Dziecka i ... feryje! / 30 czerwca 2007r
Ojgyn z Pniokow 30.06.2007

No, toz momy juz feryje dlo dziecek. He, he nagabujecie mie po jakiymu godom my? Ano, to skuli tego, co te wszyjskie majoryntne (dorosle) tyz juz majom zdziebko pokoj. Chocia ? Niy jes to tak blank ajnfach. Niyftore dziecka to bez dziesiync miesiyncy deptajom do szuli i skuli tego, co tam mogom cosik pojesc, cowsik weckac ... kiej tego niy ma w doma. Juzech sam mozno godol, ize tak jakosik we kwiytniu z ranca (niy poradza juz na te moje zwiekowane lata nynac) widziolech na naszyj huliczce, na mojij Dombka synecka, kiery mog byc tak kole loziym-dziewiync lot stary, i kiery deptol do tyj mojij „siedymnostki”, do tyj piyrwyjszyj mojij szuli juz lo siodmyj z ranca. Bolech sie podlyjz do niygo, coby mie te lod tego ze tom konskom fresom, niy pedzieli izech jes ci mozno jakisik „pedofil” abo inkszy zaprzaniec lebo „zboczek”. Nalech podloz do niygo i sie pytom:
– A po jakiymu to ty tyz synek tak wczas rano deptosz do szuli?
– Ano, kaj mom pojnsc? W doma niy ma co weckac na sniodanie a we szuli to chocia dajom cosik do jodla !!!!
Ino, ino, terozki lod pyndzialku to sie tak jakosik markotnie zrobiolo. Niy ma juz larma lod rana na szulplacu, niy ma tyranio za balym, romplowanio, i ... tego dzieckowygo lachanio, chichranio. Jo ze lokna gynal gawca sie i na szula, i na tyn szportplac, i na ta turnhala, kaj jesce pora dni tymu nazod cosik sie dziolo, polno bolo dziecek ze jejimi uciechoma, ze jejich smiychym. Cicho, jankor ci jakosik srogi i mersko tak na tym placu, na drodze ku szkole. No, ja ... dziecka tyz muszom miec fraj a i rechtorom to sie tyz przinolezy loddychniyncie lod tych lochyntoli, kiere na isto poradzom naobkolo wszyjskim na fest zdrowio naszklodzic. Jo tam miarkuja, ize na isto szkolorze to sie wciepujom na te ichnie SMS-y co szkola, to jes nikiej hazlik na placu; lamzisz tam bo ... musisz! I tyz mozno byc to na isto prawie. Ale, po dwioch miesioncach pewnikiym tyz i tym dzieckom napocznie sie cknic bez tyj szuli, bez kamratow i kamratek ze kierymi idzie zawdy cosik dlo smiychu abo na lostuda nazgobic.
No, toz – jakech pedziol – majom i dziecka, i lojce zbyte tyn rok szkolny, majom go juz forbaj. Ino terozki, to juzas majom przed sia iber dwa miesionce we kierych blank ci niy bydom mieli co ze sia zrobic, kaj sie podzioc. Tyn ci to synek, lo kierym zech przodzij godol tyz bydzie rod, co szula jes forbaj, nale cy bez tyn colki czos, te dwa miesionce latowe niy zmierznie mu sie tyn fuzbal i to bez jodla z ranca? Niy miarkuja jak tam u niygo, nale tyz mi sie na isto zdo, co kajsik na feryje sie niy wykludzi. Tak jak sie niy wykludzom te dziecka, kiere bez colki rok niy zawdy mieli co na sniodanie, niy zawdy mieli co na lobiod. Przeca niy kozdym lojcom styknie jejich geltaku lebo zasiylku coby dzieckom fondnonc jakiesik wywczasy, jakiesik kolonie, hajocikowy oboz abo jesce co. Niy kozde lojce bydom same poradziyli kajsik wyjechac, wykludzic sie na chocia ze dwa tydnie ze swojom familijom i jejimi dzieckami. Juzech lonskigo roku medikowol po jakiymu tela dziecek loto, tyro bele kaj po placu, u nos kole hasiokow, wele klopsztangi, kiej jesce niy tak downo bez te dwa latowe miesionce kole mojigo familoka blank cicho ci bolo, bez larma, bez chichranio, bez wicnych grackow.
We wrzysniu dziecka wrocom sie nazod do szule i bydom na kalopy, jedne przed drugimi lozprawiac kaj to byli, co loglondali, i ino tymu, kiery poradzi na isto festelnie bajerowac, mozno sie udo inkszych zamamlasic, ize mu fto tak richtik uwiyrzy. Chocia kozdy zolwizol wiy, ize to, co lon polozprawiol to tak po prowdzie ino we telewizyji ujzdrzol. Som i take, kiere bydom ci mieli co lozprawiac, cym sie asic. Malo mie pieron niy szczelol jakiesik dwa tydnie tymu nazod, kiejech ujzdrzol i uslyszol we telewizyji trzi take angyjbery, festne aski, zadufane we sia jak jedna przed drugom chwolno rzic godala :
– Wiycie, moja dziolcha to i na balet lamzi, i ucy sie anglickigo i miymieckigo. I tela ci mo roboty, ize blank niy wiym ezli styknie jeji czasu coby nojprzodzij na Cyprus pojechac (tam jesce godajom po angiylsku i pyndalujom lewom zajtom), a we siyrpniu kajsik na Bajery coby doszlajfowac tyn jeji miymiecki.
Zasik inkszo tropiola sie, ize rechtory niy kcom jeji synka bez colki rok szkolny wypuscic chocia na dwa tydnie do Italijancow (bo razinku mamulka kciala do lojca Swiyntygo sie przejechac wteda gynal, kiej jesce niy jes tak gorko).
– Bo wiedzom loni, ize te rechtory zodnygo smiylowanio dlo mojigo synka niy majom, a lon przeca niy poradzi durch, bez colkie dziesiync miesiyncy szczimac we tyj loszkliwyj szuli.
Trzecio zasik flalma niy poradziyla sie nadziwac, ize niy wszyjskie dziecka kajsik bez lato sie wykludzajom.
– Przeca takim lojcom trza by jakosik sztrofa dac, ize te jich dziecka sam we miyscie bez colkie lato tyrajom, miast kajsik na luft popyndalowac. Przeca to je skoranie boskie ze takimi lojcami, pra ?
Bo poradzicie sie forsztelowac takigo lojca, kierymu na isto werk lebo gruba zawiyrajom, abo mamulka, kiero dziepiyro terozki mo utropa, co dzieckom za tyn zasilek dac pojesc, terozki, kiej juz niy bydom mogli sie dziecka we szkole nackac? Dobrze sie drzisto takim mamulkom, kierych chop abo sie polityki chyciol, abo kajsik za prezidynta mo fucha, lebo cosik takigo. Niy poradza ino spokopic, kaj sie podzioli te czasy, kiej jo za bajtla, bolo, ize i bez dwa miesione bol kajsik na koloniach lebo harcyrskim obozie. I wteda, kiej my prziszli po labie nazod do szule, to kozdy, chnet kozdy, miol co do polozprawianio lo tych latowych miesioncach.
I na psinco sie zdo te colkie godanie tych wszyjskich angyjberow Przemkow EDGAROWICZOW z Gosiewa, tych (na wiyki, wiykow amyn jongferow) Jolantow, kiere maslanymi slypioma gawcom za tym nojwazniyjszym, ze tych naszych cwilingrow ( co to jedyn mo baba a drugi ... kota – nie miarkuja, kiery jes kiery!), bo terozki prowda we Polsce to jes jak rzic: kozdy mo swoja! I tu mi sie spomniol jedyn fal. Chop po poruch sznapsach po klynczoncku na dylinach we izbie napoczyno wajac:
– Jak nom je we Polsce dobrze, jak nom jes na isto dobrze ...i dobrze nom tak !!!
Lozprawiala mi kiejsik jedna rechtorka, ize po feryjach dala dzieckom do naszkryflanio bez sobota i niydziela alfgaba : co zech widziol, kaj zech bol bez feryje? We pyndzialek pola dziecek niy przijnszlo do szkoly, poruch ci ino naszkryflalo tela, co byli u starzikow za Panywnikami. A ino jedyn mondrok naszrajbowol pol hefta lo Egipcie. Ino, ize tyn istny juz poszol terozki do prywatnyj szuli bo lojciec pedziol, ize niy do dziecka we naszyj „siedymnostce” na zmarnowanie. No ale, dzisioj lo tych loszkliwcach niy kciolech blank godac.
Mozno mi zodyn tak doimyntnie niy uwiyrzy kiej powia, co jo miol dziosecko rod pyndalowac do mojij szuli, do naszyj „siedymnostki”. Mieli my tam richtik szykownych rechtorow, gryfne rechtorki, a i zawdy cosik sie tam lod ranca na isto dziolo wicnego, interesantnego i takigo, co cowiek aze do starych lot boczy. I piyrszo libsta, i piyrszo cygareta. A na lostatek, kiej my juz wylejzli ze tyj siodmyj klasy (wteda jesce bez zodnych „ekszperimyntow” podstawowka zetrwala siedym lot, a technikum niyskorzij – piync lot). Spominom sie direkt tyn lostatni rok. Cowiek miol na isto polno rzic tyj szule i tak po prowdzie to nojlepszij jakomsik bergom by gruchnol na nia. A dzisioj? A dzisioj festelnie zol tych lot, kiere sie juz niy wrocom. Aaaa, co tam. Nojbarzij to mi sie spomino koniec roku szkolnygo i fajer. Moja Mamulka robiola we takim wywolanym werku we Katowicach i beztoz my ze bracikiym mogli napytac kamratow i frele ze dziolszynnyj szkoly (to bola „loziymnostka”) na balanga do nos do dom. Wiycie na tako jak to spiywol ci kiejsik Zynek Laskowik ze tego kabarytu TEY:
„Starych nie ma,
chata wolna,
oj, bedzie bal,
oj, bedzie bal ...”
No, i te piyrsze kusiki kajsik we antryju, we siyni. Mie ci taki fal trefiol, ize chnet bych slyp przi tyj balandze straciol kiejech grajfowol do sztrymfow a loroz ci mie bez pysk prasknol jeji sztromfhalter. Ludzie, to ci bol wteda tyjater.
Terozki ze inkszyj zorty. Krom rechtorow, to mieli my jesce naprowdy we szuli szykownych, roztomiylych kapelonkow. Nojbarzi to byda boczol tego ksiyndza Ignaca Szpunara, kiery symie kapistranta we Jozefce zmachlowol, a kierymu sie umrzilo trzi lata tymu nazod przi napoczniynciu czerwiynia (2 czyrwca, a miol ci Lon 76 lot). Bol ci Lon u nos na farze jakiesik trzi-styry lata kiejech pyndalowol do podstawowki. Po niym prziszol do nos kapelonek Wala, kiery miol „polipy” w nocholu i krzonkol choby no ... niy rzykna jak. Sniym toch ci miol lostuda (a jesce wiynkszejszo – moja Mamulka).
Nale, podle raje. Jo miol pieronym rod cytanie. I kiej zech wszyjskie tam Morcinki i inksze take przecytol, wzionech sie do lepszyjszych buchow. Lo „Trzech Muszkieterach”, lo „Hrabim Monte Kristo”, lo tych roztomajtych „Potopach” i takich tam, niy byda godol. Jo sie wzion za blank, nale to blank inksze. A, ize nasza biblijotykarka ze Ogrodowyj (ja, ja, tak sie downij ulica Kalidego mianowala) bola deczko slepawo i niy poradziyla spokopic wiela jo mom lot, toch poradziol wywlyc i „Nana”, i inksze tajle tego colkigo Zole, lo kierym moja Mamulka tela ino wiedzieli, co lon same swinstwa lo babach szrajbuje. Do kupy z tymi miolech ci rolz we szkole „Przygody Dzielnygo Wojoka Szwejka”. Ta ksionzka na isto tak mi sie zdala, takech jom miol rod, ize do dzisioj drugda, lecy kedy wrocom sie nazod, choby do mojich modych lot.
Toz kiej tyn ksiondz Wala ujzdrzil u mie tego Szwejka, chlastnol mie dwa razy bez pychol, zebrol mi jom i kozol na drugi dziyn przijnsc do szule ze Mamulkom. Jakech sie niyskorzij zwiedziol wszyjsko to bez feldkurata Otto Katza, nojbarzij napranego kapelonka jakigo poradziol tyn colki pepik Ha ek wysztudiyrowac, wypokopic, a ku tymu jesce Zyda przekrzszonego na naszo wiara. Do dzisioj widza jesce tego szalszpilera, Hru inskigo, kiery grol tego Szwejka, jak napocznol slimtac, kiej tyn felkurat mszo lodprawiol, i na srogij kazatelnicy prasknol bol drzewniannego janiolka bez rzic, bo mu sie tyn janiolek ciyngiym zwyrtol nalopak. Bolo ci tam we tyj ksionzce naszkryflane, jedyn taki mondry konsek, ize:
„...ludzie ze colkij Ojropy deptali nikiej biydno gadzina na rzyz, na wojna kany jejich wiydli masarze-cysorze, krole, prezidynty (...) a krom jich kludziyli jejich tyz kapelonki roztomajtych religiow ...”. I niy godom to skuli tego, ize nasze wojoki tyz tego Amerikona u tych Araberow hilfujom, niy. Ino co wiela mondrygo ci we tyj ksionzce bolo.
A fto boczy jesce jak tego Szwejka lodgrywol we katowickim tyjatrze som Kazimierz Brusikiewicz (tyn downy Malinowski ze „Podwieczorku przy mikrofonie) ?
I to ci sie wszyjsko tymu naszymu kapelonkowi Wali niy zdalo, i beztoz tyz moja Mamulka musieli deptac do szkoly (tak po prowdzie, niy bol to piyrszy, ani lostatni rolz).
Pedziolech na napoczniyncie, ize momy feryje. A momy my tyz, bo te ze tyj Wiejskich wykludzajom sie na dwa miesionce mozno kajsik do Egiptu nikiej tyn stary purt ze tom „gwiazdom”, co jeji niy styknie na cycynhalter abo tyn lod tych „kamaszy”, kiery niy poradziol spokopic lo co idzie tym wojokow tam we Afganistanie.
Dziecka poradzom nojlepszij wszyjsko wypedziec, co jejim na leberkach slygo. Jesce tak podwiyl niy bolo fajrantu ze szulom rechtorka sie spytala jednego takigo miglanca:
– Suchej ino bercik, a co to jes we Polsce „ELITA” ???
– Ano, pani rechtorko, to jes ... „elita intelektualno ze PGR” !!!!
Som i inksze szykowne slowecka wszyjskich modziokow. Jes take jak : „dokladnie’, jest „cool” i jes jesce pora inkszych a mie sie nojbarzij zdo take: „Jezes SUPER ... beznadziyjny”!!!
I niy ma sie co chichrac. Przeca som Endrju „Lepejro” Lepper pedziol bol kiejsik ( na jubilyjom 15 lot Sampoobrony), co jejigo som „PONBOCZEK szanuje”, mo we srogij zocy i reszpekcie. A skany Lon to miarkuje ??? I, Wiycie co, zodyn ze naszych biskupow sie niy lodezwol na tako breweryjo.

No ale, co sam jesce fandzolic, kiej te na tyj Wiejskij kcom zakozas wszandy kurzynio. I jak sie sam niy zakurzic, kiej faflo Giertych abo Lepper bo przeca juz i te nojwazniyjsze we Polsce Biuro Ochrony Rzadu (BOR) slazlo na psy, kiej oficyjery muszom psioki Dorna i lod prezidynta, i lod inkszych wykludzac na swiyzy luft. Nojgorzij kiej te ,co deptajom ze psiokiym lod lecha trefiom sie ze tym kotym lod Jaroslawa. I mozno styknie tyj polityki, bo co za tela to ci i kormik niy zezre.
Toz terozki mozno cosik dlo szpasu, cosik wicnego. Maly hanysek bez colki rok we tym jejigo gimnazjom szporowol wszyjskie betki, kozdy taszyngeld i kiej dociep jesce zlocioki, kiere erbnol lod lojcow i starzikow za gryfny cajgnist ze szuli wybrol sie na lodwieczerz do – dejcie pozor ! – „agyncji towarzyskij”. Kuko tak naobkolo i na lostatek lobsztalowol sie jakosik szykowno frela. Po poruch minuteckach wlazuje do izby dziolcha, gawcy a to ci jes ... to ci jes jejigo rechtorka lod polskigo!!!
We Polsce niy ma reskiyrowania krajym. Som ino „konferyncje prasowe”. Niy byda sam rzondziol lo tych dwioch cwilingrach, bo tego juz wszyjskie majom polno rzic, ale lobejrzolech tako „konferyncjo prasowo” tego „konskigo leba” we lonski pyndzialek, kiery mi gynal klapuje do takigo jednygo gryfnego wica:
Ruski pyto sie Hamerikona:
– A wiela to wy mocie pola we waszym kraju?
– Ano, mocka!
Hamerykon sie pyto ruskigo:
– A wiela to na isto wy mocie tych pasionkow”
– Ano, trzi razy tela, co wy i jesce lobiyli na ekszport do inkszych krajow posywomy i to bez pijyndzy a ino za „ruble transferowe”!
No, to jo jesce kciolech spytac – godo Hamerikon – wiela wy mocie tak na isto komputrow i szczewikow dlo waszych ludzi???
A na to Rus:
– A wy to Murzinow tlocecie, pierecie nikiej sto dioskow !!!
I tak tyz na tyj konferyncyji prawiol ciyngiym tyn ze tom konskom fresom i jejigo utrzidupskie!
Ale, to juzas polityka a miolech juz sam lo tym niy godac.
Prziszlo juz yntlich lato. A to niy dlo wszyjskich jes takie gryfne; pamponie kcom dyszcza, ulichy a juzas te, kiere sie wykludzajom na wywczasy, kcieli by coby bolo gorko i klara blyndowala choby we Africe i grzola nikiej halbecka starzikowyj warzonki, starzikowygo kwiciska. I sam mi terozki gynal sztimuje taki wic:
Przikludziol sie ceper, miastowy kajsik we Tatry. Piyrszo noc przenynol, bo mocka siolo i z ranca pyto sie bacy u kierogo zahaltowol:
– A wiycie wy baco, ize wom dach slondro, dach...przeciyko?
– A miarkuja, i co?
– To trza by go jakosik zrychtowac, prowda?
– A trza by go sprawic, trza!
– To po jakiymu tego niy robicie, co?
– Ano, to jes tak: dzisioj siompi, to tyz niy idzie na tyn dach, na te kalynice wlazowac, prowda godom ?
– Prowda – godo lytnik. – A kiej juz niy ciulko, to przeca idzie, pra?
– Ale wtynczos ... po co ????

Kiejsik sie ftosik pytol mojigo kamrata Antka Pospiycha:
– Antku a po jakiymu tyz mosz tako srogo glaca a niy kudly na gowie jak szykownuy jakisik chop?
– Ano, bo jo te wosy na lato wcierzom (wciongom) rajn do gowy coby sie lone niy przichyciyli, niy prziskwarzili na tyj mojij palicy!


I to by bolo mozno na tela przi tym piyrszym latowym tydniu a berol i wynokwiol jak we kozdo sobota

Ojgyn z Pniokow