jakosik dobro olma lebo mamulka malupica cupla swojigo bajtla na zesel, to bieresz go za szkrawitel, sciepujesz i som sie mogesz zicnonc.
– Kiejby ci fto nastompiol w bance na plynckiyrz, to niy rycysz na colki karpyntel, ino szykownie godosz do tyj flalmy (bo przeca ino baby poradzom richtik chopowi dopolic kromflekiym): bydom loni tako dobro i slejzom ze mojij szlapy, chobys bali po cichusku medykowol – coby ci mamzelo colki puder z pyska sleciol !
– A zas kiejby cie fto sztuchnol bez cufal na drodze, to niy switosz go zarozki nazod w szinkbajn, ino milusko godosz: trzimajom loni te kostyry przi sia i niy roztopiyrzajom sie choby elefant.
– Niy dubej tyz we kicholu i niy wyciyrej kozow w mantel somsiodki na drodze, bo sniom moze byc jeji chop i moge cie prasknonc bez pysk.
– Gymzisz bez miasto, mierznie ci sie nikiej sto dioskow. Loroz zdrzisz a na bance, na plantach zicla sie staro mamzela we pelcmantlu, zwyrto slypioma i trzimo na klinie maluskigo, biolygo chlebusa, takigo wiycie dupelka. Niy podlazuj ku niymu, a na isto niy hajej takigo gizda, bo dyc telkie kondle cichtowane we chalpie na zofie som najbarzij loszydliwe i moze cie szczamp bajsnonc w palcyska.
– Lo babach, frelach, samotnych, wydanych i gdowach terozki niy berom i pokiel co ino jedyn fal cobys chopie dowol pozor. We sklepie, kole sztandu, wszandy tam kaj jes raja wryje ci sie zawdy jakosik flalma przed cia i ze loszydnom machom na fresie zacnie ci bajrowac, ize lona mo we chalpie niymocne dziecka i drap musi jejim spatrzec bojtel mlyka. A tak po prowdzie to jeji stary poslol jom po piwo i cigarety abo po zagryzka do gorzoly, a lona juz przodzij dwie godziny klachala ze somsiodkom i beztoz terozki fyrto choby miala drapszajs, coby jom jeji chop niy wyszczylol po pysku.
– Mosz moderny telefoln? A toc, ize mosz. Juzcic fto ci go jesce sie niy lajstnol? Ino jakisik mamlas, cielepa lebo elwer. A kiejs sie go juz lajstnol abo erbnol we fyrmie, toz niy ryc choby jaki ryl i soron na colko banka cy autobus:
„Hanys, Hanys, jo cie widza ino blank niy slysza” abo bez zwazowanio na inkszych, kiere tyz majom telkie fizymatynta: „Jorgus, glingnij ku mie, bo niy wiym, kiero je terozki godzina a staro to ci juz lod wcorej wachuje ze nydejkulom przi dzwiyrzach cy prziklechtom sie na styrech”.
– Nale, kozdy telefoln to je dobry wichajster, jyno misisz dowac pozor, co do tego cedzitka godosz, bo mozno byc i tak, ize glingosz do kamrata, takigo swojigo sznapskolegi a cedzitko dzwigo jego staro.
– Halo, tu godom jo – forskosz do suchawki – je Zefel w doma ?
– Podwiyl co, jesce jes – pado jego staro.
– A czamu, podwiyl co?
– Bo razinku go lajchyntryjgry wykludzajom na kierchow !
– Na twoj gelt tyz dowej ciyngiym pozor. Lamzom terozki takie miglance, kiere roz-dwa ci pichnom ze kabzy portmanyj ze geltakiym a ku tymu jesce buksiok.
No, a terozki zdziebko ze inkszyj zorty. Mozno ci sie przidarzi, ize napytajom cie na sniodanie, lobiod lebo wieczerzo. I tu ze kozdym byzuchym trza dac pieronym pozor. Tak ci sie razinku polonacolo, ize lonski ciarach i cielepa prziszol dran do pijyndzy – bo miol grajfka do machlowanio abo chyciol sie polityki – i loroz mu sie zdowo co sniego jakisik Rokefyjler abo colkim pyskiym fyszt. Chalpa ze cwergami eli inksze stawiynie sie sprawiol (a mozno ino erbnol lod swiekrow, kierym sie udalo wydac zadno i szpotlawo cera), lajstnol sie gryfny altok i terozki rychtuje roztomajte „party”, bigle i romraje. Telkie angyjbery ino doczkajom coby ci cosik przisrac, bo jejim sie wydowo, ize wszyjskie filipy pozjodali i jyno loni gynal spokopiyli co lobleci, co mozno lobstoc, a co niy.
No, toz jadymy podle raje.
– Pokiel jesce niy wleziesz do gryfnego pomiyszkanio, lobejrzij sie dicht jakie mosz szczewiki, ezlis bez cufal na drodze niy wloz w gowno, kierym mozesz ufifrac tepichy. Chocia to tyz niy je na isto, bo niyftore, kierym na beztydziyn grochowionka ze charbolow wylazuje, kazujom napytanym sebuwac szczewiki i tyrac po dylinach we fuzeklach.
– Glingosz abo tyrcysz. Nale pieslawo i polekusku coby gospodorze i te, kiere juz przodzij sie przikarycyli, niy miarkowali izes pragliwy i niy poradzisz sie jodla doczkac. Tyz niy klupej za fest na dzwiyrze gorsciom, bo ino pazury lobklupiesz.
– Mozno ci lozewrzi dzwiyrze frela, kiero tam bedinuje. Wlyz, gryfnie jom pozdrow, ale ino jom niy macej po polrzitkach (cheba, ize je modo i szykowno a ku tymu jesce gospodorz niy gawcy).
– We antryju seblyc mantel (kiej go mosz). Szaketa loroz tyz niy seblykej, choby bolo gorko nikiej we Africe, bo abo cie weznom za soronia, abo uwidzom, ize mosz ino formetla a niy colko hymda.
– Bocz cobys za wcasu wyciong kalgomin z gymby. I niy flostruj go na klomce eli na fynsterbrecie, ani niy wtykej do dziurki lod kluca cy kukurzicy do dzioba, a tym barzij niy ciepej na sztroldekel. Kiej sie zodyn niy kapnie, mogesz go wciepnonc do blumwazy.
Wlazujesz co do izby a tam juz zicli te co przikwanckali sie przodzij i ino sztyjc lo jednym medykujom: kiej dajom cosik pozric ? Toc zodyn tego niy godo i ty tyz trzimej pychol zawrzity. Trocha niyskorzij to mogesz to wicnie pedziec, izes sam niy prziszol dlo uciechy a jyno skuli jodla. Ze tego wielgij ganby niy bydzie, a weznom cie za szpasownika i wigyjca.
– Kiejs trefiol na takigo lochyntola, kiery ci kozol sebuc szczewiki a skuli szporobliwosci posfijol tepichy i skukol je za szrankiym (chebas u sia w doma gynal lobejrzol cy palcysko abo piynta ci ze zokow niy wylazujom ?), to durch musisz dowac pozor cobys sie niy kiolzdnol i niy drzistnol pycholym do teriny ze kartofelzalatym.
– Mozno ci Ponboczek dol szyroko rzic, jezes srogi i spasny, dej pozor kiej sie chcesz kajsis zicnonc, bo moze ci sie przidarzic, ize zarabujesz stolek abo zofa. Na taki fal dyc baba lod tego siodloka dycki pado: „nic niy szklodzi, niech sie loni za tela niy tropiom”, a po cichusku zasik medykuje: „cobys puk choby krupniok na tyglu, ty diosecki zawalacu!”.
– We lepszejszych asistach kozom ci sie zicnonc wele jakisik freli (chocia mozno sie trefic jakosik mamzela abo inkszo yma). I to ci juz niy som blozny, bo musisz jom lozprowkom amizyrowac a niy ino medikowac coby twoj talyrz bol kupowato nafolowany i glaski zawdy polne.
– Kiej bydziesz juz lozprawiol wice, to ze posmiywnym lostatkiym doczkej aze lona lyknie to co wtykla do gymby, bo moze ci sie udowic i dziepiyro bydzie dupny alflalf.
– Kiejs bol jun tak szczysny i twoja somsiodka je modo i szykowno trzimej grace zawdy na stole, a to beztoz coby niy bolo klachow i loszeredzanio.
No, i endlich dali jodlo. Terozki trza tuplowanie dowac pozor, bo przi lobiedzie abo wieczerzy idzie sie napochac nojwiyncyj ganby. Je pora takich fali, kiere abo ze cia zmachlujom chwanta i soronia, abo bydom cie inksze mieli za szykownygo i galantnygo, za chopa ze kindersztubom, kiery moze sie paradzic.
– Ezli do sniodania dowajom tyj abo bonkawa, to niy wciepuj cukrzanego wyrfla palcyskoma do glaski lebo szolki, ino chyc go sztram klyszcykoma, kiere zawdy lygajom kole abo styrcom ze cukerdolzy.
– Colkie jodlo, cy to przi sniodaniu, lobiedzie abo na wieczerzo dowajom na talyrzach lebo terinach. I niy targej talyrza ze wusztym, kobziolami, panszkraltym abo inkszym jodlym somsiodowi i niy ryc bez colki stol: mie, mie sam dejcie przodzij! Po prowdzie to je richtik utropa, kiej sie zdarzi jak inksi nojlepsze konski folujom na swoj talyrz a tobie cejco ino lostanie. Lodpolisz sie inkszym razym. I dycis niy pieronuj – bos przeca cowiek ze kindersztubom – chobys po cichusku medykowol: a cobyscie sie tymi oplerkami udowiyli, wy gizdy przepadzite!
– Te wszyjskie nowomoderne angyjbery to ci mogom wyrychtowac taki fal, ize pokladzom takie jodlo, kiere niy poradzisz spokopic jak i cym je ckac. Zacnij beztoz swojij somsiodce cosik lozprawiac i kukej naobkolo jak sie inksi do tego jodla bierom. Chocia bol ci juz i taki fal, ize kozdy gawcol na drugigo a zodyn niy wcinol, bali i som gospodorz. No ale, to som diosecko rzodkie fale i podwiyl zodyn sie niy kapnie, mogesz dzioc wiela wlyjzie, a inksze bydo medykowac, izes je festelnie zocny.
– Lobgryzionych kostyrow nie ciepej somsiodce na talyrz, choby bali u cia na niym niy bolo placu. Tyz jejich niy wciepuj po kryjoncku na tepich, bo bez cufal tako kostyra moze lalfka tyj twojij freli na sztrymfach dziergnonc.
– Zawdy we takij szykownyj asiscie som na fiszdece pokladzione roztomajte zorty pitwokow, gabli i lezek. To som werkcojgi ino do jodla. Widolkom na tyn bajszpil niy dubej w zymbiskach ani niy dropej sie po lebie. Pitwoka niy tkej do gymby, bo sie mozesz uchlastnonc lynzyk abo pajtnonc we fafla. A lezka niy je do lobuwanio szczewikow.
– Niy siorbej i niy forskej przi jodle, bo to niy je gryfnie (tyz niy chepej, chocia to terozicki je tako moda, kiero idzie bali i we telewizyji lobejrzec). Palcyskow i fresy niy wyciyrej lo tisztuch ani niy wtykej eki tego tisztucha nikiej laclik pod szaket skuli tego, izbys sie mog pokidac zolzom galoty. A juz nojbarzij to dowej pozor cobys niy mlaskol, bo ftosik moze ci szpasobliwie przisrac, ize twoj lostatek bydzie na zicher we szlachthalzie.
– Mozno sie tyz przidarzic, ize gospodyni ze loszydliwom fresom rzyknie: „a dyc weznom sie jesce jedyn konsek zisty”, choby pod nocholym mronczala: „niy bier ty gizdzie, bo mi do swiekry niy styknie”.
– Tyz nikandy niy godej: lo, gryfnie dziynkuja, alech juz tela tego flapsu sie nackol, ize mi sie durch chepie. Godej, ze zawdy malo jodosz – mozno ci uwierzom ?
– Niy fandzol tyz na colki karpyntel, ize jodlo bolo takie coby ani twoj pies sie go niy chyciol, ino kiej sie zmiarkujesz zarozki melduj, ize ci twoj dochtor przepisol sztram dijeta. Inksze bydom medykowac: „nale tyn karlus mo wartki filip!”!
– Kiej gospodyni sztrekuje logiby i na zicher wstowo lod stola, znacy ize wiyncyj jodla juz niy bydzie, izes sie juz dosik nackol. Terozki szykownie podziynkuj swojij somsiodce lod stola, zakludz jom do zofy i dej jakimus blank inkszymu mamlasowi dlo asisty. Niy dowej zezwolynstwa coby cie chyciola pod parza, ino dowej sztyjc pozor ezli by lona gracow we twoj szaket niy lobtarla.
– We drugij izbie musisz wachowac coby sie docis kiej ci bydom tajlowac cygaretami. Bier ino jedna i niy godej, ize mosz jesce styruch bracikow we kasarni. Kiej sie juz zakurzisz, a wszyjskie bydom filowac, coby ci sie blank niy lokidac bonkawom, mogesz zacnonc lozprawiac – ino jesce niy wice. Dej tyz pozor cobys niy wtykol slowek, kierych niy poradzisz spokopic i niy as sie, ize godosz blank po polskiymu, bo mozesz sie zblamowac.
– Mogesz tyz pedziec pora wicow, ino musisz boczyc ezlis jich juz styry razy niy lozprawiol, bo cie ftosik moze spytac eli wiysz za co Kain Abla zatrzasnol?
– Mogesz tyz pochwolic gospodorza, ize mo jakiesik gryfne lodznaczynio abo pora inkszych medalyjkow, ino niy za wiela. Bo terozki (jesce za niybogi „komuny”) niy bolo z tym knap. Ftosik mondry pedziol bol, ize ze lodznaczynioma to gynal nikiej ze himoridami – pryndzyj abo niyskorzij kozdy dupek je chyci. I terozki tyz niy jes inakszij, prowda?
– Kiej juz musisz pokwanckac sie do hazlika, to niy sznupej bele kaj i po wszyjskich ekach i niy wrazuj kichola tam, kaj cie niy pytali. Wulonac co mosz wylonacyc, nale niy wtykej colkij rolki szajspapiytu do kabzy, bo jak sie kapnom gospodorze, to cie weznom za chamstra abo fynikfikra. Niy sztrajchuj tyz lipynsztiftym cery gospodorza yjlzokla: „I lowe Elza” abo inakszij, bo pedzom, izes diosecko bezkurcyjo i wiyncyj cie juz niy przipytajom do sia.
Terozki deczko lo gorzole, machmolu, jabolu i inszych loparach. Bo dycis Polok niy szczimie gosciny, bigla, gyburstaku, fajeru cy romraju lo suchym pysku. Beztoz trza zwazowac co, kiej, kaj i ze kimsik do kupy sie slepie, coby sie niyskorzij niy zblamirowac.
– Kiej ino wleziesz do, izby przi jakisik goscinie eli byzuchu gospodorz sie pyto: coz tyz sie loni napijom? Niy wynokwiej jakisik zagranicnych zortow, bo zolwizol jes ino cysto abo lozparchany szpyron i wol niy wol bydziesz musiol slepac to co wszyjskie.
– Niy ryc tak jak przi jodle na colki pysk: jo, jo je sam, jo juz mom prozny lampus. Doczkej aze do cia flaszka dojndzie, nale niy trzimej jom aze bydzie prozno. Szpasobliwie mozesz ino pedziec, ize take maluskie glaski to ci mogom do dziury w gybisie wleciec, abo mogesz je bez cufal lyknonc.
– Duldej ino tela cobys sie niy lobalol i niy sleciol pod stol, bo mogom cie inksi nastompic na palcyska jak to sie nikiej sciopranymu przidarzi.
– Kiej zoczysz, ize gospodorz schronio rest jodla i niydoslepane halby znacy, ize fajrant i trza sie kulwitac do dom. I niy wiskej choby cie fto ze szkocin szkubol:
„Jesce roz za ceski” abo tako spiywka: „Tego jesce niy bywalo, coby gorzoly brakowalo”.
– Dej tyz pozor cobys niy sfrocol, niy rzigol do blumwazy abo gospodyni do alsgusa, bo cie moze gospodorz – ezli bydzie jesce monter – prasknonc w leb.
Wiyncyj ze tyj zorty niy byda szkryflol, bo po gorzole to je i tak darymny futer. No, a terozki na lostatek trza sie poleku skludzic.
– Nojprzodzij podyjndz do gospodyni, pochwol jodlo (nale niy za tela, bo chnet zmiarkujom, ize jich za bolek cisniesz) i rzyknij, ize loja ani margariny zes niy wywoniol. Niech cie Ponboczek broni, cobys szpasobliwie pedziol, ize we nudelzupie boly szkociny a piekorz, kiery przirychtowol ta zista abo tortynsztikle, kipnol ze starosci. To som telkie downiyjsze bery, za kiere juz we downiyszyj Kanie Galilyjskij jedyn soron i loszkliwiec nachytol po pysku. Niy moze byc i tak, coby lo cia godali: „cejco lyknie – cejco rzyknie”.
– Kiejs sie juz pogracol ze gospodorzoma i ze tymi, kiere jesce niy slegli blank pod stolym, mogesz we antryju opaternie loblyc mantel (nale ino swoj), tak cobys niy sciep kromlojchtra abo romy ze knipsniyntom swiekrom gospodorza.
– Terozki juz lobleci, kiej pokilosz dziolcha co tam bedinuje, cheba ize mo loziymdziesiont lot i je swidrato.
No, toz to by bolo na tela a berol jak we kozdo sobota

Ojgyn z Pniokow