Szpaniol 15.12.2006
Witom!Cosik cicho tukej. Pszeca to niy moze byc ze wszyscy nogle mordujom karpie i niy majom casu szkryflac.
Za to jo Wom lopowiym historio ftoro sie wydarzyla naprowdy na jedny grubie - ale niy na Wieczorku - cheba w 1971 roku jak sie niy myla a jo byl swiadkym tego.
Na jednym szybie robilo na kozdy zmanie po jednym elektryku ftorzy lodpowiadali za wszyske urzondzynia na wiyrchu no i na podszybiu cyli na dole. No i stalo sie ze jedyn z nich szed na emerytura no ji kerownik szukol dobrego elektryka na jego miejsce. Bylo dwoch kandydatow, loba gorole. Piyrszy nazwijmy go Bolek, byl dzialacym partyjnym no i dodatkowo byl ormowcym. Jymu strasznie zalezalo na ty fusze bo tyn szyb stoji blisko jego domu. Jego kobiyta tysz robila ale sztyjc na rano. Wiync jak miol szychta na rano to w casie szychty lotol do chalpy coby dzieci wyprawic do szkoly no i psziszykowac lobiot. Drugi, nazwijmy go Lolek byl bezpartyjny i tysz miyszkol blisko szybu i zalezalo mu na ty fusze lokropnie bo mog w casie szychty kontrolowac swoja baba ftoro mu rogi psziprawiala podobno. Kerownik tego oddzialu dobry fachowiec i ludzki cowiek ale bezpartyjny. Lolek byl zawsze lusmiychniynty a co wazne lopowiadol wice polityczne. Jakosik sie dowiedziol Bolek co kerownik cheba jednak na tyn szyb posle Lolka. No tos Bolek sie wiela niy namyslol ino poleciol do komitetu wojewodzkigo partii na Lolka. Co tam pedziol niy wiym. Lolkowi ftos lo tym donios ze sie nim interesuje wojewodzka komisja kontroli partyjny. Zacynalo byc niy wesolo do Lolka. W tym casie tsza bylo wykopac row na kabel do loswiytlynio na drodze. Wiync Lolek kupil sie notes i poszed do kerownika ze lon chce robic czyn spolecny i bydzie dziynnie 2 godziny kopol tyn row na kabel. Kerownik sie zgodzil. No i Lolek 2 godziny dziynnie kopol tyn pierzinski row. Po kozdym takim 2 godzinnym kopaniu szed do sztajgra coby to potwierdzil w notesie. Niy tfalo to dugo bo jednego dnia kerownik loswiatcyl ze dzis pszijyzdzo komisja kontroli partyjny i wszyscy momy lo drugi byc lobecni na tym zebraniu a szczegolnie Bolel i Lolek. Wszyskich nos zaprowadzili na swietlica i zacon sie cyrk. Lolek szed snami i pod pachom nios jakosik ksionszka. Pszijechalo 3 facetow no i nom pedzieli co jedyn towarzysz bronionc dobre imie Polski i partii chce coby s tym zrobic porzondek. No i zacyni na Lolka rycec, pamiyntom ze godali cosik ze szkaluje polska a co za tym idzie i ustroj w wicach miyndzy innymi i jes wrogym socjalizmu. Kerownikowi tysz sie loberwalo ze niy reaguje na to i tam take duperele. Niy zapomna tego jednego z ty komisji bo byl swidraty i my sie po cicho sniego smioli.
Teroski bydzie final i nad tym co pedziol Lolek warto sie zastanowic.
Jak jusz sie wyryceli loskarzyn na wciepowali Lolkowi to zadali mu pytanie co lon na to? No to Lolek wstol i sie jich spytol jak dfugo loni som clonkami partii, cyli zacon jich egzaminowac. Kozdy s ty komisji pszescigol sie w latach pszinaleznosci. No to Lolek jim pedziol ze zodyn snich niy jest dobrym komunistom bo niy czytali dziel Lenina. Loni sie rociepali na niego ze pierdoly godo i tak dali. No to Lolek wyciognol ta ksionsza co jom pszismycyl ze sobom a byl to jedyn z tomow dziel lenina - Lynin tych tomow naprodukowol ze gowa boli - i zacon cytac. Wszyscy cekomy co tysz mondrego wycyto. A lon pszecytol mysl Lynina ze "nawet wrogym mozna socjalizm budowac umiejyntnie go wykorzystujonc". Chopow zatkalo a lon szed dali i pado jo jes wrogym godocie ale buduja w polsce socjalizm i pado loboccie sie wiela godzin jo pszerobil w cynie spolecnym. Potym dol jim tyn swoj notes. Komisja postanowila co sie naradzi i do lodpowiedz na papiyrze. I lodpowiedzi niy bylo i ani Bolek ini Lolek na tym szybie niy robili bo kerownika loba wkurzyli bo ta komisjo tysz na niego nalatywala.
Dobrze ze tak sie to skoncylo. Ino co loni o loba? Niy wiym cy do siebie godajom? ale jedno jes pewne Bolek w casie szychty lobiadow niy bydzie warzyl a Lolek swoja baba kontrolowol.
Szpaniol