Szpaniol 08.02.2007
Frela nigdy niy wierzyla ze lostanie szwesterom i to jeszcze jak waznom szwesterom. Lot nojmodszych lot marzyla coby zagrac we filmie. Pszeca tyla fajnych jak lona dziolszkow lostalo gwiazdami filmowymi to cymu niy moze i lona tak mysli. Jak postanowila tak tysz zrobila. Wycytala w Trybunie Robotnicy, ze Kutz na Nikiszu krynci film Sol ziymi corny. Po cichu coby zodyn niy widziol i slyszol poszla do kuchni wziyna wieprzka szkarbonka i gipko sniom do chlewika pichla. Tam dwa razy motkym klupla w szkarbonka i piniondze co tak dugo zbiyrala wylecialy na ziymia. Dobrze ze niy do marasu. Gipko je pozbiyrala i jeszcze ros policyla. Ucieszyla sie strasznie ze ji na banka starcy coby na Nikisz dojechac. To co zostalo ze skarbonki za chlywym zakopala. Gipko do chalpy poleciala, wysztajfirowala sie i zacyna gipko na banka leciec coby zdonzyc zanim bydzie ciymno. Pszijechala na Nikisz i widzi pelno ludzi na rynku. Wszysko wymieszane. Frela locy pszeciyro bo niy wiy fto w tym filmie gro a fto psziszet sie pogabcyc. No a co nojwazniyjsze dojzala slypiami wybitnego rezysera cyli Kutza. Poprawila sie szlajfki we wosach, pszejzala sie w zdzadelku kecka poprawila i idzie do niego. Zacyna mu tam fandzolic ze lod dziecka grala rozne role w teatszyku pszedszkolakow i miala straszne powodzenie. Wszyscy lojcowie ji klaskali jak wystympowala no i chciala by sie sprawdzic w tym jego filmie. Kutz ji sie pszijrzol i niy wiela brakowalo a spod by ze stolka. Ale sie lusmiychnyl i ji lodpedziol, ze wszyske role jusz som obsadzone a zresztom lon amatorek niy zatrudnio. Frela pado jo moga nawet worki z pioskym nosic na ta barykada bylech ino zagrala w tym filmie. Wy niywiycie jak mi w klasie bydom zowiscic. Kutz bol jednak niy lugiynty i pado niy. Dol Freli pora kanoldow do gicale i kozol jednymu chopu wsadzic Frela do banki. Wroco Frela nazot do chalpy i becy. Kariery filmowy niy zrobi ino niy wiy czymu ji niy chciol rezyser dac taki malutki roli. Jadymy Jo, Jorgus i Utopek podlotki bankom do Chorzowa. Paczymy i widzymy ze bankom tysz jedzie szwarno dziolszka ino camu becy. Godom puccie idymy do ni blizy spytamy sie jom cymu becy. Moze ji wto bajtlik z piniyndzmi porwol abo niy wiy kaj miyszko. Nom pszeca do gowy niy psziszlo coby sie jom spytac czy jom wtos niy sprol. Wyciongli my grzebynie i poprawili nasze frizury a la jysz, tonki lo nogawice galot lotarli i idymy do ni. Zblizomy sie do gryfny dziolszki a kozdy z nos chce byc tyn piyrszy, bo dziolszka podobala nom sie strasznie bo byla gryfno. Piyrszy byl Utopek. Wyciongnyl bombony z kapsy i zacyno jom cynstowac. Wziyna cymu niy przeca kanoldy som dobre. W tym momyncie Jorgus podlazi i godo do Frele na mosz taszyntuch wytri placki i niy bec. Tako gryfno dziolszka jak ty jesce becy. A jo godom do ni, powiydz ino nom wto cie zbil to zaroski mu nadubiymy. Tak my jom zagodali ze zgodzila sie s nami wylys z ty banki i poszli my na szpacyr do parku w Chorzowie. Lopowiedziala nom Frela colko historio
z rezyserym. Nom krew zawrala i ji godomy my tam pojadymy wartko nazot i mu te barykady i inne pierzinstwa zbulymy, niy bydzie kryncil filmu bes Ciebie gizd jedyn. I tak my sie zapszijaznili we styrech. Niy to niy byly jeszcze zolyty, bo my byli za mali. Zolycic to potym jak my sie dowiedzieli Frela zacyna z Markym a niy s nami. Lodprowadzili my Frela do dom i jadymy bankom nazot do dom. Malo brakowalo a prali by my sie w ty bance, bo kozdy z nos lopowiadol jak to sie umowi na piyrszo w zyciu randka z Frelom. Ale nom lostaly ino marzynia bo sie lokozalo, ze nimomy adresu lod Frele. Paczcie take zalyciorze a zapomnieli lo nojwazniyjszym cyli adresie kaj miyszko ta gryfno dziolszka. Cas gipko przeleciol. Nawet my sie niy sposczegli jak nos kobiyty zaprowadzily pszed oltorz piyknego dnia i z groznom minom paczyly nom piyknie w galy i cekaly kedy powiy tyn jeji przyszly chopecek TAK. Fto by sie lodwazyl pedziec NIY. Lata uciekaly kozdy z nos dochowal sie gryfnych dzieci a niy jedyn i wnukow i nawet my sie niy spodziewali kedy to sie stalo.
Jednego piyknego dnia som my na trefie u Utopka i zacyni my wspominac piykne nasze mode lata i zoloty z dziolchami. I pszipomniala nom sie nasza Frela lo ftoro by my sie prali w bance. Jorgus zacon fandzolic ze mu locka ciepala. Utopek upiyrol sie ze te locka ciepala, ale jymu, a jo jim pszipomniol ze to jo chciol sie za nia prac. Zas my wejrzeli na siebie jak kokoty, ale wartko nom sie spomnialo, ze kole nos som nasze kobiyty i niy wiadomo cy my sie tysz by lonie bili. Ale przestali my fandzolic bo jeszcze by nom daly po pysku. Na tym trefie Utopek na mie zapolowol i jo wpot do ty jego pierzinski piwnicy. Pocharatany ciynszko dychom a moji kamraci dzwoniom po karytka. Pszijyzdzo karytka i wylazuje dochtor i gryfno szwestera. Mie nogle pszestalo bolec a moich kamratow, zacyno wszystko bolec jak lobocyli jako gryfno szwestera pszijechala. Utopek z Jorgusiym dawajom ji gicala coby niy wyleciala s ty karytki. Zbadali mie i dochtor pado bierymy go do lazarytu. Utopek z Jorgusiym tysz zacyni znokwiac rozne chorobska. Utopek godol lo jakims cholesterolu cy jak tam, a Jorgus lo nyrkach. Wszyscy chcieli symnom do tego lazarytu jechac. No, ale jak lobejrzeli ta szprica co szwestera wyciongla aby mi wbic pszestali jakosik biadolic nad zdrowiym. Nasze zonki pedzialy tak, panie, dochtorze poc pan, na grila i wes pan tysz ta szwarno szwestera i szofera, sprobujecie wusztu i zieberek z grila. Lopiyrol sie dochtor ale jak nasze zonki zacyny go czarowac to, sie zgodzil. Zacyni przy grilu wspominac nasze mode lata i lopowiedzieli nasza przygoda z modych lot w bance. A jo colki cos w pszerwach jyncynio suchom fto tysz zacnie ta szwestera podrywac. Szwestera jak to uslyszala zacyna sie smioc i pedziala ze to lona jes tom dziolszkom, co chciala byc aktorkom. A jo ji godom to powiydz, co sie stalo zes zostala szwesterom. Lona pado tak, pedzialach sie tak jak niy moga ludzi bawic na ekranie to, byda jich lycyc. No ji zostalach szwesterom. Pedziala nom tysz, ze mo chopa co mo na imie Marek i cera lo imiyniu, Dagmara. My pieronym ciekawi pytomy sie jom a jak to sie stalo i jak poznala swoje psziszlego chopecka Marka. Frela pado niy uwierzycie, ale wom lopowiym. Ida ci drogom pacza a jedyn gryfny karlus cyli Marek pokazuje gicalom jednomu chopu, wtory mo w gicalach kamera i krynci to, co Marek pokoze a jeszcze inny to zapisuje. Jo ciekawo, co loni tu robiom. Podlaza do nich i sie pytom, a Marek mi godo robiymy probne zdjyncia, lobiektow do filmu Chorzow moje miasto. Wycie jak mi serce wartko zacyno bic. Zacynach zagadywac, ze jo tysz kedys wystympowala na scynie - jusz niy godalach, ze w pszedszkolu i bardzo lubia grac. Marek pado tak, hm mogymy pogodac. Zrobiymy pora ujync filmowych i sprawdzymy cy sie pani nadaje. Zaprosil mie roz na zdjyncia, ale skoncylo sie na bonkawie, bo tyn z kamerom podobno kas chycil pana w aucie i niy przijechol. I za kozdym razym co my sie spotkali wynokwiol co inszego.Zwodzil mie dugo a to pedziol, ze rezyser jes chory a to kamera jim lukradli. Ale jo jednak doprowadzilach do tego, zech zagrala gowno rola w filmie. Film nazywo sie "Frela i Marek na slubnym kobiercu" nakryncony wedug scynariusza Freli. Lo mie wszyscy zapomnieli wcinajom fuszty i zioberka z grila a jo stynkom na tych noszach. Nogle Frela pado lopowiym wom jedyn wic lo dochtorach. Jo nastawil uszy coby wszysko slyszec pszeca mie chcom zawiys do lazarytu. A Frela godo tak :
Loperujom Franka i po skoncony loperacji Franek sie budzi na swoji sali lusmiychniynty. Somsiad sie pyto Franek jak sie cujesz, a lon pado dobrze. Nogle larmo pieronowe na siyni. Szwestera leci do chirurga i slychac jak pado panie dochtorze po loperacji Franka brak jednych nozycek. Chirurg podropol sie po glacy i pado brac Franka na pszeswiytlynie tsza sprawdzic. Na zdjynciu widac w brzuchu Franka nozycki, bierom go nazot na sala operacyjno. Po loperacji Franek zas sie lobudzil lusmiychniynty i pozdrowio somsiada. Somsiod wylazi z izby, bo slyszy pierzinske larmo w colkim lazarycie. Po chwili somsiad wlazuje do izby i godo tak do Francika tys jes Francik z Gliwic a lon godo ja a cymu sie pytos. A somsiod na to, Francik jo ci godom loblykej sie w lachy i pitej z lazarytu, bo chirurg szuko paryzola.
Jak jo to luslyszol po cicho zech slos z noszy iposzed do auta. Zzapion sie pasami i godom Ewa jadymy do dom ino skokej wartko do auto coby mie ta szwestera niy dostala w swoje gicale. Ewa becy a jo godom byc cicho pacz, co te dochtory wyrobiajom w lazarytach. Lepi jadymy do chalpy. Bo pacz, co by to bolo jakby zabraklo tymu dochtorowi tego srodka do lusypianio to, co, koze mie Freli motkym uspac a potym dochtor tego motka bydzie na drugi dziyn szukal go w mojim brzuchu. Nigdy godom, jadymy do chalpy. A Frela z Markym, zaproszymy do nos na bonkawa i powspominomy pszi bonkawie lo niyludany probie uspanio mie.
Szpaniol
Szopynice 2004 rok