Szpaniol / Szopynice, grudziyn 2007
A moglo byc tak gryfnie. Ftosik tam naszkryflol, coby Kapryska niy lobrazac cy jakosik tam. Trocha my sie posmioli, trocha pogupocili, a tu nic ino blady strach pot na Laubiorzy. Kozdy sie boji gymba lotworzyc, coby na niego lobroncy Kapryska niy ruszyli s atakym. Kaprysek tradycyjnie stanyl na wysokosci zadanio i zacon poszukiwania na Laubie fto tysz go zakapowol i ujawnil fotka naszego Kapryska. Cheba sie telefony rozdzwonily abo prywatne majle zacyny furgac, coby kamratki i kamraci lodpowiadali na pytania Kapryska. Niy jedyn pewnie cuje sie jak na spowiedzi. Szkoda, ze mu zodyn niy powiy do ftorego kamrata mo zadzwonic, bo tyn kamrat wszysko wiy i na pewno bydzie wiedziol. Tyn kamrat jusz prowadzil prywatne slectwo i znolos winowajcy, ftory naszkryflol „Dekel Kapryska”. Tyn Ci mo nosa, nic ino mu zowiscic, jusz rycol na colke gardlo: Ganba ! Ganba ! A skoro lokozalo sie, co sie luftnyl, to zamknyl gymba i nawet niy umi pedziec pszeproszom. Pewnie mu teroski GANBA ? Cheba tysz jes niylomylny jak nasz Kaprysek. Jo ino cekom kedy mie przeprosi, bo jeszcze i inne gupoty szkryfllol ftore wzion z luftu. Teroski Kaprysek bydzie musiol Scotland Yard w to zaangazowac, bo zostala ujawniona fotograficzno tajymnica Najjasniyszy Tyski Rzeczypospolity. Ciekawi mie ino, kedy sejm powolo Komisyjo do zbadanio tego wolajoncego o pomsta do nieba wydarzynio. Dobrze by bylo, coby colko Lauba sie sciepla i zatrudnila jakigo prywatnego detektywa z psym. Pies powonio tinta, gipko znojdzie slad i tam bydzie zapiepszol a iskry bydom spot pazorow blyskac. Ciekawe, cy zdonzy doleciec cy tysz borocek zapolynio pluc dostanie. Teroski Kaprysek siedzi w chalpie i medykuje, czymu Bunie niy wytresowol na psa sznupioncego. Bo nojlepsze psy cyli Cywil i Szarik jusz downo niy zyjom,a kaj znos takigo dobrego psa sznupioncego? Potym ino jeszcze pedziec policjantowi, coby tysz rospocon poszukiwania, bo prokurator ino gicale zaciyro,bo gupszy sprawy nigdy niy bydzie miol. I sie bydzie zastanowiol, bo kary smierci niy moze dac winowajcowi, na Sybir zeslac tysz niy moze no to co s takim zrobic ? Jo podpowiym: za kara musi pszekopac pod gymiza Kapryskowi logrodek. Pszeca do takiego schorowanego chopa to bydzie jak balsam na serce ( ze lo sebleconych frelkach niy spomna ). Jo tymu Kapryskowi wspolcuja. Borocek tak sie myncy, take wygibasy pszi fotoaparacie robi, coby fotki byly super, a tu nogle ftos mu podbiyro tak wybitne dziela artystyczne „Ftorego prawa autorske nolezom do jego autora”. No to wedlug ty myslii prawa nolezom do fotoaparatu a niy do Kapryska. No i te kacuszki i labondki na fotkach, ze lo innych dzielach artystycznych byda cicho. Mie ino ciekawi, cy te poszukiwania pszerwol nasz Kaprysek na okres swiont ? Zdo mi sie co niy, bo to jes taki okres kaj bydzie mog pszesztudiyrowac wszyske zapisy w Laubie i moze trefi na slad winowajcy. I ftedy zymsta bydzie srogo, wszyscy laubiorze sie dowiedzom, fto to jes i gipko bydzie glosowol coby go wywalic z Lauby i potympic za te straszne pszewiniynie. I lobowionskowo wszyscy bydom musieli swiadcyc, co winowajca naruszyl tajymnica panstwowo lo wysokim stopniu tajymniczosci. W pszerwach miyndzy kolyndami pewnie cos mondrego wpadnie mu do gowy i sie lokowe, co tsza bydzie wydac tak jak Mao ksionzecka pt „Zlote Mysli Kapryska”. Jusz zamawiom pora ksinzecek. To ci bydzie dzielo nad dzielami, ino cy sie do to spolic? Cheba niy, bo zodny mondosci niy idzie spolic ale zezric idzie. Ino co bydzie, jak zacnom fotografowane frelki szukac winowajcy ftory jich knipsowol bes jejich zgody i puszczol na lauba?. To ci bydzie ubaw, bo z loskarzyciela stanie sie nasz Kaprysek loskarzonym. Na a ta lobronckowano gadzina, ftoro Kaprysek knipsuje cheba tysz podlego lochronie i tysz sie moze wnerwic i zazondac odszkodowania. No tosz mo Kaprysek problem, bo s tego knipsowanio wylazom jakesik kobyly i zakozane tymaty. Na to jes rozwionzanie, kupic sie kibel emulsji i zaconc sztrajchowac izby to moze sztrajchowanie sie udo i pszyndom pomysly na gupoty. Ale coby pszi tych swiyntach bylo wszysko dobrze, tosz skaladom propozycjo: zrobmy sciepka i wydejmy „ Dziela Kapryska „ - jako tom I, a jako tom II album fotek pt „Kapryskowe Foto-Pierdoly”.Ino tak se mysla, jak to casym ludzie mogom zgupiec skuli labondka ?No loboc si, Kaprysku, taki Sztyrlic wlos Ci do Lauby a ty niy umis go znos! Szukosz Kaprysku wrogow a zapominos, ze to som Ty jich tworzys. Pomysl nad tym, coby niy bylo za pozno. A jo w pszeciwiynstwie do Ciebie zrzekom sie wszelkich praw autorskich do tego tekstu.
Szpaniol