Szpaniol, Szopynice 16.12.2007
Utopce, Zmory,Szczigi i jakesik Swietliki lo tym wszystkim to nom starka lopowiadala. Godala nom lo duchach, ftore zyjom we wodzie, zamiyniajom sie w gadzina, w lufcie furgajom i zmiyniajom sie jak kamelelon. Starka nom godala, co loni zyjom blisko wody, w lesie i na bagnach, kaj tancowaly piyknie lobstrojone. No tosz zanim starka zacyna nom godac lo tych dziwnych stworach, to my sie siedali kole ni coby sie jeji kecki tszimac ze strachu. A starka zawsze zacynala swoje beranie lod Swietlikow. Swietliki - godala babka - miyszkaly na bagnach i wszyndzie tam kaj szlo sie zapas pod ziymia. I wlasnie nad takimi terynami grasowaly te Swietliki cy jak inni godali blondzonce logniki. Te logniki tak migaly, zmiynialy farby i kusily ludzi coby psziszli do nich i sie dziwowali. Niy jedyn byl ciekawy i chciol to lobejrzec. Tosz szet wartko za tym Swietlikym i nawet niy zauwazyl kedy sie znot na terynie kaj bylo bagno. I tak niyszczynsnik z ciekawosci coros bardzi zapadol sie w bagno asz zapot sie w tym bagnie. I tak Ci co niy wiedzieli skim majom do cyniynio topili sie w bagnie. Bestosz starka swojymu chopu dowala pszikozanie coby uwazol na te diosecke Swietliki, bo snimi nima zartow. Pszipominala, co mo kupa dzieci do wychowanio. I coby pamiyntol, ze z szychty mo is wartko do chalpy a niy do szynku, bo te Swietliki polowaly pszewaznie na tych co trocha wypili i z szynku do dom wracali. Nos tysz Starka upominala, coby my uwazali i niy dali sie zwiys tym Swietlikom. Coby my ze szkoly wartko do dom wracali i na nic sie niy loglondali. Bo te Swietliki to som dusze ftore pokutujom. Dusze ludzi ftorzy komus ksziwda zrobili abo byli niyluczciwi. A co wazne nigdy nikomu niy pomogli i zawsze sie plecami lodwracali lod tych co pomocy locekiwali. A jak jusz Starka zacynala godka lo Szczigach, to my mieli gynsio skora na colkim ciele. Bo Szczigi to byli tacy ludzie ftorzy mieli dwa serca. I jak umierala Szcziga to jedne serce ciyngym zylo dali. A ze Szczigi futrowaly sie kwiom, tosz w nocy wlazowaly do chalpy pszez dziurka lod kluca i skradaly sie do po colkim domu i szukaly fto jusz spi. I ftedy do tego spioncego podlazily i wbijaly w niego zymby i pily krew. Idzie pedziec, co to byly take nasze wampiry. Ludziska strasznie jich sie boli. Bestosz zanim sli spac to dziurka lot kluca zatykali, coby tako Szcziga do chalpy niy wlazla. Cy to pomagalo to niy wiym, ale skoro Starka tyla snimi wytszimala tosz to zatykanie dziurek bylo dobre. Starka jeszcze niy skoncyla godac lo Szczigach, a my jusz po kontach jich szukali galami a strachu my mieli pelne galoty. Coby grozy dodac do swojigo baranio, tosz starka dali ciongla a psziszla kolyj na Utopce. Utopce to byli take pelne zlosci i pszeciwne wszyskigo co dobre male ludziki. Som to dusze topielcow.Miyszkali we wodzie, cy to byl staw cy jakisik strumyk, to szlo tam spotkac Utopca. Taki Utoplec byl loblecony na zielono a na gowie miol tysz gryfo cerwono mycka. Ludziska musialy uwazac, bo Utopce znali sposoby coby cowieka logupic cy to spiywaniym cy gwizdaniym. I szet taki chop za tym spiywaniym i nawet sie niy sposzczeg, kedy byl we wodzie i bylo jusz za pozno. Utoplec polowol na tych, ftorzy wylazili ze szynku i byli trocha wypici. Tych to umiol tak wykolowac, ze w mig znajdowali sie we wodzie i jusz Utoplec miol ulatwiono robota. Na tych Utopcow to musieli tysz uwazac ci, co sie bulali w stowach i rzykach, bo jak sie tam znot Utoplec to gipko chytol za gyry i wciongol pod woda. Dlo tych co sie bulalia tam jusz ratunku niy bylo. Utopce tysz niy lodpuscili rybokom, ftorym targali sieci a i lodka casym pszewrocili ze zlosci. Wyndkorze tysz musieli uwazoc ,bo nigdy niy wiedziol wyndokosz, co na hocyk chyci. Oby to niy byl Utoplec. A na koniec babka lostwiala lopowiadanie lo Zmorach. Zmory to som take duchy gizdy, ftore do izby wlatuja i cekajom asz bydzie noc i wszyscy spiom. To ftedy zmora ruszala i zacynala dusic na spaniu. Coby sie pszed Zmorom zabespiecyc, to tsza we wiecor niy lotwiyrac lokna i nojlepi jakby w nocy pszinojmi jedyn domownik niy spol i wachowol. Bo te Zmory som tak ciche, ze jich niy slychac. Babka koncyla beranie i my bajtle mieli pelne galoty strachu i boli my sie, bo zacynalo sie sciymniac i my babka prosili, coby snami spala i nos wachowala, by jako Szcziga do izby niy wleciala i nom krew niy wypila abo Zmora na spaniu nos niy udusila. No tosz teroski sie wylobrozcie, ze tsza bylo is do piwnicy po wongel. Kozdy z nos szukal sposobu coby ino niy is do ty pierzinski piwnicy. Ale lata pszelacialy i nogle bajanie prawdom sie stalo. Do naszy Lauby naszkryflol Utopek. Asz mie zaczynslo i tak sie mysla: pszeca Utopce dzieci niy mieli. No to skond sie tyn jedyn wzion, ftory miyszko w wodach kole Rybnika. Jednego roku nawet lodwiydzil moj logrodek i wychytol mi ryby, ale mie sie go udalo chycic i zech go trocha w niywoli miol. Niy wierzycie loboccie sie Utopka umie w niywoli.
Tosz by bylo na tyla lo tych ducholudkach, ftore w naszy pamiynci dziynki lopowiadaniom naszych stazikow pamiyntomy. Jedni sie s tego smiejom a inni niy, no kozdy niych uwazo, jak tam chce, ale Wom powiym, ze som do piwnicy jusz niy laza i lomijom jak diobiol swiyncony wody wszyske stowy, rzeki a nawet i morza bo s tymi duchami nima hihihi.
Szpaniol