Witom wszystkich gosci i gosciowy tyz!!! Hasok 11.06.2006 Jak wiycie tyz zech tam bol. Miod i wino piol. Niy bolo tak jak bych chciol, przijechali my trocha niyskoro, skuli sztalu pod Drezdnym kaj my 3 i pol godziny stoli. Potym jeszcze my sie trocha wlykli ale lod Wroclawio bolo gaz do dechy i zykanie coby policji niy bolo. Ze my byli za gibcy  i Andzi Gogolin na koncu napisali, przejechali my  zjazd i musieli zas kajs 40 km nadrobic. Dziolcha my wziyli i dziura za dziurom, po sjechaniu z autobany, jechali my na Chechlo. Do Swiyrklanca zajechali my jakos, potym zaczli my sie bawic we podchody, abo i gra w szczalki to bola. Wyciongli my kartka lod Szpaniola, naloszczyli nasze intusy i znak po znaku dziura za dziurom podjechali my kajs nad woda. Nogle kajs ze buszu wylazla modo dziolszka, napewno wrozka jako, dala po kusiolu i zawolala nom drogowskazy. Jedyn bol dugi i chudy, drugi mynszy i lokrongly. Po poru metrach i slalomie dziurowo drzewnym byli my na miejscu. Bolo kajs kole jedynosty na wieczor. Tera sie dziypiyro zas zaczlo. Kusiole, piers na piers, klepanie po plecach. Jo je Jo, Tys je Ty. Nojlepi bo zanim zech sie z jednom prziwitol toch ji pieronym podpod. Loczami mie pora razy zabiola zanim mi rynka dala. Niy dziwia sie dziolsze, jakis cudzy mody spik ji take cos powiy. Cosik lo chlapniynciu bolo ale woda w taki ziomb!! Zanim my sie cosik na ruszt wciepli, izba znodli  i piwa napiyli to trombka zagrala  i ludzie poszli nyny. Zodnego niy trza bolo niysc, kozdy doszol do wyrka som. To juz bol dobry znak. Dziyn drugi z nocom. Jak my ze ty fojerki abo grila na komnaty poszli to juz kajs po jedny w nocy bolo. Loblykli my lozka i nyny. Moznoch nogi tyz umol. Bolo swiyzo i chodno, jak downi pod namiotym. Ale miejsca my mieli do pierona. Nogle rano, przed losmom, slysza zas ta wrozka i jakis inny glos!!! Myslolech ze snik jaki. Przeca tyn isny coch go slyszol bol pol umarty, kajs logolony ze do przedszkola by mog isc, no jeszcze go bolo skalpelym czuc. Pokozalo sie ze to bol jednak lon, lekkomyslny, lodwazny i cknilo mu sie za kamratami. Z jedny strony trza by go bolo pochwolic, z inny lop.....c. Ciesza sie jednak ze synek przijechol bo dwie fajne dziolszki prziwioz. Jak mie juz najduchy lobudziyly toch wyloz na swiyzy luft, klata naszpanowol, pora razy dychnol i do dnia sie przigotowol. Normalnie, gybis wyciong ze szklonki i przepukol. Starom bolkom po brodzie i juz bola gladko. Jako porzondny slubny poszolech sie niby z innymi prziwitac, tak naprowda to kawa do moji zech musiol zorganizowac coby mi loczy lotwarla. Potym sniodanie, wuszt bol dobry, kawa do mie i czas bolo sie na bandy dzielic. Kozdo banda wsiadla do jednego auta i za wodzym Ruku Kuku, well Szpaniol pojechali na Gruba. Jak wiycie wlok nos tyn nasz Szpaniol za sobom do Ty gruby, przejechali my przez Tarnowskie Gory coby do Ty Gruby Szczybra dojechac.Pologlondali my sie domy stare i fajne, nowe i do remontu abo i rozebranio.Taki to juz je tyn nasz slonsk. Piynkny i zadny, nowy i slamsowy, bogaty i biydny.Napewno luft je swiyzszy jyk kedys, ludziom jednak niy idzie lepi. Jak zaczlo woniac wusztym to byli my na miejscu. Jedni parkli przodkym inni zadkym. Wycieczka sie ze aut wywlykla i poszli w kierunku szole. Wszyscy, nawet nasze slonske gorole. Tera kerowniczka Ewa kupiola bilety w kasie, porachowali nos i poszli my na gruba. Tyn jedyn co sie szole bol, a gornik niby bol, tyz. Dali nom chopa co losprawiac miol lo ty grubie, przewodnik sie mu godalo. Wlezli my na sala i sie zaczlo. Tyn co miol godac niy umiol nic pedziec bo jedyn z nos wiedziol wszystko lepi!! Chop sie nerwuje ale jak sie dowiedziol ze tyn ze srachu na dol niy jedzie to mu sie zaro lepi zrobiolo. Pokozol nom jak to downi bolo, take stare znojdzione rzeczy z gruby boly powystawiane. Boly tyz stare modele szybow i inne klamory ze gruby. Potym bol sygnal do zjazdu. Kozdy wzion se jaki kask na palica i do szole. Szola to je fajno rzecz.Miejsca malo, ludzi pelno.Trza wiedziec jak sie lobrocic, coby jako fajno frelka miec przed sobom. Mie sie udalo. Sjechali my na dol, jakos my z ty szole wylezli i poszli chodnikami za przewodnikym coby sie ta gruba pologlondac. Jedyn musiol byc lostatni , coby ta wycieczka zanknonc, wiadomo jo!! Wiela zech przez to straciol. Ludziska pomalu laziyli, zanim jo kaj doszol  to juz tyn chop konczol godac. Bolo wilglo, ciymno, wonsko, nisko. Mozno jo to tak widziol. Jak sie loglondalo jak downi tam robiyli to nasz chodnik miol nojmni 10-siyn gwiozdek, tych hotelowych. Szli tak pomalusku do przodku, co jaki czos ftos klupnol kaskym lo deka. Jak yno chop pedziol, ze za jedne klupniyncie kaskym lo deka mo jedyn grzych lodpuszczony, zaczlo sie. Mieliscie slyszec te larmo jak jedyn przez drugego klupol po dece , podskakiwol coby mu bolo lodpuszczone. Tera zech wiedziol czamu te kaski take porombane boly. Zeba tela grzysznikow w naszy grupie bolo, tegoch sie niy spodziywol. Skarbnika my spotkali, polosprawiol nom troch alo grubie, lo robocie downi i czamu drzewo godo na dole. Dziwiol sie tyz ze z ty roboty to ludie tera pukle majom z przodku, niy z zadku. Szli my sie tak po dole, roz trza sie bolo patrze na prawo, roz na lewo, czasym nadol i do gory. Potym trefiyli my na miska w skale wykuto. Ponoc bola tam woda co robi fajno i kozdo choroba ulyczy. Ciekawe ze zodno kobiyta sie tam gymby niy umyla. Chopy, te to ja, lod gymby po piynty boly pierony mokre. Niy byda pisol kaj mieli nojmokrzejsze fleki. Siednoc sie jednak przez to niy umieli. Doszli my w koncu do lodek, kerymi trza bolo poraset metrow plynonc , coby sie zas do szole dostac. Posiadali nos tam tak coby ich niy potopic i pociongli nos linom. Na wiosla placu niy bolo. Choc wszyscy byli trzyzwi to po drodze sie pospiywali, mozno ze strachu, coby sie przemoc. Tak my sie doplynyli do konca naszy wycieczki. Jednym to tak nogi sciyrply co im sie wstac niy umialo. Tera yno do szole, na wiyrch i gruba zaliczono. Jak zwykle stolech przi fajnych dziolchach i to richtig. Wyjechali my na wiyrch, sprawdziyli czy woda w hazlu leci i nazod bandami do Chechla. (Dostalo mi sie lod Kristy, po tym coch napisol. Nojpiyrw pedziala ze to niyprowda z tymi Kaskami i grzychami. Sama glosno klupala to sie boi. Mialo byc inaczy, ponoc nojpiyrw klupali potym byli cicho. Na jedno wychodzi, niyczyste sumiynia mieli tak czy tak. Niyszkodzi, przezyjom to.) Wyjechali my z gruby i do Chechla na lobiod. Wzionech moja grupa i jadymy. Gadu, gadu i na jednym krojcongu miast w prawo pojechali my prosto. Za minutka bolo Miasteczko Slonske, piynkny kosciolek drzewiany tam majom, potym pora innych wsi kere niy boly planowane. Jeszcze podzimki sie kupiolo po drodze i kajs 10 kilosow po tym pieronskim Chechle, zanim my na ta dziurawo droga trefiyli. Cheba te dziolszki coch wioz tak mie lobamoncioly. Szefowo Ewa juz nerwowo bola i zaro do koryta nos zagoniola. Po wciepniynciu czegos na ruszta rozpoczla sie czyns szportowo. Szczylaniym z lufbiksy sie zaczlo. Jak nasz mistrz , tyn co to z logolonymi ze stola pitnol, porachowol wszystke punkty. Zas cygania punkty rachowala EWA, lon nom yno abo luft abo kulka do przodku pociskol. Wszystkich nos tak cyganiol, mie trzi razy luftym dol szczylac a jo myslol ze wzrok mi sie pogorszol. Mistrz yno patrzol coby wedug regulaminu bolo, co to go niy bolo. W szczylaniu nojlepsze boly baby. Tak naprowda to jedna to wygrala, yno dogrywka zrobiyli i bola cheba trzecio. Mozno i drugo. Niy wazne, nagroda dostala. Znaczy sie, sama sie wylosowala. Potym dala nom po kusiolu, no i ruszola ze swoim slubnym do dom. Reszta walczola zowziyncie lo miejsca na podium. Niy byda sie chwolol, wygrolech tyz jedna dyscyplina. Nagroda zech sie tyz wybrol, nojlepszo, mo sie rozumiec. Tera moga tak wszystkim sroba przikryncic, rula calo, ze w pale sie niy miesci. Jeszcze do kosza my ciepali, myslolech ze wygrom. Wprawa to mom, przeca dziynnie we robocie cosik do kosza wciepna. Trefiol zech tela razy co zliczyc niy umieli.Przez ta ich zawalatos jo dostol zero pkt. Nolepi bolo patrzec jak ludzie ciepiom. Kozdy inaczy. Jedyn zawodowo, choby z ligi amerykanski. Inni z kuckow, jeszcze inni na dwie rynce. Nikerzy na bacznosc, drudzy na spoczni itd. Jedna to ci tako bola zazarto na te ciepanie , godom wom colko sie seblykla, coby szwong miec. W loczach nikerych mo sie rozumiec. Fto wygrol? Niy wiym. Musiolech jechac bank lopinkolic, coby slubno na cigarety miala. Potym jeszcze z jajcami lotali, kobiyty tyz, na lyzce. Wygrol jak zwykle nojlepszy. Tak pomalusku sie tyn dziyn kulol do przodku. Trza by tu jeszcze lo jedny familiji spomniec. Wiycie jak loni zazarci byli na nagrody, polowa lobgolyli i jeszcze tymu chopu bolo malo.;-))) Nojpiyrw jeszcze lo kobiycie co szczylanie wygrala.Przeca to bola Marysia lod Norbeta. Tera jeszcze lo ty przepadzity familiji, na te nagrody. Te pierony przijechali takim wielkim autym, napewno bezto coby im sie tam te wszystke nagrody pomiescioly. Niych im bydzie. Nagrody!! Lo tym trza tyz napisac. Niy wiedziolech ze bydzie az tyla sponsorow. Co jedyn to bol lepszy i wazniejszy, tyn sponsor. Tu by trza zas ty dobry wrozce podziynkowac, za to ze takich szponsorow zalatwiola i w tak fajnych pakunkach. To trza miec gowa niy lod parady. Jak tyn ciynzarowy z tymi nagrodami pojechol, szkoda mog lostac, szef Szpaniol popatrzol po ludziach, kiwnol rynkom stoly boly zas pelne. Jak w "Stoliczku nakryj sie". Widziol synek jak ludzie wymachane po zawodach sportowych ledwo sie ruszac ze slabosci umiom. Wjechala miynso-swinia no i narybek Szpaniolowy grilowol wuszty. Wciepli my cos na ruszta i dali klachali. Ci jedni z tymi drugim a ci drudzy zas z innymi. Jo bol na tyn zynft lokropnie przepadzity, no powiym zech i pora wosztow na ruszta wciep.Ale zynft smakowol mi nojlepi. Jak juz w zolondku bolo polno i cieplo, zrobiolo sie na dworze chlodni. Wziyli my co mieli, beczki z piwym niy trza bolo brac wypili my jom,poszli my do komnaty kominkowy. W ty komnacie siedli my sie do stolow i zaczli dali biesiadowac. Ludzie jedli, piyli i lulki kurzyli. Znod sie tyz taki jedyn "Emeryt Gornik" ze swoim starym galowym mundurym. Godom wom jak sie tyn pieron lod tego czasu spas. Nom wszystkim tyn mundur pasowol a lon sie niy umiol w nim dopnonc.Widac jak ludzie sie dobrze na ty emeryturze majom. Jacy wypasiyni potym som. Jedne momy szczynscie, co to aparaty cyfrowe som. Godom wom ze filmow w Unii by braklo, tak ludzie cykali. Nikerzy malom migawkom, jak zwykle. Tak my siedzieli do nocy, klachali, spiywali, lobgadywali. Niy lobgadywali my przeca innych. My lobgadywali kaj by sie zas za rok trefic. Jeszcze jedno. Bruno przeca tam bol. W jedyn dziyn prziwioz kozdymu po misiu, mozno i dwa. W drugi dziyn kozdy dostol lod niego fajno ksionczka. Pelno lobrozkow w ni bolo i niy trza umiec bolo czytac, coby wszystko z ni wiedziec. Mozno cynk dostol z kond indzi, ze my loswiycyni do zadku som. Za to myslymy do przodku. Jeszcze bol z nami taki fajny chop, Cebula sie nazywo. Tegoch toch zawiod na amyn. Mysla ze sie niy gorszy. Jak my sie juz wyspiywali, posprzontali i pozawiyrali wszystko, poszli my zas na pokje. Kozdy swoje. Bol taki jedyn lostry co to we nocy piync babow cudzych lodwiedziol, w tym i moja. Som jeszcze "prawdziwe" chopy na swiecie, jak widac. Potym bolo zas rano. Wysmyczyli sie ludziska ze prykoli i poszli na sniodanie. Grzone wuszty my jedli, kawa i tyj my piyli.Tuste ze chlebym my jedli, zresztom pieronym dobre. Seba mi nawet tyj zrobiol, jak lon to zrobiol to niy wiym ale dobry bol. Tyn emeryt gornik je robiol, te tuste. Musiol sie chop nakroc ty szpyrki.Zresztom mo synek czas, niych kreje. Pomalu sie tref konczol, choc balowac by szlo jeszcze z pora dni. Jak juz wszyscy posniodali, coby siyla mieli rachunki poplacic, zaczla nos ksiyngowo rozliczac. Godom wom wszystko w tych rachunkach bolo, nawet te lokruszki co mi na ziymia slecialy. Piniyndzy zebrala co ji sie ta rolka we gosci niy chciala smiescic. Zawolali szefa ze losrodka i trza bolo za nasze uciechy i nyny zabulic. Z tego co wiym to i ty ruby rolki niy styklo. Na minus my wyszli. Jak juz wszystko bolo zalatwione to wsiedli my do naszych karytek i pojechali do Chorzowa. Czamu do Chorzowa?? Przeca Bruno Mis miol tam tam swoja Wystawa Misiow. Lobiecali my ze go lodwiedzymy. Tak tyz sie stalo. Colkom bandom my tam wpadli, larma narobiyli, pologlondali my sie misie i czas bolo do cuga. Zas klepanie po plecach, mamlanie, plakanie i pojechali kozdy do dom. Prawie do dom. Coby za rok sie zajs kaj trefic.Co my juz przi sniodaniu lobgodali. Poco jo wom to pisza , przeca wyscie tam prawie wszyscy byli i wszystko wiycie. Jorgus, co sie dziwi ze to tak pryndko przelecialo..... P.S. Juz zech trocha atramyntu sam wylol lo naszym Trefie. Choc transparyntow wielkich niy bolo, to fajnie bolo. Za ta fajnosc i za tyn Tref chciolbych tyz wszystkim podziynkowac. W piyrwszym rzyndzie Szpaniolowi, kery ze swojom slubnom sie prawie lo wszystko postarol. Wszystkim innym tyz. Razym my marasiyli, razym poskludzali, razym kroli, osobno jedli.Mozno i razym. Z tych innych wymiynia yno ta Dobro Wrozka, kero colki czos po cichu lo nos dbala, nagrody i sponsorow pakowala. Lo innych rzeczach niy spomna. Dziynki Aniu lod Seby. Za tyn tyj tyz.