Lato Szpaniol / Szopynice, grudziyn 2007 Gryfnie loblecyni maszerujymy do szule po cenzurki, a lojciec w doma ceko coby je pszeswiytlic. Pologlondol je i pado mogly byc lepsze. Ale tysz nom zapowiedziol, co sie za nos weznie i bydymy kwicec, ale locyny bydom lepsze. No tosz gipko pukeltasie z heftami do konta, bo teroski bydymy lotac na placu wiela sie do. S kamratami my ustalili, co bydymy tego lata robic. Piyrszo propozycjo to olimpiada lekoatletyczno i miszczostwa w kepki, a potym wyndrowanie na Wesolo, coby i pszirobic i jako ponka porwac. Ino jedyn rok jo niy brol udzialu w tych sportowo – rekreacyjnych zawodach s powodu niyszczynscio. A bylo to tak. Jednego razu mama mie poslala do komzonu jusz niy pamiyntom po co. Z drugi strony zawolol mie kamrat. Jo sie lobrocil ale zatkym ida dali. A na moji drodze stanyla dupka z flaszki. Dupka z flaszki w prawy stopie wbito i stopa prawie ze na pol uciynto. Jo prask na ziemia, slabo mi sie zrobilo a krew sie leje. Mama gipko szmatami noga lowinyla i z bracmi na wosku zawiozla mie do dochtora. Lot dochtora do lazarytu. Lokozalo sie, ze tsza ta noga szyc. No tosz chirurg mi noga znieczulil, a jo pacza co lon bydzie robil i widza, co nawlyko nici na igla i chce sie brac za moja gyra. A jo ino na to cekol, boch miol pelno dupa strachu i zacon jo wyrobiac. Co chirurg s tom iglom zblizol sie do mogi gyry, to jo zacon gyrom ruszac. Nojpiyrw chirurg mie zacon prosic cobych sie niy ruszol, bo to nic niy bydzie bolec. Fto by tysz mu wierzyl. I zas idzie z iglom do moji gyry, a jo zas niom ruszom. Mama mie prosi nic niy pomogo. Siostry tszimiom za gyry a jo stopom dali ruszom. No to chirurg godo: zaros sie skoncy zniyczulynie i bydzie bolec a jo ci ta stopa psziszyja tak i tak. Kajsik poszet ze siostrami a w tym casie mama mi godo, cobych komedyji niy robil i dol sie psziszyc te dwie polowki stopy razym. Ale to niy pomogala. Nogle pacza idzie colko ekipa, a do pomocy wziyni jeszcze jednego dochtora. Pszez pol mie poskym pszisznalowali do lozka i noga tysz. A potym wyciongli sznura i psziwionzali z dwoch stron stopa do lozek tak, zech jusz niy mog niom ruszac. Na koniec postawili mi pszet gymbom cobych nic niy widziol forchang i stalo sie. Cosik mie tam lechtalo po nodze, ale zech nic niy cul. Po chwili bierom tyn forchang i chirurg sie mie pyto i co bolalo? Musza psziznac ze niy cyganil ino prowda godol co nic bolec niy bydzie jak bydzie szyl. Ale zapomnial mi pedziec jak te zniyczulynie minie to bydzie bolec i bolalo. No i jako kalyka spyndzil jo colke ferie we wosku a moj modszy brat musiol brac dyszel w gicale i mie wozic cobych wszysko widziol. Abo mie wozili aboch skokol na jedny gyrze. No te ferie niy byly ciekawe. No ale teroski my ustalili co bydymy lorganizowac olimpiada skokac w dal, wzwysz i lo tyczce, ciepac kulom, dyskym i oszczepym no i lobowionskowo maraton nalokolo cegielnie to kas bylo tego ze sztyry kilometry. Fotka nr 1 Ta fotka pochodzi z 1953 roku. Na ty fotce som niy wszyscy olimpijczycy ale warto jim sie pszijrzec bo fto wiy cy colki swiat by jich niy podziwial. Jakby histirio sie inacy potocyla. Tyn s prawy strony to zech jes jo wyrosniynty karlus. Tyn z kulom to Lelek, z galotami na chulzyntreglach to moj modszy brat Ludwik a kole niego stoji Hyniek. Tyn lusmiychniynty bajtel to Antek brat Lelka to byly cwilingi. Tyn z nuplym to Grzesiu brat lot Henka, lodnich brat byl tormanym w Naprzod Jonow. Fotka nr 2 Na ty fotce som my trocha starsi bo to jusz byl rok 1955. Na drugi fotce tyn z lewy w sonenbrylach to Stefan, a my go wolali Kapa, potym stoja jo a lobok mie Lelek tysz - lubil nosic sonnebryle, tyn blondyn to Grzesiu a tyn wstydliwy to Lucek – dzisioj wozy 100 kilo. Brakuje tu jeszcze poru kamratow: Franek co miol przezwisko Hazok, byl tysz jeszcze jedyn Stefan ale ze miol bryle jak szklony to byl naszym wiernym kibicym, Irek, Ziga. Tak ze nos byla kadra ze strach. Lolimpiada sie zacynala, a nasi lojcowie w loknach kukali jak tysz ich bajtle bydom sie sprawowac. A co wazne z lokna nom kibicowali. Piyrszy dziyn zodnego medalu jo niy zdobyl ani moj brat bo byli my lichymi w skokaniu i lotaniu krotkim. Lotanie na sto metrow to bylo kupa smiychu. Ta trowa co widac za tom fotkom to byla jeszcze malo a my lotali w trowie ftoro byla tako wysoko jak tyn bajtel ze nuplym. Jo niy umiol tak gipko lotac inni zas ja. Ale f ty trowie to jim sie gyry motlaly. Jak my tak pszelecili w eliminacjach to ta trowa wygladala jakby kosiarka po ni przeszla. Tak ze piyrszy dziyn byl bes medalu. Lojciec ksziwo na nos paczyl i sie dziwil cymu jego synki tak gipko niy lotajom. No ale lod drugiego dnia lolimpiady zacynalo byc ciekawie bo byly moje dyscypliny cyli ciepanie loszczepym i dyskym. Zacyni my ciepac loszczepym, jaki to byl oszczep. Kawal dugigo patyka i tyla. No to zech byl piyrszy. Lojcu sie gymba losmiola bo Stanik wszystkich pokonal. A jeszcze byla jedna dzisioj dyscyplina ftoro musza wygrac godol lojciec. Na placu byl zabudowany gulik i lon wystawol wyzy jak byla trowa i s tego gulika my mieli ciepac dyskym. Tyn gulik byl jake 15 metrow lot naszy chalpy. Jako dysk to my mieli kolko z woska dziecinnego. Stawali my na tym guliku i lobracaniym dawali my szwongu tymu niby dyskowi. Jo to dyscyplina wygrol ale final byl dlo mojego brata niedobry. Moj brat wlos na tyn gulik i zacon sie kryncic. W tym casie somsiot na parterze a miol na imie Franek jot lobiot. A moj brat sie krynci jak prawdziwy dyskobol, rynka wyciongniyto s tym dyskym a my gowy pochowali bo wiadomo to kaj ciepnie te kolko i cekali my kedy wrescie ciepnie. A lojciec gapcy z lokna, miyszkali my na piyrszym piyntsze, i ceko kedy jego pupilek wreszcie ciepnie tym dyskym. Pszes te kryncynie Ludwik stracil loriyntacjo i zamias w pole ciepnyl tym dyskym pszes dwie szyby somsiadowi do zupy. Pacza a lojca nima w loknie. Jusz zech myslol ze spod na ziymia w kuchni. Franek wyskoczyl do lokna i rycy pieronske najduchy fto mi wybil szyby. My gymba ino lotwarli i cicho. Lolimpiada na dzis zakoncono idymy do chalpy. Godom bratu no to mosz szmary. Wlazujymy do dom a lojciec pado do Ludwika pieronski lochyntolu niy widzis kaj ciepies? Co zes loslep. Poc idymy po te lokno do somsiada a potym idymy je zaszklic do szklorza. Mama zacyna bucec a lojciec godo ciesz sie babo ze mosz takich zywych bajtli bo niydorajdow bych niy sciyrpol w chalpie. Na drugi dziyn koledzy ciekawi czy brat dostal szmary. Jak sie dowiedzieli co niy to razym snami sie cieszyli. Skok wzwysz. Wbili my w ziymia dwie balaski wysoke na dwa metry i popszecka no i zacyni my skokac. Style byly rozne ale syncacji niy bylo cyli jo i brat niy zalicyli my wysokosci tak ze z medalu nici. Skokanie lo tyczce mialo swoj final nojpiyrw my skokali nad popszeckom do skoku wzwyz a jak zabraklo wysokosci to ftos pedziol co nastypno wysokosc to bydzie plot Antka. Tyn plot widac na fotce nr 2. No i my tam sie pszeniysli. Lelek dobrze skokol i to na niego pszipadlo ze bydzie piyrszy skokol pszes tyn plot. Lelek sie fechtnyl ale za daleko lot plota wbil tyczka do ziymi i leci do gory. Nogle jes nad plotym a tyczki nima. Leci na dol i tak pechowo ze sztacheta wlazla mu do nogawicy galotkow i wylazla pszet brzuchym. Nic mu sie niy stalo ale zacon ryczec bo wisiol na ty sztachecie. A coby pamiyntol ze zrobil feler to jeszcze tyczka pizla go w glaca. Jego lojciec bo miol blisko wartko pszileciol i loderwol sztacheta lot plota razym z Lelkym i polozyl na ziymi. Sprawdzil cy mu nic nima, sztacheta wyciongnyl przelozyl go pszes kolano i dol po zici. Drugi dziyn tysz sie skoncyl pechowo ale olimpiada trfala dali. W lostatni dziyn maraton no i tu lojcowie staneli na wysokosci zadanio bo dwoch lojcow za nami jechalo na kole i mieli flaszki z piciym. Niy wszyscy tyn bieg skonczyli ale zmordowani dugo my lezeli na trowie i lodpocywali. Ciynszko byla ta lolimpiada, wiela niyspodzianek dziynki ni bylo. A zech dobrze lotol i ciepol dyskym to sie poznol namie profesor z WF i pedziol co pojada na spartakiada szkol gorniczych ftoro lodbywala sie w Myslowicach. Startowol tam jedyn kalus ftory byl miszczym w ciepaniu dyskym na popszedni spartakiadzie. No i wszyscy kole niego lazili. Jo ciepol zanim. Moj profesor tszimol kciuki jak jo wlos do tego kola. Lobrocil jo sie chyba tszi razy i prasknyl tym dyskym. Zaros wartko polecieli mierzyc i lokozalo sie ze jo pszeciep dotychczasowego miszcza. Lon jusz zacon ksziwo namie paczec a inni opiekunowie tysz. Drugo kolyjka i zas jo byl lepszy. No i ftedy sie stol cud bo jedyn ze syndziow pedziol co jo mom niewlasciwy stroj i mie zdyskwalifikowali. Profesor probowal cosik wyjasnic nic niy pomoglo zdyskwalifikowany i fernik. Moj profesor musiol sie tysz kfwalic co psziwios na spartakiada dwoch dobrych zawodnikow w biegu na 1500 metrow tzn mie i takiego synka z Szopynic. No to pozostali zawodnicy dostali instrukcjo lot swoich nalucycieli coby nos wyeliminowac. Niy pamiyntom na ftorym zakryncie nogle widza co moj kolega prasknyl na ziymia, zrobil dwie kopyrtki i koniec z biegym. Jo tysz duzy niy leciol bo ftosik mi noga podstawil i tak my zakonczyli kariera lekkoatletycno. Krew s kolan leciala bolalo ale i to tsza bylo szczimac. Nasz profesor nos zawolal i pedziol co jadymy wszyscy do chalpy. No toch poznol jak to jes byc sportowcym. Lolimpiada sie skoncyla ale zawody w kepki lodbywaly sie prawie dziynnie. A teryn my mieli gryfy bo byly dwie klopsztanki w som ros na to pszigotowane. Te klopsztangi widac na fotce nr 2. Pszerwy ino musieli my robic jak somsiadki wiyszaly pranie. To nom zostawol jeszcze fuzbal. Mieli my druzyna co sie paczy a tyn s tym nuplym tysz grol. Ciynszko miol kopac w tyn srogi trowie ale niy lodpuszczol. Rozgrywali my tysz mecze wyjazdowe z bajtlami ftorzy mieszkali we finskich domkach ale tam to my sli z lojcami grac bo nos starsi koledzy zawsze chcieli pobic abo kamyniami lopciepac za to ze my wygrali. Jak my byli trocha starsi to nasi lojcowie chcieli zagrac snami szpil. Moj lojciec byl tormanym. No i jak tu lojcu szczelic bramka a jo grol w ataku. No to my locy zawiyrali i tory szczylali. A we wiecor to lojciec ksziwo paczyl na nos ze my mu torow nawciepowali. Ale wazne bylo zupelnie co innego, wazne bylo to ze nasi lojcowie tysz sie tak umieli jak i my bawic. Jeszcze w szkole podstawowy lojciec nos zapisol do klubu sportowego coby my grali fuzbal. Tam tysz bylo ciekawie. Wiadomo ze syndzia sprawdzol legitymacje szkolne coby wiekym druzyny byly rowne. Ale zdazaly sie cuda bo pszilazi z legitymacjom kalus co wyglondol na 18-sto latka a w legitymacji miol naszkryflane co mo 12 lot. Jedni grali w trampkach a inni w goulerach. Jo grol w ataku na prawym skszidle i zech tysz dobrze dryblowal. No toch wiela meczy niy grol bo jedyn wyrosniynty w gollerach mie nacechtowol i jak mie kopnyl to mi polomol w prawy nodze styry palce ale tego srogiego jusz niy umial zlomac. Odechcialo mi sie grac we fuzbal. A lato colkom gymbom, slonce swiyci a w lufcie jusz cuc co jesion sie zblizo. Szpaniol