Moja droga do gornictwa Szpaniol 12.01.2006 Lostatnio klasa Gryfnie zacon sie lostatni rok. Bo jak my ino psziszli do szkoly to belfer co bol s nami na lochotnicym hufcu pracy zawolol nos wszystkich i nom zacon wyplacac piniondze za ta robota na tym lochotnicym hufcu pracy. Lokozalo sie ze lon nos chciol wykiwac ale wtos sie pokapowol i to wysznupol. Tak ze my dostali piniondze za dwa lata i tego bolo kas ponad 1800 zlotych. No a potym zas fasujymy nowe ancugi, koszule te mantle do kostek, szczewiki no ji generalsko copko. Ciynszke to bolo pierzinstwo ale cieple. Belfry sie niy zmiynily a praktyka jusz my lodbywali na lupadowie. Tradycyjnie belfer polowol na tych co niy mieli zapiyntych knefli przy jaklach a my jako starszy rocnik razym z belfrym stoli my we drzwiyrzach i jak niy miol wtorys z mlodszego rocnika przyszyty tarczy to my mu zaroski ze swoich zapasow wciskali my 6 sztuk tarcz i kasowali forsa. I tak my sie pozbywali zapasow tarcz wtore nom tysz wciskali. W szkole nic sie niy zmiynilo, ale w naszy pamiynci tysz zostol jedyn belfer co nos uczyl mechaniki. Zawsze chodzil modnie loblecony a bol kawalerym. Pamiyntom jego szpiczaste szczewiki. I do dzisiaj sie ciesza ze nigdy niy chcial nom kopnonc do dupy. Bo ino moga sie wylobrazic jak ta szpica wlatuze mi do d… Siadol lon za katedrom i jak ino sprawdzil lobecnosc to zawsze dowol nom jakes zadanie do rozwionzanio coby my mu nie przeszkodzali jak dubie w nosie. Lon dubol i robil kulki i uklodol je na katerze a potym nimi szczylol po klasie. Jak ino skoncyl szczylanie cyli nos pusty to ruszol po klasie i chszonkol, a my go podrzyêniali. Musza pedziec ze lon nosil zawsze galotach srogi klucz wtory bol wiynkszy lod sztyla z lopaty i cheba pasowol do zomka ze sredniowiecny bramy. Jak ino dopot delikwynta co go podrzyêniol chytol go za lucho naciongol je i walil tym klucym po luchu. Jak to bolalo a i lucho bolo dugo cerwone. Egzaminy u niego boly ciekawe bo wywolywol lucnia na srodek i pytol. Na koniec pado no tako trojecka z minusym to dostanies, a ty skond zes jes nogle pyto lcnia. Jak Lucyn godol ze pochodzi ze wsi to belfer na to mos trojecka calko ale pamiyntej prziwiys po ferjach jako kura. Locywiscie zartowol bo nigdy lod nikogo nic nigdy niy wzion. Fajny chop ino te mrucynie i chszonkanie pod nosym no ji loczywiscie kozy z nosa. Warsztaty cyli praktyka lodbywali my na upadowie. Wtedy lampy na wtore my godali koplampy boly nowosciom to nom jich niy dali. My dostali lampy bomby. Tako lampa wozyla chyba ze trzi kilo i nosilo sie jom w rynce. Galoty za wielke, jakle jeszcze wiynksze no i tyn pierzinski chelm wtory nom colki cos spadol z gowy. Idymy upadowom na dol bo momy ciongnoc kabel. Ciynszko sie szlo bo szlo sie po i w glinie. Niy jednymu buty zostaly w glinie ale jakos my ta piyrszo szychta zaliczyli. Wyszli my zmordowani uciorani jakby my jusz pol roku robili w tych samych lachach, ale zadowolyni no bo my zalicyli piyrszo szychta na dole. Piyrszo szychta zalicono no ale tory do podbijanio zas cekaly. Tak ze jedyn piykny miesionc spyndzili my na podbijaniu torow no i dodatkowo forsa bola. Na wuefie nic sie niy zmiynilo, poza tym ze lod casu do casu w czasie zajync grywali my z belfrym w szkata. To ci bola frajda. Nasz naluczyciel wtory z nami miol maszyny i urzondzynia elektrycne niy ino nom wykladol ale tysz zabiyrol  na gruba i pokazywol jak wyglondo dane urzondzynie ale i jak dzialo. I tak jo miol lokazjo zobocyc na wlasne locy maszyna wyciongowo na para. Jak jino my wleêli do ty hale kaj lona stola to nom locy wylazly na wiyrch. Musza pedziec ze ta maszyna bola na chodzie i colki cos bola w ruchu. Colko hala bola we flizach i to jakich – cos piyknego. A lurzondzynia, ludzie tam sie wszysko swiycilo. Mosiynzne galki, rocki, jakes knefle i pszeloncniki. Tam depiyro widzieli my blask downych pszemijajoncych lot, jusz niy godom lo nastawniku wtory miol glowno plyta z marmuru. Tam bol zamkniynty swiat z lot lo kerych jo mog ino pocytac w ksionszkach. Jednego dnia pado haslo ze bydymy kopac row na kabel w Giszowcu, a my s kolegami wpadli na pomys coby sie urwac i is na baja. Som my na baji i idymy sie szpacyrkym z Giszowca na Wesolo i niy wiym cymu my niy widzieli ze tam nasz belfer jest przi lucniach co kopiom row, a my na nich wlezli. Jak nos lobocyl belfer, zacyna sie zadyma pierzinsko. Belfer mie poznol ale mojich kolegow niy. Na drugi dziyn u dyrektora szkoly zacyni mie lobrobiac cobych pedzio wto symnom bol, cyli mom wydac mojich dwoch kolegow co jo z nimi bol na baji. Jo poszet w zaparte. Nawet dwa razy w pysk lot mojego lojca przy dyrektorze nie zmiynily mojigo zdanio. Zacyni mie straszyc ze wywalom ze szkoly na zbity pysk a lojciec jusz sie chyba szykowol do ataku na mie. Final bol taki zech kolegow niy zdradzil, lot lojca po pysku dostol ale w szkole zostol. A koledzy moji som kolegami do dnia dzisiejszego. Na drugi dziyn idymy dziarsko kopac rowy bo ta robota bola w lesie a tam zawsze idzie dychnonc. Kopiymy i tak my sie zapamiyntali w tym kopaniu ze jedna grupa wykopala co do kopala si´ do jakiegos kabla. Zodyn niy wiedziol co to za gizd lezy w ziymi. Dowiedzieli my sie ale bolo jusz za poêno ze tyn kabel bol tajny. Wartko my musieli go zakopac a jaki bol final to niy pamiyntom. Zresztom wto tam z nos interesowol sie takimi „pierdolami”, ale kopanie rowu sie skoncylo. I tak poza tom jednom synsacjom skoncylo sie nasze rojbrowanie w szkole bo ino jeszcze egzaminy, swiadestwa i do, jedni do roboty inni dali sie szli lucyc wszystko zalezalo lot naszych kochanych lojcow. Jednych bolo stac a drugich lojcow niy bolo stac na taki luksus. Mojich niy bolo stac. Jak dyrektor nom wryncol swiadectwa to pedziol wto podyjmie robota do 1 lipca tyn dostanie urlop w tym roku, a bolo tego kas 12 dni. No to jo sie jako jedyn s piyrszych zgodzil na tako propozycjo.Ale to jusz w nastypny cynsci. Szpaniol