Romeo i Julija Szpaniol 07.02.2007 Cz I - cyli Romeo i Julija Cz II - cyli Lojcowie Cz III - cyli Zakochani Cz IV - I to by byl final Cz I - Romeo i Julija Fto to wiedziol ze srogo milos pokono wszyske niybespiecynstwa nawet lojcow zlosliwych. Miyszkajom ci na Slonsku dwie familje strasznie bogate, majom tysz i dzieci a gryfne ci strasznie. W familji Kombajnistof ftorzy w Lyndzinach miyszkajom gryfno cera majom, co niy jedyn karlus chciol by sniom zolycic. Ale lona jak ros w cyrku byla karlusa z rodu, Slusorzy z Bierunia poznala co ji sie spodobol. I tak sie loboje locami szukali asz pszes pszipadek w cyrku sie poznali. A bolo to tak ze do Tychow miesciny cyli wioski maly,cyrk pszijechol srogi. Ludziska sie zwiedzieli i tysz dziko gadzina lobocyc chcieli. Poszed tysz i nasz Romelo z kamratami ta dziko gadzina, lobejrzec jak sucho tego, co jom tresuje,jak skoko, lognia sie niy boji. Z drugi zas strony szla wartko nasza Julija z kamratkami i tak sie we drzwiyrzach namiotu dwie grupy spotkali. Nasz Romeo jak ino Julija lobocyl, slypia wywalil i zaroski serce mu zacyno wartko, bic, gymba mu sie zrobila czerwono jakby go fto lipinsztiftym wymalowol. Gyrami zacon pszebiyrac w lufcie. Niy dziwota piyrszo frelka spotkol, co mu sie widziala. Juliji tysz sie gibko spodobol nasz Romeo. I tak sie do tego cyrku loba cisli ze jusz teroski niywiadomo fto, piyrszy ale sie gicale podali. Jusz nasz Romeo frelki niy lopuszczol jak ino za gicala jom capnyl tak gibko, sniom poszed siednonc na lawka coby byc jak nojblizy tyj dziki gadziny. Nic jich niy interesowalo bo casu niy mieli bo colki cos sie w galy paczeli. Dopiyro sie loturali jak jich szturchnyl wtos i pedziol coscie sie drzymli, wynocha bo byda zamykol pedziol wachtysz tego cyrku. Loboje sie nogle z lawki serwali i lobiyma lebami sie szczasli. Bol pieronowy, gwiazdy sie w slypiach pokozaly i buly zacyny rosnonc sroge na cole ale to zodno pszeszkoda w milosci tak szalony. Dugo sie potym nawzajym lodprowadzali bo w doma zygarki lostawiali. Dzwon na kosciele jich loturol bo by tak do rana szpacyrowali. Wroco do chalpy zakochany Romelo a pszed slypiami mo swiyzo poznano Julijo. Idzie tak zamyslony kajsik w gwiazdy zapaczony ze zapomniol co w magistracie zapadlo polecynie budowac ulicne loswiytlynie. Nogle niyspodzianie loturalo Romea z betonowym slupkym spotkanie. Siod na dupa drugo jusz bula wyrosla na cole i warga rozciynto, krew sie leje a nasz Romelo tak sie mrucy to wszysko z wielki milosci sie dzieje. Skrado sie do chlapy po cichu coby lojciec niy slyszol lo ftory sciongnyl z tego cyrku. Ale ojciec spac niy poszet i ceko nerwowy na synka. Kryka tszimie w gosci coby mu pszipomniec ze downo miol byc na szeslongu przykryty pierzynom. Jusz sie tom krykom lojciec zamierzyl jak ino Romelo drzwiyrze lotworzyl ale galami lobocyl synka kochanego pszes kogos szczaskanego. Krew w nim zawrala jusz chciol leciec s tom kryjom i szukac chacharof co mu synka ukochanego szczaskali. Ale nasz Romelo zacon lojca blagac i z bulym srogim zacon mu godac jake to tysz szczynscie go dzisioj spotkalo ze zapomniol ze cas tak wartko leci a to ze slupy na drodze stojom to wina tych z magistratu gizdow. Lojciec lod Romea chop wyrywny i nerwowy niy pszepusci zodnymu kszywdy wyrzondzony familii. Matka Romela kamelek nawarzyla i synkowi zacyna lobkladac gymba coby mu ulzylo i buly z gowy poslazily. I jako matka ftoro kocho zacyna sie syna wypytywac co to za szczynscie go dzisioj spotkalo ze mu slypia nawet na drodze zawionzalo. Wreszcie Romeo jusz niy wytszimol i lopowiedziol kochany matuli jako gryfno frelka spotkol. Matka strasznie sie uradowala bo nogle ji zaswitalo ze synek teroski niy bydzie miol casu lazic grac w karty i przegrywac piniondze. Ze sie norescie ustatkuje i niy bydzie wystowol z innymi karlusami przed chalpom. Usnyl nasz Romeo snym zakochanego i jeszcze we snie marzy lo nastypny randce i tszimaniu za gicala nowo frelka. Lojciec Romea ceko w kuchni na sprawozdanie swoji baby co tysz ji pedziol jich syn lukochany. Baba chopu losprawio a lojciec galy pszeciyro. Niy moze byc pado coby nogle jakos frelka naszego synka locarowala i do ustatkowanio doprowadzila. Jednak lojca cosik mocno zeszterowalo i pedziol uwazej babo coby nasz syn pszipadkym sie niy zakochol w Juliji s rodu Kombajnistof bo wiys ze jeji lojciec robi symnom na jedny grubie w tym samym loddziele co jo. Ale colki cos robi mi na zlos. Jo wiym moja wina zech go zdzielil kufkom w leb ale bes piwa jak my byli na Barborce ale widzialas som sie lo to prosil. Czamu mi postawil gyra jak jo z jego babom tancowol. Hilda godo Jozek ale to Ty zes mu popszecinol szlauchy w kole co nimog jechac a na dodatek zes mu szurzblechy powykryncol. Jozek sie wnerwil i pado babo pszeca to lon mie walil luftplompom po lebie ze jeszcze teroski mom ojle i cos mi sie w lebie belonto. Hilda pado Jozek puc spac bo do rana niy skoncymy tego wygadywanio. Jo mom nadziyja ze to niy bydzie ta Julija. Zasnyla snym sprawiedliwych familjo Romea a szczegolnie lojcowie Hilda i Jozek. Wroco szczynsliwo Julija do chalpy myslami jes pszi Romeo ale strach pszed lojcym co mu powiy, kaj byla co tak niyskoro pszilazi ale zakochano wszysko pszetszimie.Jusz jes pod blokom kedy kawalery z jej ulicy stanyli ji na drodze. Pedzieli ji prosto w slypia co niy puszczom na plac zodnego gorola, a na tego Romela to tysz pocekajom i mu kosci porachujom za podrywanie naszych frelek. Wystraszono i z plackami wlatuje do chalpy Julija. Lojciec jusz chciol jom lopieprzyc kaj tak dugo byla ale jak lobocyl placki u kochany cery serwol sie ze szeslonga i poszukol pod piecym kawal grubego dronga. Wyleciol s tym drongym przed chalpa i jak jusz chciol piznonc jednego karlusa szlapy mu sie zamotlaly i prasknyl na zol asz ziymia zajyncala. Karlusy uciykli a lojciec Arnold zebrol sie do kupy i pomalulku po slodach szed i tszimol sie gelyndra asz doszed do miyszkanio. Siedzi Arnold z Fridom matkom Juliji i z ciekawosciom cekajom co tysz sie stalo ze na wieczerzo niy pszyszla lo casie. Zacla jim Julija lopawiadac jakigo gryfnego karlusa w cyrku poznala i ze sie w nim zakochala. Arnolda choc krzyze bolaly lod tego praskniyncio na ziymia zerwol sie z szeslonga i pyto Juliji jak sie tyn gryfny karlus nazywo i skond jest. Biydno Julija tego jednego zapomniala jak sie na randka z Romeo umowiala i lojcom nazwiska wybranka niy pedziala bo sama niy wiedziala. Lojciec ji przipomniol zo som na ksziwe pyski ze Slusorzy familjom s ftorymi niy moze byc zgody. I pado loni tysz majom takiego gryfnego karlusa co dziolszkom sie podobo ale niy podobne coby sie s tobom spotykol ze lo zyniacce niy godom. Nogle Frida godo bo to twoja stary gizdzie wina camus Jozkowi szlapa postawil jak symnom tancowol. Ty sie pytosz camu przeca lon cie loblapiol w tym tancowaniu za mocno. No tosz sie niy dziwia ze cie Jozek praskny kufkom lod piwa w leb. Lon ci chciol ino pedziec ze tancowanie bez lopglapianio to niy taniec. A zresztom co jo byda godala waliles Jozka luftplompom po gowie tak dugo asz mu sie antynka w kapelce polomala. Mosz rech babo ale to lon mi popszecinol szlalchy w kole. I dugo by tak jeszcze losprawiali keby niy kukulka w zygorze niy zakukala i dobranoc rodzince pedziala. Julija mocno sie do pierziny pszitulila i z Romeo przed locami usnyla. I tak akt piyrszy tragedii gotowy. Cz II - cyli - Lojcowie Jusz lod pol pionty rano familjo Slusorzy niy spala. Na szychta szet rano Jozek i jod dobre sniodanie coby miec sily na fedrowanie. Chce jeszcze dzisioj dokonac rzecy wspanialy za syna szczynscie w milosci chce pobic rekord we fedrowaniu pryndkosci robiynio nowego chodniki a pszi lokazji zrobic dzisioj 500 % normy. Hilda druge sniodanie cyli chlyb z leberwusztym do tasi wsadzila i do tego flaszka tyju dolozyla. Jozek zas wrazil do tasi flaszecka z niyspodziankom jak pedziol do Arnolda Kombajnisty. Romeo dzis mo szychta popoledniu bestosz w tym tydniu niy bydzie zolycynio a pozostanom do niydzieli ino marzynia. Romeo poszet lodbyc gadzina coby na swiynta bylo co zarzinac Nojpiyrw krolikom ciepnyl trocha trowy co jom urwol kole stodoly a coby za duzo niy brykali dociep jim dwie marchwie aby sie dobrze chowali. Potym klotki jim polotwiyrol i pokozol logrodek kaj ta marchew urywo coby sie sami marchwi narwali a i kapusty niy loszczyndzali. Wyciongnyl z kapsy trocha pszynicy i dwa kartofle z wcorajszego lobiadu i ciepnyl kurom na dobry pocontek. Wiyncy dostanom jak resztki z lobiadu Hilda jim wysypie. Na koniec psziszlo na kozy a byly aze tszi. Wywlyk je z chlywika na lonka i jak wbijol kolki z lancuchami coby kozy niy uciekaly,stala sie rzecz straszno. Jedna koza sie wnerwila i rogami miyndzy nogami go dziubnyla. Romeo ryknyl z bolu strasznego sciongnol goloty i paczy czy jak ta koza go dziubnyla to mu cego niy przedziurawila. Psziszed splalkany i lobolaly Romeo do chalpy i matce sie pozalil na niywdziyncno gadzina co go chciala pozbawic w psziszlosci syna. Matka to lobejrzala i do dochtora s tym is mu kozala. Zaladowla syna na furka batem szczelila i konie pogonila. Jak ino pod lazaryt dojechali larma narobila i ze szwesterom po slodach zaniysli Romea do izby dochtora. Dochtor kozol Romeo seblyc galoty i pokozac to skalycynie. Dochtor to lobocyl, poszkrobol sie po glacy, mruknyl pod nosym i pado do matki co syna mo zlego bo do roboty strasznie lyniwego. Jo tam nic niy widza coby jako dziurka byla jo wom powiym kobiyto wasz syn to leser pieronowy. Ale do pewnosci dol mu dwa dni rewiyru i przepisol eliksir sprawnosci. Romeo sie ucieszyl ze jeszcze dzisioj lobocy lukochano Julija i bydom trzymac sie za rynce jak pudom na szpacyrek loglondac labyndzie. Jak ino do chalpy wlos nasz Romeo zaroski sie szluknyl tego eliksiru, nogle gymba mu sie lotwarla dwa razy ziywnyl i slodko usnyl po tych przezyciach na seslongu. Familjo Kombajnistow tysz lod rana niy spala Frida sniodanie Arnoldowi szykowala. A ze bogato familjo byla to chopu na bajlaga kotleta polozyla i take same sniodanie do tasi wrazila. Wiedziala Frida ze zas bydzie ze Slusorzym chaja bo i Arnold na czes swoji cery chciol pobic rekord w fedrowaniu wonglo i jusz wszystkim godol ze jak niy zrobi 510 % normy to zmiyni nazwisko na Pierdola. I skrycie przed Fridom zapakowol do tytki tajemnico bron jak pedziol na tego pierona Jozka Slusorza. Ich cera Julija dwa kible wziyna i trzy krowy z radosci wydojila ze takigo gryfnego karlusa poznala. Po drodze wszyske kury wymacala coby wiedziec wiela jajec bydzie miala. Dobro gospodyni sni jes. Swiniom pomyjof nawarzyla coby szpyrka na styry palce grubo byla i szynka byla srogo. Jak ji lojciec pedziol ze na wesele cery powybijo colko gadzina coby wiedziala colko miescina ze lod Kombajnistof cera bydom wydawaza chopa ale kogo tegto jeszcze jodyn niy wiedziol. Jusz w szoli sie spotkali Jozek i Arnold jak na dol jechali i krzywo na siebie paczeli galami. Coby na sia niy paczec lobrocili sie plecami i ftos by pomyslol ze na dol spokojnie jechali. To niy colkym jes prawda bo sie zacyna walka z podchodami lod nowa. Jozek wymacol w tasi u Arnolda flaszka z tyjym jeszcze goronco. Wyciongnyl jom pomalu i z maly flaszecki dolol do tyju trocha swoji esynsji. Arnold tysz gicalom wymacol flaszka u Jozka w tasi i tysz mu dosypol cosik z tytecki do jego flaszeczki. Wartko do przodka loba rwali coby jak najgibsi dorwac sie do roboty i poprowic rekord Pstrowskigo ftory wisiol przed bramom gruby. Blisko siebie mieli przodki i s tyj zowisci chajerow posylali coby postympy w robotach locyniali. Jednak przyszed cas coby zjes sniodanie i to gibko bo casu szkoda. Potym ino z flaszecki pora lykow coby gymba pszeplukac i trza brac sie za lopata coby rekord dzisioj pod. Nogle Jozkym cos szarpnylo, w bebechach zamelalo podobnie sie i z Arnoldym dziolo. Loba sie skryncjom lecom na bok i galoty gibko sciongajom. Jako ulga fto wiy. Lusmiychniyci loba bo pod jednym sztusym kucali teroski wstali na siebie wejrzeli jeszcze niy zdonzyli puscic gicali w ruch kedy poculi w brzuchu nowy ruch. Gibko gacie seblykajom i tak przes colko szychta nic ino pod sztus lotajom. Rekordu nima ale wstyd srogi cyja wina loba wiedzom i jeszcze bardzi na siebie ksziwo paczom. Idom do dom losobnymi grupami. Arnolda koledzy pocieszajom i na piwo do szynku zaproszajom. Podobnie koledzy Jozka uprosili coby wspolnie jake piwko wypili. Siedzom w jednym szynku zwasnioni lojcowie popijajom piwko, marzom lo zymscie. Rosprawiajom lo niyludanym bitym rekordzie. Nogle Arnold niy szczimol porwol kufka z piwym i ciepnyl w Jozka. Jakby sie borok niy punknyl stracilby zympcyska. Tego Jozek jusz niy szczimol porwol stolek i tak nim wywijol ze wszyske szyby w szynku powybijol. Arnold ze strachu wlos pod stol bo nimiol sie cym bronic. Nogle policyjo sie zjawila i jich lobu do izby wytszyzwiyn zakludzila i na dodatek w jedny izbie posadzila. Ale pszodzi do lochlody pololi jich zimnom wodom. I tak loba noc pszemordawali bo niy spali ino sie nawzajym wachowali. A jak jusz do chapy pszijechali kozdy swojymu dziecku pszikazuje coby lo kszywdzie wyrzondzony lojcu nie smieli zapomniec. Co to bydzie dali przeca ojcowie sie prali. Cz III - cyli - Zakochani Norescie sie spotkali. Julija w manszestrowych galotkach na kole pszijechala coby ze swojim karlusym pszez swoja wioska mogla sie pszejechac i coby lojcowie chociosz z daleka jak gardiny cofnom to pszes lokno jak bydom kukac lobocom sie z jakim szwarnym karlusym jedzie na wyciecka. Romeo pszijechol na kole na slypiach miol bryle lod narciarzy, w krotkich galotkach na gowie miol pilotka. Jak ino zlos z kola gibko wyciongnyl z pod pachy gryfny buket blumow i wartko je Julii dol. Borocka sie zacerwiynila ale mu dziubka niy dala bo jeszcze go dobrze niy znala. Siadajom na kola i jadom na wyciecka. Sztartujom z Lyndziyn i tak jakos Julija kronzy po ty wiosce, niy wiedziol Romeo ze chciala go pokozac lojcom wtorzy przez gardiny wywalali galy coby lepi widziec lod cery nowego szaca. Ale i Romeo niy byl duzny bo jak pszes Bierun pyndalowali to lojcowie Romea przez lokno psziszlo synowo tysz galami locyniali. I tak szczynsliwi i zakochani na wyciecka do Giszywaldu nad stow w lesie pojechali. Deka rozlozyli a ze byli pyndalowaniym zmordowani to lodpocywali i godali jak jim tysz tyn tydziyn gipko minyl. Julija piyrszo rospocyna godka jak ji to minyl cas lod lostatni randki. Jak tynsknila i marzyla. Pedziala mu tysz jakigo mo gryfnego lojca ftory by za niom do piekla skocyl bo jes jedynacka. Ale pado moj lojciec mo takigo zowisnego chopa co snim robi na grubie w jednym loddziele ze strach lo nim godac. Robi mojymu lojcu na zlos. Jo wiym ze moj lojciec niy jes bes winy pado Julija ale jakimis kufkami sie prali, szlauchy w kolach pszezinali, luftplompami jedyn drugiego prol po lebie ale to co lostatnio sie stalo to tak mojego lojca wkurzylo ze mi pedziol mom uwazac na takich gizdow. Romeo jom pocieszo. Widzis Julijo wszyndzie sie gizdy znojdom. Moj lojciec tysz robi w jednym loddziele s takim pieronym co mu robi ciygiym na zlos. Moj lojciec niy moze mu zapomniec lostatni chaje bo lodni mo jeszcze teroski jakes szmery w gowie a w locach teros ponoc widzi gwiozdki. Po tych rodzinnych lopowiesciach milosc sie wyznali i pszirzekli ze zawsze sie bydom strasznie pszoc i nic jich niy rozloncy.I tak by sie jeszcze dugo losprawiali keby niy slonecko co dawalo jim znaki ze idzie spac. Pyndalujom zakochani do dom. Podjzdzajom pod chalpa Juliji i jeszcze niy zdonzyli zlys s kola a tu jusz stoji lojciec Juliji i zaproszo Romea do izby na bonkawa. Romeo zawstydzony, pysk mu sie zrobil cerwony ale z ciekawosci poszed z Julijom do jeji chalupy. Romeo wito sie z Fridom matkom lod Juliji ftoro zaproszo jich coby siedli pszi stole. Bonkawy zrobila i tortynsztiki ma stol dala. Nojpiyrw wszyscy byli zajynci wcinaniym tortynsztikow i bonkawy chlipaniym a potym tradycyjnie zacyno sie wypytywanie. Arnold sie pyto co porobisz ,kaj miyszkosz karlusie a Romeo lodpedziol na kozde pytanie jak na grzecnego kalusa pszistalo. Ze narazie roboty szuko ale niy umi znolys bo mo wiynksze aspiracje a miyszko we Bieroniu. Cosik Arnoldowi w gowie pedzialo coby dali pytol i sie dowiadywol ale Frida matka Juliji to pszerwala i pedziala coby pokozol karlusowi jake majom gospodarstwo. Zanim jednak wylezli z chalpy Arnold nalol keliszek dobry UTOPCONKI co jom po znajomosci dostol lod jednego chajera co snim robi,a ftory miyszko we Chwalyncicach, za dobre fandzolynie na jakims trefie. A do tego jeszcze mi pszinios pora kilo punek i lorzechof chwoli sie Arnold. I tak sie popijali i swoje zale na stol wyciepowali. Arnold sie chwolil jaki to lon jes pszodowy, wiela procynt normy jusz wyrobil ale pado ze w loddziele mo jednego chopa gizda pieronowego ftory mu na zlos robi. Cosik godol lo podstawianiu gyry na jakisik zabawie, jakims kufku co lotol w lufcie niywyrazne to wszysko bylo bo utopconka do leba jusz poszla. Norescie psziszed cas pochwolic sie dobytkym. Idzie Arnold z Romeo do chlywika lobejrzec gadzina. Wychwolo swoj dobytek przed karlusym i pado jak ino Julija stanie pszed oltorzym to te wiepszki bydom szlachtowane a i inno gadzina spotko podobny los. I tak poklepywol Romea po barach i nogle sie go spytol a jakbys ty sie sniom lozynil to jakby sie nazywala potym moja cera. Stanyl dumnie nasz zolyciosz, klata wypion grdyka wystawil, gyrami jak na defiladzie szczelil i pedziol Julija Slusosz. Arnold loniymiol. Faja mu z pysku wyleciala, zacon sie tszonsc. Wosy na gowie mu sie wysztrekowaly jak jyzowi kolce, bryle mu z nosa spadly, luftu mu zacynalo brakowac ale galami widel szukol abo lorcyka jakigo w chlywiku. Nic takigo na drodze niy sposzczeg, ale szukac niy pszestawol galami po kontach. Nogle jego galy lobocyly gnotek a w nim wbito siykyrka, po lostatnim szlachtowaniu kury. Skocyl wartko wyrwol siykyrka i rycol na colke gardlo ty pieronski gizdzie moji cery ci sie zachciywo. Zodyn Slusosz niy bydzie moim ziynciym. Tyn ryk Arnolda slychac bylo aze w izbie. Frida wyleciala lobocyc co sie stalo. Galy pszeciyro bo widzi ze Arnold goni Romea ze siykyrkom. I tak by dugo loba lotali jakby do gnojofki niy wpadli i lo maly figel by sie potopili jakby jim na pomoc nasze baby niy psziszly. Piyrszymu sie wygramolic daly Romeowi ftory siot na kolo i pitol a pyndalowol wiela sil miol w gyrach bo bylo niy wesolo. Arnold wlos do chalpy popaczyl na Julija i ji pedzio co mo niy myslec lo zyniacce bo za to co mu zrobila podzie do klosztoru abo jom wydo za Ecika kulawego ftorymu wrona loko wydziubala. A jak sie znerwuja pedziol na lostatek to ci znojda chopa chobych miol skoncyc z tradycjom to podzies za gorola. A ze do Sosnowca momy blisko to ci wartko znojda jakie panisko. Pszeca zech ci godol zodnego do chalpy niy wpuszcza ze Slusorzy. Julija sie rosbecala do izby uciykla coby sie wybecec i lo swojim niyszczynsym losie pomyslec. Dugo jeszcze w nocy larmo bylo w chalpie slychac. Szolki ftosik czaskol i garce. Rano sie lokozalo ze to Frida niy wytszimala i kulokym Arnolda pocynstowala coby mu wytuplikowac gupota srogo co nimo miary jak wonglo poklady. Poszet na rewiyr biydny Arnold ale jusz mu w gowie cosik zaswitalo ze pszeca to niy lon sie bydzie zynil z Romem ale uparcie przy swojim lostawol. Wartko pyndalowol nasz Romeo kochany coby ino daleko byc lod Arnoldowych gicali. Jusz wjyzdzol do Bierunia jak go zatszymali i lo karta rowerowo policmajstry sie go spytaly. Colki logupialy nie wiedziol co pedziec to mu sztrofa daly a dostol podwojno bo sie lokazalo ze swiatlo pszi kole tysz szfankowalo. Jedyn policyjon pedziol Romeowi ze za take wykroczynie nolezy sie kolegium ale loni som wyrozumiali i ze szlauchof w kole luft mu powypuszczali a do gicale mandal dali. Wszysko na lodleglos snim robili i godali ze cosik jim smierdzi. Dobrze ze mu jeszcze sztrofy niy dali ze sie niy lokompol. Wlazuje do chalpy Romeo zalomany colki we strachu co tysz powiy lojcom ze wyglondo jak swinia ucioprany w gnojowce. Jak go Jozek lojciec lobocyl zas chybnyl ze szeslonga coby poszukac pod piecym tego pomocnika dronga coby tym chacharom ros na zawsze dac naucka. Romeo spokojnie lojcowi wytuplikowol ze na skroty do chalpy jechol i kajsik zachacyl pyndalami, zrobil kopyrtka i s kolym wpod do gnajofki. Lopowiedziol jeszcze przygoda z policyjom i pochwolil sie karteckom kaj bolo naszkryflane ze za nimanie swiatla zostol ukarany. Colko noc modzi niy spali i lo swojim niyszczynsciu rozmyslali. Lod tego casu ukradkym sie spotykali a lojcowie w robocie dali do siebie niy godali. Razu jednego matka chciala poznac dziolcha co jeji synka szykownego tak do siebie rozkochala i pado Romea syneczku zapros na niydziela twoja gryfno frela. Gryfnie pszijyni Julija bo sie podobala lojcom lod Romea i tak sie lopowiadali i wypytywali asz sie w koncu prowdy docekali ze jich jedyny synek kochany u nojwiynkszego wroga poszukol sie dziolcha. Jozek niy wytszimol podskocyl do pieca i zacon szukac tego dronga ftorego tam zawsze trzymol do pomocy. A rycol pszi tym strasznie. Casym luftu mu brakowalo taki byl zawziynty w larmowaniu. Dronga niy znod ale larma zrobil kupa i jak dostol patelniom w gowa lod Hildy logupialy siod w rogu na dupa i zacon wyrywac ze swoji gowy lostatnie jake mu zostaly kudly. Romelo porwol Julija i loba pichli z chalpy coby im zodyn niy zrobil ksziwdy a co gorsze niy nakopol do dupy. W rospacy chcieli sie utopic bo tak sie milowali. W nastypnym odcinku sie dowiycie co bylo dali, bo final ciekawy. Cz IV - I to by byl final Sroge niyszczynscie modych spotkalo. Zolycic niy podzie bo lojcowie zlosliwi na to sie niy zgodzajom. Co modzi pszezywali to nojlepi jakby sami godali ale nojpiyrf zajonc sie tsza lojcami coby te dwie familije do zgody doprowadzic. Szczynscie w niyszczynsciu sie stalo bo naszego Arnolda pod ziymiom na grubie zasypalo. Lecom wszyscy ratowac berkmona dobrego coby wyszet zdrowy z wypadku niyszczynsnego. Piyrszy na miejscu z lopatom Jozek sie pokozol ze swojom brygadom i gipko zacon pod tymi kamyniami i wonglym szukac psziwalonego berkmona. Kamynie lodciepowol swojimi gicalami. Nogle cosik wycul pod paluchami i jeszcze barzi zacon fedrowac coby zycie niyznanego berkmona ratowac. Wreszcie sie udalo i colkigo zdrowego nawet nie poczaskanego Arnolda spod tych kamyni Jozek wyciongnol. Galami na siebie wejrzeli powadzyni lojcowie nic niy godali galy spuscili ale gicala Arnold wyciongnyl tym samym Jozek mu sie lodwdziyncyl i dziynkuja uslyszol lod Arnolda. Karytka do lazarytu Arnolda zawiozla coby sprawdzic cy mu sie jako pszi tym wypadku ksziwda nie stola. W tym casie modzi na lawce siedzieli i lo swoji doli colki cos mysleli. Strasznie beceli, placki jim lecialy ale zodny rady na lojcow zazartych i mstliwych niy znodli. Jusz lobmyslali co zrobiom s ty milosci wielki jak jim wlasne matki niy pomogom coby zolycili i do zyniacki doprowadzili. Jusz mysleli co pojadom do Szopynic nad stow srogi kaj miyszo jedyn lod Romea kolega i sie psziwionzom do karku jako srogo berga. Potym ino sie jeszcze pocalujom i do tego bagru skocom jak sie za gicale bydom tszimali coby nawet po smierci sie niy rozstali. Lobmyslali tysz jeszcze cy niy zrobic tego w Myslowicach zgodnie z tamtyjszom tradycjom i wyskocyc loknym jak tam wyskakujom. Dugo sie nad tym zastanowiali i niy sposzczegli jak matka lod Juliji pszi nich stanyla i poc do Juliji pedziala bo twojego lojca na grubie przysypalo i do teroski niy wiym co sie snim stalo. Julija nawet Romeowi dowidzynia nie pedziala tak wartko z matkom na gruba leciala. Jak ino na gruba przylecieli to sie dowiedzieli ze Arnolda do lazarytu zawiyzli i tam majom gipko leciec i lo zdrowiu chopecka sie dowiedziec. Lezy Arnold w lazarycie galami przewraco do nikomu nic niy godo a pod nosym mrucy i klepie sie po glacy jakby muchy lodganiol. Do szczynscio mu zony i cery brakowalo. Nogle galy lobrocil, wejrzol i lobocyl jak do niego idom jego lukochani a placki jim lecom po gymbie bo tak strasznie go kochali. Dugo w lazarycie Arnolda niy tszimali bo poza bulami co mu na gowie wyrosly no i slyp podpity jak dostol bergami nic mu nie bylo i ze lazarytu go wypisali. Wlazuje Arnold do chalpy z rodzinkom sie przywitol siod za stolym i pado ze chce zlozyc loswiadcynie za to swoje localynie. Frida z Julijom siadajom pszi stole i cekajom co tysz chce jim pedziec pan tego domu. Arnold wejrzol na Julija a ta galy spuscila a zas Frida galy wywalila. Wreszcie Arnold godo suchejcie kochani tsza prowdzie wejrzec w galy. Julija nom wyrosla na gryfno frela i tsza ji znoles synka szwarnego i dobrego. Julija jusz zacyna becec bo cula niyszczynscie ale tu sie pomylila bo lojca serca niy znala. I Arnold godo coby szczynsciu i gupocie stalo sie zados podzie Julija za Romea jak take jes ji zycynie. Julija jusz tego niy uslyszala bo z zalu srogigo zymdlala. Jak jom loturali strasznie sie radowala i swojego lojca wycalowala. Arnold pedziol ze to niy wypado coby lojcowie dziolchy sli na smowiny do kawalera dziolchy ale postanowil ze podom i Frida mo upiyc srogo zista i blacha koloca a lon pogodo s kolegom Utopkym coby mu dol ze dwie flaszecki UTOPCONKI. W niydziela popoledniu idom z lodwiydzinami do familii Slusorzy coby podziynkowac Jozkowi za uratowanie a pszi lokazji moze termin weseliska stanie. Po tak gibkim przez Julija lopuszczyniu Romea stracil lon na milos nadzieja. Wroco do chalpy colki zalomany, bececc mu sie chcialo bo jego lukochano bes slowa jednego poleciala do lojca swojego. Pora dni niy wylazil z chalpy nawet zaniydbol gadzina ftoro teroski musiala lodbywac Hilda. Jozek tysz niy lepszy miol humor. Cosik go gnymbilo i spac niydowalo przeca gicala mi dol do podziynkowanio moj wrog zazarty tyn Arnold zaciynty. I tak w jedna niedziela jak popoledniu w izbie siedzieli to uslyszeli ze ftos do drzwiyrzy jim klupie. Hilda drzwiyrze lotwiyro a Jozek galami szczylo, pszeciyro galy pora razy, niy to jes prawda w progu jego domu stoji Arnold wrog jego familji. I zas sie zerwol gipko ze szeslonga coby capnonc do familji lobrony tego dronga co go pod piecym trzymol do obrony. Ale jeszcze do tego kachloka niy doleciol jak u Arnolda w gicali flaszecka lobejrzol w kery mogla byc ino gorzolecka. Stanyl na srodku izby i cekol co to bydzie dali. Nogle Arnold wyciongnyl gicala a swoja mu Jozek podol i tak Arnold godo. Gorzolka to sprawila a gupota nos pszicmila ze my s pszijaciol stali sie wrogami. Coby ty naszy gupoty polozyc kres pszinios jo flaszecka co by my wypili i gupoty z gowy se wybili. A do pomocy bo gorzolecka mo straszny kop zaprosilech mojego chajera Bogdana zwanego Utopkym pszeca go znos bo tysz lorzechy i punki ci pszinosil. Jozek godo niych wlazuje ale coby sily byly rowne zaroski tu sciongna moje kamrata z Szopynic Stanika zwanego Szpaniol coby byl swiadkym jak my sie bratomy i lo weselu naszych dzieci godomy. I tak gorzolecka popijali, zista i koloc wrombali, a modzi w tym casie sie pszitulali i radowali ze takich dobrych lojcow majom co tak dzieci kochajom. Jak jusz wszyscy mieli w cubie modzi glos zabrali i pedzieli ze jusz postanowili co bydom razym na wieki, Romelo podzie na gruba Ziymowit robic jako slusosz a Julija zostanie rechtorkom w szkole a miyszkac bydom w nowym miescie ftore Gierek kozol ze wsi pszerobic na sroge miasto ftore Tychy sie nazywo. I lo maly figel a zas by kupa zwady byla ale pomiyndzy lojcami i dziecmi. Bo locjowie twardo na stanowisku stoli coby ich dzieci niy miyszkali miyndzy gorolami. Coby ta historio do konca doprowadzic musza pedziec ze te dwie familije przestaly sie wadzic. Remeo jes jusz na pyndzyji a Julija musi jeszcze dugo robic. Dochowali sie dwoch synkof i Romelo mo teroski problym srogi bo loba karlusy majom prawo jazdy i Romeo w tym swoim wlasnym, skromnym domu moze jezdzic teroski autym ino na papiorze a bo na komputera monitorze. Niy wazne jes auto niywazne kaj miyszkajom nasi zakochani ale wazne jes to ze do dzisioj sie kochajom i tamte piykne lata wspominajom jak w izbie siadajom i bonkawa popijajom a na dodatek Bunia chalajom. I to by bolo tyla w tym starym 2004 roku. 26.12.2004 Szpaniol